NEHEMIA 7 - KITTA' MATANGKASA'

¹ Le'baki anjo tembo' kallika nibangung, kusuromi sollanna nipataba sikontu papang pakke'bu'na pakke'buka. Nampa kusuro sikamma pajaga pakke'bu' lompoa, sikamma pakelonga siagang sikamma tu Lewia massing anggaukangi tugasa'na ke'nanga.

² Pamarentahanga ri Yerusalem kupappirannuangi mae ri sari'battangku Hanani siagang Hananya, panglimaya, nasaba' ia la'bi bajikangngangi natau maraenga, mallaki ri Allata'ala siagang akkullei nipatappa'.

³ Kukana ri ke'nanga, “Iapa nakkulle nisungke pakke'bu' lompona Yerusalem punna singara'mo nampa punna bangngi musti le'ba'mi nitongko' siagang nipataba balo'-balo' panjolina ri tenanapa nalappasa' tau jaga karuenga. Pantaranganna anjo musti nia' nijo'jo' pike' panjagaang battu ri pandudu'na Yerusalem; sipa'gang untu' pos-pos panjagaang, nampa sipa'gang untu' appatoroli ri daera tammulilina balla'na ke'nanga.”

Dattara' areng-arenna tau ammotereka battu ri pammelakkanga

⁴ Anjo kota Yerusalem luaraki, mingka sike'de'ji pandudu'na, siagang tenapa najai balla' nibangung.

⁵ Lanri kammana, nasungkemi Allata'ala pikkirangku untu' ampa'rappungangi sikontu ra'yaka, sikamma tutoa-toana kammayatompa sikontu pamimpinna ke'nanga, sollanna akkulle kubilang ke'nanga situru' dattara' pattottoranna ke'nanga. Lalang anjo kasampatanga kubuntulu'mi catatanna sikamma tau uru-uru ammotereka battu ri pa'rasangang pammelakkanga. Iaminne kasingaranna anjo catatang kugappaya:

⁶ Jai battu ri sikamma tau nipelaka ambokoi propinsi Babel nampa ammotere' mange ri Yerusalem siagang Yehuda, massing-massing ri kotana ke'nanga. Sallomi ke'nanga attallasa' lalang ri pa'rasangang pammelakkanga ri Babel, iamintu baku' nieranna ke'nanga mange anjoreng ri Karaeng Nebukadnezar.

⁷ Ia pamimping-pamimpinna ke'nanga iamintu Zerubabel, Yesua, Nehemia, Azarya, Raamya, Nahamani, Mordekhai, Bilsan, Misperet, Bigwai, Nehum, siagang Baana.

^8-25 Iaminne dattara' golongang kaluargana Israel, siagang siapa jaina battu ri massing golongang pa'bijang, ia ammotereka battu ri pa'rasangang pammelakkanga: Paros – 2.172 tau Sefaca – 372 tau Arakh – 652 tau Pahat-Moab (turunganna Yesua siagang Yoab) – 2.818 tau Elam – 1.254 tau Zatu – 845 tau Zakai – 760 tau Binui – 648 tau Bebai – 628 tau Azgad – 2.322 tau Adonikam – 667 tau Bigwai – 2.067 tau Adin – 655 tau Ater (niareng tongi Hizkia) – 98 tau Hasum – 328 tau Bezai – 324 tau Harif – 112 tau Gibeon – 95 tau

^26-38 Sikamma tau ammantanga boe-boena ri kota-kota nipaua anne irawa, ammotere' tongi battu ri pa'rasangang pammelakkanga: Kota Betlehem siagang Netofa – 188 tau Anatot – 128 tau Bet-Azmawet – 42 tau Kiryat-Yearim, Kefira, Beerot – 743 tau Rama siagang Gaba – 621 tau Mikhmas – 122 tau Betel siagang Ai – 123 tau Nebo maraenga – 52 tau Elam maraenga – 1.254 tau Harim – 320 tau Yerikho – 345 tau Lod, Hadid, Ono – 721 tau Senaa – 3.930 tau

^39-42 Iaminne dattara' golongang kaluarga imang ammotereka battu ri pa'rasangang pammelakkanga: Yedaya (turunganna Yesua) – 973 tau Imer – 1.052 tau Pasyhur – 1.247 tau Harim – 1.017 tau

