तितस 3 - माझीअसल काम गरइकर लागि उत्साह 1 सासकको र सरकारि हाकिमको अधिननाइ बसइ, आग्याकारि हकइ र हरेक मजार काम गरइलाइ तयार हकइ बाजिके उछिराइ मान्छेल्काइ सम्जाखन। 2 होल्किन कुनुल्को बदनाम जुनगर्दिखन, झगडा जुनगर्दिखन, तर सेब्बाइ मान्छेल्कोसिन नम्र र मिल्नाराइ हक्दिखन। 3 किनारइभने हाइ पुनि एक पल्ट मुर्ख, अट्टेरि, भुलनाइ पर्लाइ, बइमजार सोचबिचार र मोज-मस्तिनाइ फस्लाइ, रिस र डाहनाइ दिन बिताइनार गर्तेले। आनेल्किन हाइलाइ घिर्ना गर्तेला र हाइ पुनि आनेल्काइ घिर्ना गर्तेले। 4 तर हाम्रो मुक्तिदाता परमेसोरिन दया र मया मान्छेल्काइ देखाइले, 5 ह्य ता हाइनिन गर्ल धार्मिक कामबान हक्ल बया, तर होक्र किर्पा अन्सार होइनिन हाइलाइ बाचाइले। पबित्र आत्माकर सक्तिन हाम्रो पाप धोइकइ नयाँ जन्म दिले र नयाँ जिबन सुरु हकल्ते। 6 परमेसोरिन ह्व पबित्र आत्मा हाम्रो मुक्तिदाता येसु खिरिस्टबान हाइलाइ पर्सस्त दिले। 7 इनिखे परमेसोरकर अनुगरहन धर्मि ठहरिकइ हाइ अजम्बरि जिबनकर आसा धर्नाराइ हकवाला बनइ सकु। 8 ह्य कुरो साँच्चि हो। परमेसोरनाइ बिस्वास गर्नाराइ सेब्बाल्किन होसियारिसाथ असल काम गरो बाजिके तुइनिन जोड दिल मुइ चाइछु। किनारइभने ह्य कुरो मान्छेल्को लागि मजार र फाइदा आछि। 9 तर मुर्ख कुरो, बङ्सावलिकर कुरो, परमेसोरकर नियम सम्बन्धि बाद-बिबाद र झगडाबान बद्दुर बस। किनारइभने ह्व काम बइलाग्नार र बेर्थेकर कुरो हो। 10 झगडा गर्नार मानुसलाइ चाइ एक-दुइ चोटि सम्जाइ। उनिखे गर्तिन पुनि बइमान्ले भने ह्वसिन कुनइ सम्बन्ध बइधरइ। 11 किनारइभने इन्खा मानुस ता भरस्ट र पापि हो। अनि आफ्ने पापिन होलाइ दोसि ठहराइछि। अन्तिम सल्ला 12 मुइ अर्तिमास वा तुखिकसलाइ तुइ हक्लनाइ पाठाइनारआछु, तुइ मुइलाइ भेट्टाइ निकोपोलिस सहरनाइ सक्लसम्म आइनार कोसिस गर। किनारइभने जाडोभरि मुइ उछि बस्नार पक्का गर्लाछु। 13 वकिल जेनास र अपोल्लोसलाइ यात्रानाइ सक्लसम्म सयोग गरइ र होल्काइ केइ कुरोकर खाँचो जुनपर्दिक। 14 हाम्राइ मान्छेल्किन एकदम खाँचोनाइ पर्लाल्काइ सयोग गरिके असल काम गरइ सिक्दिखन। अनि होलत काम लाग्नाराइ मान्छेलत हक्दिखन। 15 इछि मुइसिन हक्लाइ सेब्बाल्किन तुइलाइ सेवाढोग पाठाइलाछत। उछि हाइलाइ मया गर्नाराइ बिस्वासिल्काइ हाम्रो सेवाढोग बल्देइ। परमेसोरकर अनुगरह तोरा सेब्बाल्कोसिन हक्दिक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.