AYUB 23 - KITTA' MATANGKASA'

Ayub

^1-2 Mingka appialimi Ayub angkana, “A'jalloka' siagang akkunrarenga' mae ri Allata'ala; takkulleai kutahang pa'risikku.

³ Ah, ka'de'ji nakuasseng kemae tampa' Napammantangngi, sollangku akkulle a'lampa, mange assibuntulu' siagang Ia.

⁴ Nakupamaemo ri dallekanNa parkaraku, assulu' ngasemmi kana-kana mappatojengku.

⁵ Erokka' angngassengi angkana apa laNakana, siagang antekamma bateNa lappiali.

⁶ Maka laNapakei koasaNa mae ri nakke? Tena! Mattantu laNapilangngeri kana-kanangku.

⁷ Tena kusala, siagang akkullei kupattojeng kalengku ri dallekanNa, jari lanilappassanga' sa'genna satunggu-tungguna.

^8-9 Kuboyai Allata'ala, iraya, lau', timboro', wara', mingka kemae-kemae tenai Allata'ala; na tena kukkulle anggappai.

¹⁰ Mingka Naassengi sikontu jappaku kammayatompa tunggala' dakkaku. Punna sanrapanga' bulaeng kuniuji, la'nyatami angkana ti'noki pa'maikku.

¹¹ Majarreka' mannuruki mae ri Ia; tena kule'ba' ammengka battu ri oloang Napattantua.

¹² Sikamma parentaNa tuli kuturuki, Kupinawangi ero'Na, teai ero' kalengku.

¹³ Anjo Allata'ala tena pamminraNa; tena akkulle angngewai. Nagaukangi apa Nakaerokia.

¹⁴ LaNapajappai rancanaNa mae ri nakke, na jai iji rancanaNa pantaranganna anjo.

¹⁵ Lanri mallakku ri Ia, nakuannekkere'mo; pila' kunawa-nawana ngaseng anjo kammaya, pila' malla'ma'.

^16-17 Naancuru' ngasengi Kaminang Koasaya sikontu kabaraniangku. Mallaka' lanri Allata'ala, teai lanri sassang makkapuna, manna pole natammulilia' anjo sassanga, siagang pole natongko' rupangku.”