NAHUM 2 - KITTA' MATANGKASA'

Tu'guru'na Niniwe

¹ He Niniwe, pilangngeri! Nia'mi battu eroka ampanrakiko! Jagai tembo'-tembo' pattahangnganga! Jannangngi aganga! Sadiako untu' a'bundu'. (

² Tojeng, laNapoterangi Batara kalompoanna tu Israel, sollanna a'jari sangkamma riolo, ri tenanapa niellaki ri musu-musunna.)

³ Pannangkisi'na musua ejai tanja'na, nampa pakeanna kontui cera'. Sadiami musua untu' a'bakka. Rapang pepe', accillaki bassi karetana. Sikontu jaranna a'lumpa'-lumpaki.

⁴ Ri aganga, lacciriki maju kareta-karetaya. Siondang-ondangi ke'nanga ri paranga. Kontui nicini' sulo a'rinra-rinraya, a'gassingang lari rapang kila'.

⁵ Sikamma perwiraya nikioki maju; tatto'roa tojeng ri wattunna a'bakka. Akkaro-karoi ke'nanga mange ri tembo'na kotaya napaenteng linta' balo' panrumbanga.

⁶ Tassungke kabusu'mi pannahang je'neka, nagegere'mo sikontu balla' karaenga.

⁷ Bainenna karaenga nijakkalaki, akkio'mi siagang appiraummi dayang-dayanna, akkunrareng ke'nanga rapang jangang-jangang pune-pune na natempa tojeng barambanna lanri susana.

⁸ Tassimbungi lari ra'ya' Niniwe, rapang je'ne' assuluka battu ri tingkasa' rumbanga. Nia' sa'ra akkio' angkana, “Ammantangko! Ammantangko!” mingka tena nia' ero' ammotere'.

⁹ Rampasaki sikontu bulaenna siagang pera'na! Barang-baranga ri anne kotaya ma'nassa alla'bi-la'bi!

¹⁰ Ancuru'mi Niniwe, sinomi na kalotoro'. La'bai pa'maika napakamma malla'. A'jari lammami siagang annekkereki kulantuka. A'jari pi'lasa' kabusuki rupanna taua.

¹¹ Kemae anjo kotaya kamma-kamma anne? Kota sanrapanga leang pammantangngang singa a'ru'mung? Tampa'na nisare kanre ana'-ana' singaya, tampa' natujua singa lakia siagang singa ganaya tampa' amanga untu' ana'-ana'na?

¹² Riolo anjoreng singaya najakkala' apa lanakanrea, nampa nabage-bage dagenna mae ri singa ganaya siagang ana'na. Napirassi leanna siagang toppa'-toppa' dageng wassele' nagappaya naondang.

¹³ Nakana Batara Kaminang Tinggia, “INakke anne musunnu. LaKutunui kareta-karetanu sa'genna cappu'. Lamatei tantaranu lalang ri pa'bundukanga, siagang laKuallei battu ri kau sikontu apa le'baka nualle battu ri tau maraenga. Sikamma apa natuntuka tunisuronu tenamo lanilangngere'.”