^43-45 Golongang kaluargana Lewi ammotereka battu pa'rasangang pammelakkanga iamintu: Yesua siagang Kadmiel (turungang battu ri Hodewa) – 74 tau Pakarena musika ri Balla'Na Batara ri Yerusalem (turunganna Asaf) – 148 tau Pajaga pakke'bu' lompona Balla'Na Batara ri Yerusalem (turunganna Salum, Ater, Talmon, Akub, Hatita, siagang Sobai) – 138 tau

^46-56 Iaminne dattara' golongang kaluargana sikamma pajamaya ri Balla'Na Batara ri Yerusalem, ammotereka battu ri pa'rasangang pammelakkanga: Ziha, Hasufa, Tabaot, Keros, Sia, Padon, Lebana, Hagaba, Salmai, Hanan, Gidel, Gahar, Reaya, Rezin, Nekoda, Gazam, Uza, Paseah, Besai, Meunim, Nefusim, Bakbuk, Hakufa, Harhur, Bazlit, Mehida, Harsa Barkos, Sisera, Temah, Neziah, siagang Hatifa.

^57-59 Golongang kaluarga palayanna Salomo, ammotereka battu ri pa'rasangang pammelakkanga iamintu: Sotai, Soferet, Perida, Yaala, Darkon, Gidel, Sefaca, Hatil, Pokheret-Hazebaim, Amon.

⁶⁰ Sikontu turunganna sikamma pajamaya ri Balla'Na Batara ri Yerusalem siagang sikamma palayanna Salomo ammotereka battu ri pa'rasangang pammelakkanga nia' 392 tau.

^61-62 Ri sikamma tau a'lampaya battu ri kota-kota Tel-Melah, Tel-Harsa, Kerub, Adon siagang Imer, nia' 642 tau antamaya golongang kaluarga Delaya, Tobia siagang Nekoda; mingka takkulleai napa'butti ke'nanga angkanaya turungang battu tongi ri bansa Israel anjo ke'nanga.

^63-64 Nia' todong siapa are kaluarga imang, tenaya nakkulle nabuntulu' catatanna ke'nanga ri passala'na boe-boena ke'nanga. Anjo golonganga iamintu Habaya, Hakos, siagang Barzilai. (Nia' sitau boena golongang Imang Barzilai a'bunting siagang baine turungang golongan Barsilai ri Gilead nampa napake arenna golonganna matoanna.) Lanri tena nakkulle napa'butti angkana inai boe-boena ke'nanga, jari takkulleami ke'nanga nitarima a'jari imang.

⁶⁵ Guburnurna daera Yehuda tanapa'biangai ke'nanga angnganre kanre nipassareanga mae ri Allata'ala, sa'genna nia' sitau imang akkulle appala' pitunju' ammake Urim siagang Tumim.

^66-69 Yangasenna anjo tunipelaka ammotere' mange ri pa'rasanganna nia' 42.360 jaina tau. Pantaranganna anjo nia' todong ammotere' pambantuna ke'nanga, iamintu nia' 7.337 tau. Kammayatompa nia' pakelong 245 tau. Naerangi ke'nanga sikamma olo'-olo' piarana iamintu: Jarang – 736 kayunna Bagal – 245 kayunna Unta – 435 kayunna Keledai – 6.720 kayunna

^70-72 Jai ri ra'yaka assare sumbangang untu' ampakaringangngi ongkoso'na pappakabajikanna Balla'Na Batara ri Yerusalem: Battu ri guburnur – 8 kilo battala'na bulaeng 50 mangko' untu' upacara 530 juba imang Battu ri kapala golongang bijaya – 168 kilo battala'na bulaeng 1.250 kilo battala'na pera' Battu ri tau maraengannaya – 168 kilo battala'na bulaeng 140 kilo battala'na pera' 67 juba imang

⁷³ Sikamma imang, tu Lewi, pajaga pakke'bu' lompona Balla'Na Batara ri Yerusalem, pakelonga, jai battu ri ra'ya' biasaya, sikamma pajamaya ri Balla'Na Batara ri Yerusalem, bodona kana: sikontu ra'ya' Israel ammantammi ri kota-kotaya siagang ri desa-desaya ri sikontu Pa'rasangang Yehuda.