PAMMUJI 24 - KITTA' MATANGKASA'

Karaeng mala'birika

¹ Pammujina Daud. Batara pata sikontu linoa siagang bonena, linoa siagang sikontu ammantanga ilalang.

² Ia ampadongkoki dasara'na irate ri tamparang, na Napaenteng irate ri je'ne' malantanga.

³ Inai akkulle nai' ri bulu'Na Batara, na antama' ri Balla'Na?

⁴ Tu tenaya callanna pikkiranna siagang panggaukanna, tenaya nassumpa napare'-pare' siagang tenaya nanynyomba barhala.

⁵ Iami lanibarakkaki siagang lanipasalama' ri Batara, siagang lanikana tutena salana ri Allata'ala.

⁶ Kammaminjo tubattua andallekang ri Allata'ala, battua anynyomba ri Allata'alana Yakub.

⁷ Sungkemi lua'-luara' pakke'bu' lompo toaya, sollanna antama' Karaeng mala'birika.

⁸ Inaika Karaeng mala'birika? Iami Batara porea; Batara sannaka koasana, porea lalang ri pa'bundukanga.

⁹ Sungkemi lua'-luara' pakke'bu' lompo toaya, sollanna antama' Karaeng mala'birika.

¹⁰ Inaika Karaeng mala'birika? Iami Batara Kaminang Koasaya, Iami Karaeng mala'birika!