PAMMUJI 111 - KITTA' MATANGKASA'

Pammuji untu' Batara

¹ Pujimi Batara! Lalang sikontu pa'maikku appala' sukkurukka' mae ri Batara ri tangngana pa'rappunganna umma'Na.

² Tamaka appakalannasa'na sikamma panggaukanNa Batara, siratangi nipilajari ri tau mangngaia ri Ia.

³ Malompoi siagang nipuji jama-jamanNa Batara, kaadelanNa sa'genna satunggu-tungguna.

⁴ Anjo Batara mangngamaseangi siagang manynyayangi, Nagaukang gau'-gau' malompoa, sollanna ikatte tuli niu'rangi.

⁵ Nasarei dalle' tau mappilangngeria, siagang tuli Nau'rangi parjanjianNa.

⁶ Le'ba'mi Napappicinikang koasaNa mae ri umma'Na, iamintu Nasarei ke'nanga butta pisaka bansa-bansaya.

⁷ Adeleki siagang tamamminrayai Batara lalang sikontu tindakanNa, sikontu parentaNa akkullei nipattoang.

⁸ Attahangi hukkunNa satunggu-tungguna, nipassareangi lalang katojengang siagang kaadelang.

⁹ Napakabebasaki umma'Na, appareki parjanjiang mannannungang siagang ke'nanga. Iami Batara matangkasa' siagang sannaka poreNa!

¹⁰ Inai ero' cara'de' musti napakalompoi Batara, Nasarei pammahang sikontu tau mannurukia. Nipujimi Batara satunggu-tungguna!