KELONG MALA'BIRI' 4 - KITTA' MATANGKASA'

Bura'ne

¹ Ikau sanna' ga'ganu, sayangku, tojeng, ikau sanna' ga'ganu. Matannu ri bokona bongonnu rapang mata bodobangkeng; uu'nu rapang nicini' pa'gompoang bembe niaka naung battu ri Bulu' Gilead.

² Giginnu keboki rapang pa'rappungang gimbala' beru le'baka nicukkuru' siagang nije'ne', appasang rapang ana' gimbala' akkambara', manna se're tania' tappela'.

³ Muncennu rapangi pita eja, na bawanu sanna' baji'na nicini'. Pilisi'nu rapangi rappo delima nipue rua, taccokko ri bokona bongonnu.

⁴ Kallonnu rapangi menara Daud, nibangunga untu' pammolikang sanjata. Rantenu kammai sisa'bu pa'lapa', palu-palunna ngaseng tubarania.

⁵ Susunnu rapangi rua ana' jonga, ana' kijang akkambara' sitabanga angnganre ruku' ri alla'na bunga-bunga bakunga.

⁶ Eroka' mange ri moncong muru', mange ri bulu' kamanynyang, sa'genna ammiri' anging bari'basaka, napa'lanynya' sassanna bangngia.

⁷ Ikau ga'ga sikaliko, sayangku, tena calla ri kalennu.

⁸ Umba kinaung battu ri Libanon, buntingku, umba kinaung battu ri Libanon. Naungko battu ri coppo'na Amana, battu ri coppo'na Senir siagang Hermon, tampa' pammantanganna macanga siagang singaya.

⁹ Nuallemi nyawaku, andi', buntingku, nuallei nyawaku lanri paccini'nu, lanri paramata ga'ga ri rantenu.

¹⁰ Tamaka baji'na tanrinnu, andi', buntingku, bella baji'na na anggoroka. Mabau' sikali minynya'-minynya'nu, la'biangngang na sikamma rasanna rampa-rampaya.

¹¹ Baji'na kana-kanannu, buntingku, sanrapang je'ne' bani siagang dadi'. Pakeannu sambauki Moncong Libanon.

¹² Tanringku rapangi koko nikalli' tembo' koko nikalli' tembo', timbuseng je'ne' nitongko'.

¹³ Anjorengi attimbo poko'-poko' delimaya, siagang rappo-rappoang kaminang nyamanga. Bunga pacara' siagang narwastu,

¹⁴ narwastu, kunyi', kayu te'ne siagang ta'bu, siagang sangka' rupa poko' kayu kamanynyang. Muru' siagang gaharu, siagang sangka' rupa rampa-rampa nipilea.

¹⁵ Timbuseng je'ne' ri kokongku appasuluki je'ne' a'lo'loroka battu ri Libanon!

Baine

¹⁶ Ambangungko, he anging battu waraka, battuko mae, he anging battu timboro'! Ammirikko ri kokongku, lappassammi a'rasa kabaukanna. Dasi-dasi nabattu tanringku mae ri kokonna, na nakanre rappo-rappo nyamanga.