PAMMUJI 29 - KITTA' MATANGKASA'

Sa'ranNa Batara lalang ri anging lompoa

¹ Pammujina Daud. Pujimi Batara, he sikamma niaka ri suruga, pujimi kalompoanna siagang kakoasanNa.

² Pujimi arenNa Batara mala'birika sombami nummake pakeang ibada.

³ Allata'ala malompoa a'gunturuki irateanna tamparanga, sa'ranNa kalangngerangi irateanna tamparang lompoa.

⁴ Kalangngerangi sa'ranNa Batara, lalang koasa lompo siagang kagammarrang.

⁵ Sa'ranNa Batara manrumbang poko'-poko', mannepo' tangke kayunna camara Libanon.

⁶ Napalumpaki Moncong Libanon sanrapang ana' sapi, a'lumpaki Moncong Siryon sanrapang ana' tedong romang.

⁷ Sa'ranNa Batara, angngerang kila' akkila'.

⁸ Sa'ranNa Batara Nage'gosoki parang lompoa, Nage'gosoki Batara parang lompo Kades.

⁹ Sa'ranNa Batara Nagoccangi poko'-poko' kayu lompoa, Naru'rusuki leko'-leko' kayua ri romanga; nampa akkio'mo ummaka ri Balla'Na Batara ri Yerusalem, angkana, “Pujimi Batara!”

¹⁰ Makoasai Batara ri a'ba lompoa, makoasai salaku Karaeng sa'genna satunggu-tungguna.

¹¹ Poro nisare lalo kagassingang umma'Na ri Batara, na Napa'jari ke'nanga salewangang.