PAMMUJI 137 - KITTA' MATANGKASA'

Piraung ri biring binanga-binanga Babel

¹ Ri birinna binanga-binanga Babel ammempo angngarru' ikambe punna niu'rangi Sion.

² Ri poko'-poko' kayu gandarusa ri anjo pa'rasanganga nagentung kacapinna ikambe.

³ Sikamma tau antahangai ikambe nasuroi ikambe ampakkelongangi ke'nanga. Tau anjallakkangai ikambe nasuroi ikambe akkelong lagu-lagu rannu, nakana, “Pakkelongangi ikambe lagu-lagu battu ri Sion!”

⁴ Maka lakkullekai ri pa'rasanganna bansa maraeng akkelong ikambe mae ri Batara?

⁵ Boli'ma' kamma takkulleamo akkelong punna lakukaluppaiko, Yerusalem!

⁶ Boli'ma' kamma takkulleamo akkelong punna lakukaluppaiko siagang tena nakupa'jariko karannuangku!

⁷ O, Batara, Kiu'rangi panggaukanna tu Edom ri wattunna niancuru' Yerusalem. Nakana ke'nanga, “Rumbangi, rumbangi sa'genna naung ri lappara'na!”

⁸ He Babel, ikau laniancurukko! Mate'nei tau ambalasakai ri kau kaja'dallang nugaukanga mae ri kambe.

⁹ Mate'nei tau angngalleai sikamma ana' lolonu nampa napatappasa' naung ri bulu' batua!