PAMMUJI 36 - KITTA' MATANGKASA'

Kaja'dallanna rupataua siagang kabajikanNa Allata'ala

¹ Untu' pamimping pakelong. Battu ri Daud, atanNa Batara.

Kaja'dallanna rupataua

² A'bicarai dosaya ri ati mailalanna tu ja'dalaka, tena sikali malla'na mae ri Allata'ala.

³ Nakanai kalenna sanna' heba'na, sa'genna tanaassenga kasalanna, siagang tena nakabirisi.

⁴ Kana-kananna ja'dalaki siagang rassi balle-balle, tenamo nagaukangi apa bajika siagang annabaya.

⁵ Ri katinroanNa narancana kaja'dallanga; tena baji' apa nagaukanga, ja'dalaka tanatollakai.

KabajikanNa Allata'ala

⁶ O, Batara, pangngamaseanTa santinggi langika, tamamminraTa sa'genna rammanga.

⁷ KabajikanTa ammentengi nai' santinggi monconga, kaadelanTa sangkamma lantanna tamparang lompoa; Kiparakai rupataua siagang olo'-oloka, o, Batara.

⁸ Tamaka lompona anggaranna pangngamaseanTa, o, Allata'ala, a'la'langi rupataua lalang ri la'lanna ka'nyitTa.

⁹ Sukkuki ke'nanga ri kanre alla'bi-la'bia ri BallatTa, siagang inungang battua ri binangaTa appakanyamangi.

¹⁰ IKatte kabattuanna katallassanna sikontu apa attallasaka, lalang singaratTa accini' ikambe singara'.

¹¹ Poro tulusu' Kikamaseangi tu mangngassenga ri Katte, siagang a'gau' baji' mae ri tu lambusu' pa'maika.

¹² TeaKi' balang parekangia' nibakkai ri tu borroa, yareka nibongka ri tu ja'dalaka.

¹³ Ciniki, tu'guru'mi tau anggaukangai kaja'dallanga, tattappasa'mi ke'nanga takkullea ambangung poleang.