PAMMUJI 20 - KITTA' MATANGKASA'

Pappala' doang appala' pammetang

¹ Untu' pamimping pakelong. Pammujina Daud.

² Poro Napialiko Batara ri wattu kasukkarrang, poro nala'langngiko koasaNa Allata'alana Yakub!

³ Poro akkiringi bantuang battu ri Balla'Na, na Nasareko pannulung battu ri Bulu' Sion.

⁴ Poro Nau'rangi ngasengi sikontu passarenu, na sannang ri sikamma koro'bang nitununu.

⁵ Poro Nasareko sikontu nukaerokia, na Napa'jari sikamma rancananu.

⁶ Na makkio' marannu ikambe lanri pammetannu, nimangngangka' bate-bate untu' mammuji ri Allata'alata. Poro Napa'jari Batara sikontu pappala'nu.

⁷ Anne kamma kuassemmi angkana Batara assarei pammetang mae ri karaeng nipileNa. Nipiali ri Batara battu ri suruga matangkasa'na; lanri koasaNa Batara, nanggappa pammetang lompo.

⁸ Nia' tau ampattoangi kareta pa'bundukanna, nia' todong appattoangi jaranna. Mingka ikatte nipattoanga koasaNa Batara, Allata'alata.

⁹ Latatto'roi ke'nanga na tu'guru' mingka ikatte lambangungki' nai' ammenteng kassa'.

¹⁰ O, Batara, Kisarei pammetang karaenga, Kipialimi ikambe lalang makkio'na ikambe.