तितस 1 - माझी1 परमेसोरकर दास र येसु खिरिस्टकर पेरित मुइ पावलकर तर्फबान सेवाढोग। परमेसोरिन छान्लाइ मान्छेल्काइ बिस्वासनाइ बल्-ल्यो बानाइलाइ र परमेसोरलाइ मन पर्नार जिबन किनिखे बिताइनार बाजिके सत्यकर ग्यान सिकाइलाइ होइनिन मुइलाइ छानिकइ पाठाइलाछ। 2 ह्य सत्यकर ग्यानिन अजम्बरि जिबनकर आसा दिछइ, अनि कइले झुट बइबाज्नार परमेसोरिन धर्ति सिस्टि गरइ भन्दा अगाडि ने ह्य अजम्बरि जिबनकर पर्तिग्या गर्ल रइल। 3 परमेसोरिन ठिक समयनाइ आफ्ने सुसमचार देखाइलाछ। हाइलाइ मुक्ति दिनार परमेसोरकर आग्या अन्सार ह्य सुसमचार सुनाइनार जिम्मा मुइलाइ दिलाछ। 4 मुइसिन एउटे बिस्वासनाइ हक्ल मोर साँचो बेटाक तितसलाइ ह्य चिठ्ठि लेख्तिनआछु। परमेसोर ब्वा र हाइलाइ मुक्ति दिनार खिरिस्ट येसुबान तुइलाइ अनुगरह र सान्ति हक्दिक। केरेटनाइ तितसकर काम 5 मुइनिन तुइलाइ बाकि हक्ल काम पुरा गरइ केरेटनाइ छाड्ल हो। मुइनिन तुइलाइ आराइल अन्सार हरेक सहरनाइ मन्डलिकर एल्डरलत छानइ। 6 एल्डर निर्दोस, एउटि मात्र बोहेक हक्ल, र होक्र बेटाक-बेटेकलत पुनि असल, इमान्दार र बिस्वासि हकइपर्छइ। 7 किनारइभने परमेसोरकर काम गर्नार हक्ल हुदान अगुवा चाइ निर्दोस हकइपर्छइ। ह्व झट्टइ बइरिसाइनार, मातिकइ बइहिन्नार, झगडा बइगर्नार, र धनकर लोब बइगर्नार हकइपर्छइ। 8 बुरु ह्व पाउनाल्को सेवा सत्कार गर्नार, भलाइ गर्नार, आफिन आफिलाइ अधिननाइ धर्नार, इमान्दार, पबित्र र अनुसासित हकइपर्छइ। 9 आफिन पाइल साँचो सिछ्यानाइ इस्थिर हकइ पर्छइ, र होइनिन आनेल्काइ पुनि ह्व साँचो सिछ्याबान उत्साह देइ सक्दिक। ह्व सिछ्याकर बिरोद गर्नारकाइ पुनि गल्ति देखाइ सक्नार हकइपर्छइ। 10 किनारइभने धेराइ मान्छेलत आनेल्को अधिननाइ बइबस्नाराइ, बेर्थेकर कुरो गर्नाराइ र झुक्काइनाराइ हक्छत, हेलत मद्दे खतना गरइ पर्छइ बाज्नाराइ झन इन्खाए हक्छत। 11 होल्को मुख बन्द पारइपर्छइ, किनारइभने होल्किन आफ्ने फाइदाकर लागि नचाइदो सिछ्या सिकाइकइ सेब्बे घर-परिवारलाइ बिगारि धर्लाछत। इन्खा सिछ्या होल्किन सिकाइ बइहक्नाल्ति। 12 होलत मद्देकर एउटो अगमबक्तान इत्तिके बाज्लाछ, “केरेटकराइ मान्छेलत सदइ झुट बाज्नाराइ, दुस्ट पसुलत जिन्खाए र अल्छि घिचुवालत हक्छत।” 13 ह्य कुरो सत्य हो। होइहुदान होल्काइ ब्यासिकिन हप्काखन, ताकि होलत बिस्वासनाइ बल्-ल्यो हक्दिखन। 14 होल्किन यहुदिल्को दन्त्य कथा जुनसुन्दिखन र सत्यलाइ इन्कार गर्नाराइ मान्छेल्को आग्या जुनमान्दिखन। 15 सुद्द मन हक्लाल्काइ सेब्बे थोक सुद्द ने हक्छि, तर असुद्द र बिस्वास बइगर्नारकाइ चाइ केइ पुनि सुद्द बइहकि। किनारइभने होल्को मन र बिबेक बिग्रिसक्ल हक्छि। 16 होल्किन परमेसोरलाइ चिन्लाछे बाजिके दाबि ता गर्छत, तर होल्किन आफ्ने कामबाटेन चाइ परमेसोरलाइ इन्कार गरि धर्लाइ हक्छत। होलत घिनलाग्दाइ र अट्टेरि हक्छत, र कुनइ असल काम गरइ योग्यकराइ बइहकत। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.