PAMMUJI 141 - KITTA' MATANGKASA'

Pappala' doang ri wattu bangngi

¹ Pammuji battu ri Daud. Akkioka' mae ri Katte, o, Batara, Kitulung laloa' linta'! Kipilangngeria' punna akkioka' mae ri Katte.

² Kitarimai pappala' doangku lalang koro'bang dupa, siagang kupatara limangku a'jari koro'bang bangngi.

³ O, Batara, Kijagai bawaku siagang Kijannangngi muncengku.

⁴ Pakabella' battu ri ero' a'gau' ja'dalaka. TeaKi' lappassangngia' a'rappungang siagang tau doraka siagang amminawang angnganre lalang ri passuarranna ke'nanga.

⁵ Punna nia' tau baji' ampakaingaka', siagang lambusuki pa'mai'na angngajarakka', iaminjo sanrapang minynya' kaminang baji' mae ri nakke. Poro tena lalo nakutollaki, saba' tulusu' appala' doangku ambaliangi kaja'dallanna ke'nanga.

⁶ Punna sikamma pamarentana ke'nanga nipasambila battu ri tubiri'na batua, lanamangakui ke'nanga angkanaya kammatojengi kanangku.

⁷ Lanipasiaraki buku-bukunta ri sa'rinna kuburuka sanrapang batu niancuruka naung ri buttaya.

⁸ Mingka inakke tuli manrannuanga' ri Katte, o, Karaeng Allata'alaku, teaKi' balang parekangia' mate, saba' iKatte kupa'la'langngi.

⁹ Kijagaia' battu ri sikko' nitannanga untu' inakke, battu ri sikko'na anjo sikamma tau ja'dalaka.

¹⁰ Boli'mi kamma tu'guru' ke'nanga antama' ri sikko' kalenna, mingka inakke poro salamaka'.