PAMMUJI 18 - KITTA' MATANGKASA'

Kelong pammetanna Daud

¹ Untu' pamimping pakelong. Kelong Pammujina Daud, atanNa Batara. Nakelongangi ri Batara ri wattunna nilappassang Daud battu ri Saul siagang battu ri musu-musunna.

² Mangngaia' ri Katte, o, Batara, iKattemi kagassingangku.

³ Batara sanrapang pa'la'langngang makassakku tampa' pa'la'langangku. Allata'alaku sanrapang moncong batu tampa' pa'la'langangku. Sanrapang pa'lapa' antongkokia', siagang anjagaia' kutuli amang.

⁴ Makkioka' ri Batara, siratanga nipuji, Ia allappassanga' battu ri musu-musungku.

⁵ Nitammulilia' ri bahayana kamateanga kunitambungi ri a'bana kapossokanga.

⁶ Nitammulilia' ri bahayana kamateanga, sikko'na kamateanga niaki ri dallekangku.

⁷ Makkioka' ri Batara lalang ri kasukkarangku, makkioka' ri Allata'alaku appala' pannulung. Battu ri Balla'na Nalangngereki sa'rangku na Naparhatikang pakkiokku.

⁸ Nampa ta'goccang siagang amme'bere'mo linoa, ta'lenggami siagang annekkere'mi bangkeng monconga napakamma larroNa Allata'ala.

⁹ Tassappuru'mi umbua battu ri so'bolo' ka'murunNa, assulu'mi pepeka siagang bara pepeka battu ri bawaNa.

¹⁰ Napuemi langika nampa naung mae siagang rammang sassang irawangngang bangkenNa.

¹¹ Anri'baki a'dongko' malaeka' akka'nyi'; allayang irate ri ka'nyi'na anginga.

¹² Natongkoki kalenna siagang sassang; nikulilingi ri rammang le'lenga.

¹³ Battu ri kila' niaka ri dallekanna, assuluki rammanga, bosi a'batu siagang pepe'.

¹⁴ Nampa a'gunturu' Batara battu ri allaka; Kaminang Tinggia Napappilangngerangi sa'ranNa.

¹⁵ Napabuccuki ana'-ana' panaNa nampa Napasimbung sikamma musua; Napasisambung-sambummi Napakila' kila'Na, sa'genna lari ngaseng ke'nanga.

¹⁶ Tassungkemi bangkenna tamparanga siagang bangkenna linoa ri wattu Naga'gara'na Batara musunNa lalang larroNa.

¹⁷ Battu rate Napajonjo naung limanNa Batara; Nata'galakka' nampa Nabesokka' battu lalang ri je'ne' lantanga.

¹⁸ Napasalamakka' battu ri musu porea siagang battu ri tau mangngabirissia ri nakke, lanri kassa' duduna ke'nanga untu' inakke.

¹⁹ Nabakkaia' ke'nanga ri wattu natujuku bala, mingka Batara a'jari pannulungku.

²⁰ Nalappassanga' battu ri bahayaya Napasalamaka' lanri mangngellaiNa mae ri nakke.

²¹ Nabalasaki Batara panggaukang tojengku; Nabarakkakia' lanri tena kusala.

²² Mannurukia' ri parentaNa Batara na tena kumassaile ma'boko battu ri Allata'alaku.

²³ Sikontu hukkunNa kuparhatikangi, tena kukaluppai sikamma parentaNa.

²⁴ Naassengi angkana tena callangku siagang kupakabellai kalengku battu ri kasalanga.

²⁵ Na Nabalasa'mo Batara panggaukang tojengku saba' Naassengi angkana tena kusala.

²⁶ O, Batara, iKatte majarre' mae ri tau majarreka siagang baji' mae ri tau bajika.

²⁷ Ri tau matangkasaka Kipa'nyatai kalenTa matangkasa', mingka Kimusui tau ja'dalaka.

²⁸ Kipasalamaki tau tuna pa'maika, mingka Kipadundui tau tampoa.

²⁹ Kiparinranga' suloku, Batara Allata'alaku ansingari kasassangangku.

³⁰ Kipakagassinga' untu' antumpasaki musua; lanri pannulunNa Allata'alaku nakutarrusu' pannahanna ke'nanga.

³¹ Sukku' ganna'na panggaukanNa Allata'ala akkulle nipatappa' janjinNa Batara. Sanrapangi pa'lapa' ri batangkale mae ri sikontu tau ma'la'langa mae ri Ia.

³² Saba' Batarayaji bawang Allata'ala; Allata'alaji bawang akkulle ampattojengki'.

³³ Iaji Allata'ala akkulle ampakajarreka' siagang ampa'jari amangi oloangku.

³⁴ Ia ampa'jari kassaki bangkengku sanrapang bangkeng jonga, siagang anjagai kasalamakkangku ri monconga.

³⁵ Nalatia' untu' a'bundu', sa'genna akkulle kupabantang anrong pana kaminang kassaka.

³⁶ O, Batara, Kila'langia' siagang Kipasalamaka', Kipakajarreka' siagang koasaTa; a'jari porema' lanri gautTa.

³⁷ Kijagaia' sollanna tena najakkalakka' musua, siagang tena kule'ba' tu'guru'.

³⁸ Kiondangi musungku nampa Kibeta ke'nanga, siagang tammono'bokoaKi' sa'genna posso' ke'nanga.

³⁹ Kipatappasaki ke'nanga sa'genna takkullea ambangung poleang, anra'ba tenamo pakkullena ke'nanga ri dallekang bangkengku.

⁴⁰ Kisarea' kagassingang untu' a'bundu', siagang pammetang mae ri sikamma musungku.

⁴¹ Kipalari musungku battu ri nakke; Kipa'jari possoki sikamma tau mangngabirissia ri nakke.

⁴² Ammarrammi ke'nanga, mingka tena antulungi, akkio'mi ke'nanga ri Batara, mingka tena Nappiali.

⁴³ Kiancuruki ke'nanga sanrapang limbu'bu' tassimbunga, nampa Kibarrasa' sanrapang peo' ri aganga.

⁴⁴ Kilappassanga' battu ri tu dorakaya, nampa Kipa'jaria' tukoasa ri bansa-bansaya; bansa tenaya kuassengi a'jari atangku.

⁴⁵ Bansa-bansa maraenga tunduki mae ri nakke na mannuruki punna nalangngere' parentaku.

⁴⁶ Tenami kabaranianna ke'nanga; annekkere' siagang assulu' battu ri pammantanganna.

⁴⁷ Batara mattallasaki! Nipujimi mappatojengku! Mala'biriki kalompoanNa Allata'ala mappasalamakku!

⁴⁸ Nasarea' pammetang mae ri musungku; Napadundui bansa-bansaya ri dallekangku,

⁴⁹ napasalamakka' battu ri sikamma balingku. Batara, Kisarea' pammetang mae ri musungku, Kikatutuia' battu ri sikamma tu sekkeka.

⁵⁰ Jari kupakalompo maKi' ri alla'na bansa-bansaya, siagang makkelomma' pammuji-muji mae ri Katte.

⁵¹ Nasarei Allata'ala pammetang karaeng Naangkaka, tuli Nakamaseangi tu nipileNa, iamintu Daud siagang turunganna sa'genna satunggu-tungguna.