PAMMUJI 132 - KITTA' MATANGKASA'

Pammuji mae ri Balla'Na Batara ri Yerusalem

¹ Kelong siara. O, Batara, angngu'rangiKi' mae ri Daud, siagang sikontu pa'risi'na.

² TeaKi' kaluppai sombana mae ri Katte, o, Batara, ri tinja'na mae ri Kaminang Gassinga, Allata'alana Yakub.

^3-4 Nakana, “Tena kulammari-mari ri ballakku yareka attinro ri tampa' katinroangku,

⁵ punna tenapa kuppasadia balla' untu' Allata'alana Yakub, tampa' pammantangang untu' Batara Kaminang Gassinga.”

⁶ Ri Betlehem nilangngereki passala' Patti Parjanjianga, nampa nibuntulu' ri parang Yaar.

⁷ Umba ki'lampa mange ri tampa' pammantanganNa Batara, ansombai ri dallekang empoang kala'biranNa.

⁸ Battu maKi' siagang ammantang maKi' ri BallatTa, o, Batara, siagang Patti ParjanjianTa, tanra kakoasanTa.

⁹ Poro akkio' rannu ummatTa, na sikontu imanTa tuli naturuki erotTa lalang tallasa'na.

¹⁰ Lanri Daud, atanTa, teaKi' sorongbokoi karaeng nipileTa.

¹¹ Le'ba'mi assumpa Batara mae ri Daud; tena nalaNakaluppai janjinNa. Nakana, “Sitau ana'nu laKupa'jari karaeng untu' ammarenta ansambeangko.

¹² Punna tamamminraya ana'-ana'nu mae ri parjanjiangKu, siagang mannuruki ri sikamma parentaKu, jari untu' satunggu-tungguna turunganna ke'nanga lansambeangko a'jari karaeng.”

¹³ Saba' le'ba'mi Napile Batara Sion; Naerokangi untu' a'jari tampa' pammantanganNa.

¹⁴ Nakana, “Anrinnimi pammantangangKu sa'genna satunggu-tungguna, erokKa' ammarenta ri anne tampaka.

¹⁵ Sikontu kaparalluanna laKusarei alla'bi-la'bi, tu kasi-asina laKusarei kanre sa'genna bassoro'.

¹⁶ Imang-imanna ampappicinikangi kasalamakkang battua ri Nakke; lakkelongi umma'na siagang akkio' rannu.

¹⁷ Anrinni sitau turunganna Daud Kupa'jari karaeng; laKupakajarreki pamarentahanna.

¹⁸ Tuli lasalewangangi kakaraenganna, mingka musu-musunna lanipakasiriki.”