तितस 2 - माझीसाँचो सिछ्या 1 तुइनिन चाइ साँचो सिछ्यानाइ हक्ल कुरो सिकाइनार गर। 2 बुर्राल्काइ आफिन आफिलाइ अधिननाइ धर्नार, गम्भिर, समझदार, बिस्वास, मया र धइरेनाइ पक्का हकइलाइ सिकाखन। 3 उनिखे ने बुर्रिल्को बानि-बेबहार परमेसोरलाइ मन पर्नार हकइ पर्छइ। होल्किन आनेल्काइ बिना कामनाइ दोस बइलाइनाराइ र मातिकइ बइहिन्नाराइ हकइपर्छइ। जे असल आछि होइ कुरो होल्किन सिकाइदिखन। 4 होल्किन बास्नि बेटिकाइ आफ्ने साहेक र बेटाक-बेटेककाइ मया गरइ, 5 आफिन आफिलाइ अधिननाइ धर्नार, सुद्द मनकर हकइ, दयालु, घरबार चालाइ सक्नार र आफ्ने साहेककर अधिननाइ बसइ बाजिके सिकाइदिखन। इन्खा गर्ला भने परमेसोरकर बचनकर बदनाम हक्नार बइने। 6 उनिखे ने गब्रु अडेकाइ पुनि आफिन आफिलाइ अधिननाइ धर्नार सिछ्या सिकाखन। 7 तुइनिन सेब्बे कुरोनाइ असल कामकर नमुना हकिके आफिलाइ देखाउ र तोर सिछ्यानाइ इमान्दार, गम्भिर 8 र कुन्नुल्किन निन्दा गरइ बइसक्नार ठिक कुरो हक्दिक, ता कि हाम्रो सतुरलत केइ बाजइ नसकिकइ आफि लाजनाइ पर्नारआछत। 9 नोकरकाइ पुनि आफ्ने मालिकको अधिननाइ बसिके सेब्बे कामनाइ होल्काइ खुसि पार्नार आदेस दिखन, र आफ्ने मालिककोसिन मुखमुखे जुनलागो बाजिके सिकाखन। 10 होल्किन जुनचोराइदिखन, तर सेब्बे कुरोनाइ इमान्दार र बिस्वासयोग्य हक्दिखन। इनिखे होल्किन सेब्बे कुरोनाइ हाम्रो मुक्तिदाता परमेसोरकर बारेनाइ सिकाइनार सिछ्यालाइ आदर गर्दिखन। 11 किनारइभने सेब्बाइ मान्छेल्काइ मुक्ति देइकर लागि परमेसोरिन अनुगरह देखाइलाछ। 12 ह्य अनुगरहन हाइलाइ परमेसोरलाइ मन बइपर्नार जिबन र सन्सारिक लोब त्यागइ लाइछइ, र आफिन आफिलाइ अधिननाइ धरिके ह्य सन्सारनाइ सोजो र धर्मि जिबन बिताइ सिकाइछइ। 13 इनिखे ने हाइनिन आसा धर्ल कुरो पुरा हक्नार दिनकर बाट हेर्छे। ह्व दिन हाम्रो महान परमेसोर र मुक्तिदाता येसु खिरिस्टकर बड्खो आदर हक्ल देखइ पाइनारआछे। 14 खिरिस्टनिन हाम्रो सेब्बे पापबान हाइलाइ छुट्कारा देइकर लागि आफ्ने परान दिले। होइनिन आफ्ने लागि हाइलाइ सुद्द पारिके आफ्ने मान्छे बानाइले र असल काम गरइ जोसिलो मन दिले। 15 तुइनिन ह्य सिछ्या दितिन पुरा अधिकारसहित अर्ति-उपदेस दिखन र हप्काखन। कुन्नुल्किन पुनि तुइलाइ हेला जुनगर्दिखन। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.