PAMMUJI 102 - KITTA' MATANGKASA'

Pappala' doang lalang kasusaang

¹ Pappala' doang tau ballasa', sanna' mangnganna nakkunrareng ri Batara.

² O, Batara, Kipilangngeri laloi pappala' doangku, boli'mi kamma nata'rapi' pakkiokku mae ri Katte.

³ TeaKi' allei rupanTa battu ri nakke punna niaka' lalang kasusaang. Kipilangngeria' punna akkioka', siagang Kipialia' linta'.

⁴ Tappelaki tallasakku sanrapang umbu; a'barai buku-bukungku sanrapang pepe'.

⁵ Dodonga' sanrapang ruku' kalotoro', tena sikali pattujungku angnganre.

⁶ Akkunrareng lompoa'; bukkuleng mami anrokoki buku-bukungku.

⁷ Sanrapanga' kiti' balang ri parang lompoa, sanrapang kokoci' ri rumbangang sinoa.

⁸ Takkullea' attinro, sanrapang jangang-jangang sinoa ri pattongko' balla'.

⁹ Sila'busu' alloi musua anghina'; napare' pattunrai arengku ri tau larroa mae ri nakke.

¹⁰ Angnganrea' limbu'bu' sanrapang roti, je'ne' inungku accampuru' je'ne' mata,

¹¹ saba' le'ba'ma' Kiangka' nampa Kipasambila' lalang pangngalarroi a'rinra-rinraTa.

¹² Allaloi tallasakku sanrapang bayang-bayang ri wattu karueng; a'jari kalumenga' sanrapang ruku'.

¹³ Mingka iKatte, o, Batara, Karaeng satunggu-tunggua, tuli niu'rangiKi' ri sikontu turungang.

¹⁴ LambangungKi' na Kikamaseang Sion, narapi'mi wattunTa untu' mangngamaseang ri ia.

¹⁵ Saba' ata-atanTa mangngai ri ia, manna pole na'jarimo rumbangang. Tu'guru' mangngamaseangi ke'nanga mae ri ia, manna pole na'jari aumo.

¹⁶ KoasaNa Batara lanikamallakkangi ri sikontu bansa-bansa; kalompoanna lanikangalikangi ri sikontu karaenga,

¹⁷ punna nabangung Batara ammotere' Sion, na maju lalang ri kalompoanNa.

¹⁸ LaNapilangngeri pappala' doanna umma'Na kasi-asia, tena Natollaki pappala'na ke'nanga.

¹⁹ Tulisi' ngasengi sikontu panggaukanNa Batara untu' turungang labattua sallang, sollanna bansa tenayapa nilassukangi akkullei mammuji mae ri Ia.

²⁰ Acciniki Batara battu rate ri tampa' tinggina, battu ri suruga attoa' naung ri lino

²¹ untu' ampilangngeri kunrarenna tunitahanga na Napakabebasa' tau nihukkung matea.

²² Nalanikabarrang arenNa ri Sion, siagang lanipuji-puji ri Yerusalem,

²³ ri wattunna a'rappungang bansa-bansaya siagang sikamma kakaraenganga untu' a'gau' ibada mae ri Batara.

²⁴ Natepoki Batara kagassingangku ri wattungku rungka ija, siagang Napakabodo umurukku.

²⁵ Nampa kukana, “O, Allata'ala, teaKi' allei nyawaku ri tangnga-tangngana tallasakku.” O, Batara, iKatte attallasa' satunggu-tungguna,

²⁶ riolo iKatte ampa'jari linoa; langika pole bate paretTa todong.

²⁷ Yangasenna anjo lalanynyaki, mingka iKatte tuli niatTa; sikontuna anjo latoai sangkamma care-care. Kipelaki sanrapang baju toa, nampa laposso' ngaseng.

²⁸ Mingka iKatte tulusu' kammaTa, tena kale'bakkanna tallasatTa.

²⁹ Lasannangi katallassanna ana' cucunna ikambe, siagang tuli amang lalang ri pa'la'langanTa.