PAMMUJI 125 - KITTA' MATANGKASA'

Amang lalang ri pa'la'langanNa Batara

¹ Kelong siara. Tau tappaka mae ri Batara, sanrapangi Bulu' Sion majarre' tama'lenggaya, attahang satunggu-tungguna.

² Sanrapang moncong-moncong alla'langi Yerusalem, kammaminjo bateNa Batara alla'langi umma'Na anne kamma siagang satunggu-tungguna.

³ Tau ja'dalaka tena natulusu' lakoasa ri butta pisakana tau lambusuka, sollanna tena namminawang tau bajika a'gau' ja'dala'.

⁴ O, Batara, Kigaukammi bajika mae ri tau bajika, mae ri tau tulusu' pa'maika.

⁵ Mingka tau a'gau' jekkonga poro nihukkung laloi ri Batara siagang tau ja'dalaka. Poro salewangang lalo ummatTa!