PAMMILANGNGANG 1 - KITTA' MATANGKASA'

Uru-uru nibilanna tu Israel

¹ Ri tanggala' se're bulang rua lalang taung makarua nabokoinamo bansa Israel butta Mesir, a'bicarami Batara mae ri Musa lalang ri KemaNa Batara ri parang lompona Sinai. Nakana,

² “Ikau siagang Harun musti nubilangi sikontu umma' Israel situru' golongang bijanna siagang massing kaluargana. Pareki dattara' areng-arenna sikontu tu bura'nea,

³ umuru' ruampulo taunga na rateanganna, ia akkullea a'jari tantara. Musti nidattaraki ke'nanga situru' massing pasukanna ke'nanga.

⁴ Battu ri tunggala' sukua, appalakko sitau pamimping golongang kaluargana ke'nanga untu' ambantuko sipa'rua.”

^5-16 Iaminne areng-arenna tunipilea battu ri ummaka untu' ambantui Musa siagang Harun siagang a'jari pamimpinga mae ri massing-massing sukua: Suku Pamimping Ruben Elizur ana'na Syedeur Simeon Selumiel ana'na Zurisyadai Yehuda Nahason ana'na Aminadab Isakhar Netaneel ana'na Zuar Zebulon Eliab ana'na Helon Efraim Elisama ana'na Amihud Manasye Gamaliel ana'na Pedazur Benyamin Abidan ana'na Gideoni Dan Ahiezer ana'na Amisyadai Asyer Pagiel ana'na Okhran Gad Elyasaf ana'na Rehuel Naftali Ahira ana'na Enan

Suku Pamimping

¹⁷ Lanri bantuannami anjo tau sampuloa anrua,

¹⁸ na nasuro Musa siagang Harun sikontu ummaka asse're ri tanggala' se're bulang rua, nampa nisusung pattottoranna ke'nanga situru' golongang passibijanna lalang ri tunggala' sukuna ke'nanga. Nicata'mi sikontu tu bura'ne umuru' ruampulo taunga na rateanganna nampa nibilang,

¹⁹ sangkamma Naparentakanga Batara. Yangasenna anjo nagaukangi Musa anjoreng ri parang lompona Sinai.

^20-46 Tubura'-bura'ne umuru' ruampulo taunga sa'genna rateanganna siagang akkullea antama' tantara, nidattaraki arenna situru' golongang bijanna siagang kaluargana, appakkaramula battu ri Ruben, ana' toana Yakub sa'genna Naftali. Ia jaina ke'nanga iamintu: Suku Jaina Tau Ruben 46.500 Simeon 59.300 Gad 45.650 Yehuda 74.600 Isakhar 54.400 Zebulon 57.400 Efraim 40.500 Manasye 32.200 Benyamin 35.400 Dan 62.700 Asyer 41.500 Naftali 53.400 Yangasenna: 603.550

Suku Jaina Tau

⁴⁷ Tu Lewi tena nanidattaraki siagang suku-suku maraenga,

⁴⁸ lanri Nakana Batara ri Musa,

⁴⁹ “Punna nucata' arenna sikamma tau akkullea a'jari tantara, tea' mako cataki tu Lewi.

⁵⁰ Suroi ke'nanga angngurusuki KemaKu siagang sikontu pakkakasa'na. Tugasa'na ke'nanga iamintu ampisangi KemaKu siagang pakkakasa'na kammayatompa naurusuki. Musti akkemai ke'nanga ri tammulilina.

⁵¹ Punna a'lettekko, tu Lewi musti ambongkaraki KemaKu, nampa napasang ammotere' ri tampa' pakkemaang berua. Pantaranganna ke'nanga, manna nai punna a'reppeseki ri anjo KemaKu musti nihukkung matei.

⁵² Tu Lewi maraengannaya musti a'gompo-gompoi ke'nanga ambangungi kemana ke'nanga; tunggala' taua lalang ri panggompoanna massing nikulilingi ri banderana ke'nanga.

⁵³ Mingka tu Lewi musti akkemai ri tammulilina KemaKu. Musti najagai ke'nanga sollanna tena tau anrepesi sa'gengKu larro siagang Kuhukkungi umma' Israel.”

⁵⁴ Jari nagaukammi tu Israel sikontu anjo apa Naparentakanga Batara mae ri Musa.