1 PATTOTTORANG 13 - KITTA' MATANGKASA'

Nipaletteki Patti Parjanjianga battu ri Kiryat-Yearim

¹ A'bicarami Daud siagang sikontu perwira ammimpinga 1.000 tau jaina siagang perwira-perwira ammimpinga 100 tau jaina.

² Nakanamo mae ri yangasenna ke'nanga, “Punna situju ngasengko, siagang Nakellai Batara, Allata'alata, baji'mi nanissuro tau mange ri sikamma imanga siagang sikamma tu Lewia ri desa-desana ke'nanga, kammayatompa sikontu bansata maraenganga, nanikio' ngaseng ke'nanga a'rappungang siagang ikatte anrinni.

³ Nampa a'lampaki' mange angngallei Patti ParjanjianNa Allata'ala, ia nibalang parekanga lalang ammarentana Karaeng Saul.”

⁴ Sikontu tu Israel niaka a'rappungang sannang ngasengi siagang situju ngasengi mae ri anjo pitunju'na Daud.

⁵ Jari napa'rappungammi Daud sikontu ra'ya' niaka ri sikontu pa'rasangang, appakkaramula ri pa'baeng-baenna Mesir bageang timboro' sa'genna ri Agang Hamat ri bageang wara', untu' mange angngallei anjo Patti Parjanjianga battu ri Kiryat-Yearim nampa naerang mange ri Yerusalem.

⁶ A'lampami Daud siagang ke'nanga mange ri kota Baala, iamintu Kiryat-Yearim, ri daera suku Yehuda, untu' angngallei Patti ParjanjianNa Allata'ala. Anjo pattia niarengi “Batara makoasaya irateanna malaeka' akka'nyika”.

⁷ Battuna ke'nanga mange ri Baala, naallemi ke'nanga anjo Patti Parjanjianga battu ri balla'na Abinadab, nampa napanai' ri se'reang kareta beru. Uza siagang Ahyo anrurungangi anjo pattia,

⁸ na Daud siagang sikontu bansa Israel a'joge'-joge'mi siagang akkelong-kelommi siagang lompo sumanga', untu' ampakala'biriki Allata'ala, narurungang kacapi, rebana simbala', siagang tarompe'.

⁹ Ri wattunna anrapi' ke'nanga ri tampa' panggilingang gandunna tu Kidon, tatto'romi anjo sapi-sapi angngerangai anjo pattia. Jari nata'gala'mi Uza anjo Patti Parjanjianga sollanna tena natu'guru'.

^10-11 Anjo wattua larromi Batara ri Uza, lanri anjo panggaukang kammaya nahinai Batara. Jari Nabunomi Uza anjoreng. Jari appakkaramula anjo wattua anjo tampaka niaremmi “Peres-Uza”. Larromi Daud lanri Nabunoi Batara anjo Uza.

¹² Mingka malla' tongi Daud ri Allata'ala na nakana, “Kamma-kammanne antekammami lakkulle kuerang anjo Patti Parjanjianga?”

¹³ Lanri kammana tanjariami naerang Daud anjo Pattia mange ri Yerusalem. Mingka naboli'mi ri balla'na Obed-Edom, tu Gat.

¹⁴ Ammantammi anjoreng anjo pattia tallum bulang sallona. Na nibarakkakimo ri Batara kaluargana Obed-Edom siagang sikontu apa nakammaia.