PAMMUJI 21 - KITTA' MATANGKASA'

Mammujiko ri pammetanga

¹ Untu' pamimping pakelong. Pammujina Daud.

² O, Batara, ma'rannui karaenga lanri Kisarena kagassingang; ma'reja-rejai lanri Kisarena pammetang!

³ Kipa'jariammi apa nakaerokia pa'mai'na, na Kisare apa le'baka napala'.

⁴ BattuKi' mange ri ia siagang barakka' alla'bi-la'bi, naKipipakei songko' karaeng bulaeng tompo' ulunna.

⁵ Appalaki katallassang, naKisareang, umuru' mala'bu sa'genna satunggu-tungguna.

⁶ Lanri pannulunTa nasanna'mo nipakala'biri'na, Kipa'jari masahoro' siagang accaya.

⁷ Kibarakkaki untu' situlusu'na; kahaderanTa ampa'jari sanna' rannuna.

⁸ Manrannuangi karaenga mae ri Batara Kaminang Tinggia, tuli amangi lanri tuli nikamaseangi ri Batara.

⁹ LaNajakkala' ngasengi sikontu musunna, laNaallei sikamma tu mangngabirissia ri KalenNa.

¹⁰ Labattui sanrapang pepe' a'rinra-rinraya untu' ampossoki ke'nanga. Lanipaccappuki ke'nanga lalang pangngalarroinNa Batara, ri pepe' appakamutunga.

¹¹ Tena latassesa battu ri turunganna ke'nanga, lanitumpasa' ngasengi ke'nanga ri karaenga.

¹² Punna appare' rancana ke'nanga langngewai karaenga, tala'jariai akkala' balle-ballena ke'nanga.

¹³ Lanapabuccuki ana' panana, sa'genna a'boko lari ke'nanga.

¹⁴ Mammuji ikambe mae ri Katte o, Batara, lanri lompoNa koasaTa, makkelongi ikambe mammuji ri kaporeanTa.