AYUB 16 - KITTA' MATANGKASA'

Ayub

^1-2 Mingka appialimi Ayub angkana, “A'mole-molemi kulangngere' panggappa kammaya; panynyaleorinnu poro passessaji.

³ Angngapapi nupammari ngasengi anjo bicara kosonnu? Apa ampakalompoi nyawanu untu' appiali?

⁴ Ebara' angkana ikau ngaseng antu inakke, nampa inakke a'jari ikau ngaseng, akkulle tonja' a'bicara kamma anjo. Kupitambungiangko bicara; lakupammenggong-menggongi ulungku.

⁵ Lakupakajarreki pa'mai'nu siagang siapa are pappitangara'; kana-kanangku lassareko panynyaleori.

⁶ Punna kua'bicara, tena nanaung pa'risikku; punna a'merekia', apa todong matu-matunna?

⁷ Namangngangngia' Allata'ala; sikontu kaluargaku Napaccappu'mi.

⁸ Nabalianga' siagang Najakkalaka'. Anne kamma roso' dudumi kalengku, na nakana taua iaminjo butti ma'nassana angkana inakke dorakama'.

⁹ Lalang larro duduNa Nakekke'-kekkeki Allata'ala tubuku; birisi' sikali ancinikia'.

¹⁰ Tassungke lompoi bawana taua ancau-caua'; naborongia' siagang natempa ka'rang pilisikku.

¹¹ Napassareanga' Allata'ala mae ri tau dorakaya; Natu'guranga' antama' ri limanna tau kodi sipaka.

¹² Sumpaeng amangi na salewangang tallasakku, mingka ti'ring nibakkaia' ri Allata'ala. Nata'galaki kacikorokku nampa Napatunrung ri buttaya; Napa'jaria' tampa' untu' latihang.

¹³ Tena pangngamaseanNa natulusu' inakke Napana, sa'genna assulu' parrukku.

¹⁴ Nabakkaia' sangkamma pejuang, Nalokokia' a'mole-mole.

¹⁵ Ammakea' karung tanra si'na, na kummempo ri au lanri nibeta.

¹⁶ Eja rupangku lanri angngarru'; akkambang na gau' tompo' matangku.

¹⁷ Mingka takugaukang katerassang; pammate ci'nonna pappala' doangku ri Batara.

¹⁸ He buttaya, teako cokkoi ri nakke kaja'dallanga; teako pammakkangngi pakkiokku appala' kaadelang.

¹⁹ Kuasseng Mappatojengku nia' ri suruga; a'jari sa'bi ri tenana kudoraka.

²⁰ Kunicau-cau siagang nikakkali ri bela-belaku; angngarruka' andallekang ri Allata'ala appala' bantuang.

²¹ Oh, dasi-dasi na Allata'ala KalenNa ampattojenga' ri dallekanNa sanrapang tau rella ampattojengi sahaba'na.

²² Tenamo siapa tassesa taung-taung tallasakku; sinampe' mami ku'lampa, kutammoteramo.