PAMMUJI 31 - KITTA' MATANGKASA'

Manrannuang mae ri Allata'ala

¹ Untu' pamimping pakelong. Pammujina Daud.

² IKattemi pa'la'langangku, o, Batara, teaKi' passalasaia'. Pasalamaka' lanri kaadelanTa,

³ pilangngeri laloa' siagang Kilappassanga' linta'. A'jariKi' sanrapang moncong batu mae ri nakke a'jari tampa' pa'la'langangku, sanrapang tampa' attahang makassaka, anjoremma' lasalama'.

⁴ Iye', iKattemi sanrapang moncong batu siagang tampa' attahang makassaka untu' kalengku! Kirurunganga' situru' janjinTa.

⁵ Kilappassanga' battu ri sikko' nitannanga untu' inakke, saba' iKattemi tampa' pa'la'langangku.

⁶ Antama' ri limanTa kuerang kalengku; iKatte allappassanga', o, Batara, Allata'ala tamamminraya.

⁷ Tau anynyombaya barhala Kikabirisi; mingka inakke tappaka' mae ri Batara.

⁸ Rannua' na kuma'reja-reja saba' tuli Kikamaseanga'. IKatte anciniki pa'risikku na Kiparhatikang kasusaangku.

⁹ Tena Kibalang parekanga' nitahang ri musua, mingka Kipa'jaria' laloasa a'jappa.

¹⁰ Kikamaseanga', o, Batara, saba' niakka' lalang kasusaang; paccemi matangku napakamma angngarru', ta'ronammi nyawaku siagang batangkalengku.

¹¹ La'busu'mi katallassangku lalang ri kapa'risanga, allalomi taung-taung katallassangku lalang kunrareng. Kurammi kagassingangku lanri kaja'dallangku, ba'lalo a'jari lammami buku-bukungku.

¹² A'jarima' tu nitahang mae ri sikontu musungku, ba'lalo mae ri sikamma siampi' ballakku. Ta'bangka ngasemmi sikontu siassengku ancinikka', larimi ke'nanga punna nacinikka' ri aganga.

¹³ Nikaluppaia' sanrapang tu mate, a'jarima' sanrapang barang nipelaka.

¹⁴ Ri kere-keremae nia' apa appakamalla' dudu kulangngere' kabara'-kabara' anging battu ri musungku. Assikongkoloki ke'nanga ambalianga', appareki rancana untu' ambunoa'.

¹⁵ Mingka manrannuanga' mae ri Katte, o, Batara, saba' iKattemi Allata'alaku.

¹⁶ IKatte tuli amparakaia'; Kipasalama' laloa' battu ri musu-musungku, siagang battu ri sikamma tau angngondangia'.

¹⁷ Poro nia' pangngellainTa mae ri atanTa; pasalama' laloa' lanri pangngamaseanTa.

¹⁸ TeaKi' balang parekangia' nipakasiri', o, Batara, saba' akkioka' mae ri Katte. Lappassammi nipakasiri' tu ja'dalaka, na'mereki naung ri linona tu matea.

¹⁹ Kitongkoki bawana tu paballe-ballea tu borroa ancau-caui tu lambusuka.

²⁰ Tamaka alla'bi-la'bina kabajikanTa Kipasadiaya mae ri tau mappilangngeria! Sikamma taua nacini' ngasengi kabajikang Kigaukanga, mae ri sikamma tau ma'la'langa mae ri Katte.

²¹ Kicokkoi ke'nanga lalang ri la'lanTa battu ri akkala' salana tau ja'dalaka; Kijagai ke'nanga lalang ri pa'la'langanTa battu ri tuduhanna balia.

²² Nipujimi Batara! Tamaka appakalannasa'na pangngamaseanNa mae ri nakke, wattungku nikatulung siagang nibunduki.

²³ Lalang ri kalinguangku kukapangi angkana Napela'ma' Batara battu ri dallekang mala'biri'Na. Mingka Nalangngere'mi pappalakku wattungku akkio' mae ri Ia.

²⁴ Mangngaiko ri Batara, he, sikontu umma'Na, Najagai Batara tu tamamminraya. Mingka Nahukkungi tu tampoa tena napassanggai Nahukkung.

²⁵ Gassingi siagang pakajarreki pa'mai'nu, ikau sikontu tu manrannuanga mae ri Batara!