पेरित 9 - माझीसाउलकर जिबन परिबर्तन हक्ल ( पेरित २२:६-१६ ; २६:१-१८ ) 1 साउल पर्भुकर चेलाल्को बिरुद्दनाइ अजइ पुनि मार्नार धम्कि दितिन हिनिधर्ल रइल। साउल पर्धान पुजारिकर उछि जाइके, 2 दमस्कसनाइ हक्लाइ पर्भुकर बाटनाइ लाग्लाइ अडे-बेटि सेब्बाल्काइ आठाइके यरुसलेमनाइ आनइ पाउ बाजिके साउलिन दमस्कसकर सभाघरकराइ सासककाइ देखाइलाइ अधिकार पत्र माङ्ले। 3 जब साउल दमस्कस सहरदिस हिन्ले, तब सहर नजिके पुग्तिन एक्कासि स्वर्गबान एकदम उज्यालो जोति होक्र वरिपोरि चम्कल्ते। 4 साउल भुइनाइ लड्ले र होइनिन इन्खा बाज्ल आवाज सुन्ले, “साउल, ए साउल, तुइ मुइलाइ किनारइ सताइछस?” 5 साउलिन बाज्ले, “पर्भु, तुइ कुन हो?” अनि होइनिन बाज्ले, “मुइ येसु हो, जुनलाइ तुइ सताइ धर्लाछस। 6 अब उठिके सहरनाइ जा, र तुइनिन केति गरइ पर्नार हो ह्व तुइलाइ बल्नारआछ।” 7 साउलसिन जाइनाराइ मान्छेल्किन आवाज ता सुन्ला तर कुनुल्काइ बइदेख्तिन ट्वाल्ल परिके ठडाइधर्ला। 8 साउल भुइबान उठ्ले र आँखि खोल्तिन होइनिन केइ पुनि देखइ बइसक्ले। होइहुदान होइसिन हक्लाल्किन होलाइ डोराइकइ दमस्कससम्म आन्ला। 9 उछिका साउलिन तिन दिनसम्म आँखि बइदेख्ले, केइ बइखाइले र केइ पुनि बइपिले। 10 दमस्कसनाइ हननिया नाउँ हक्ल एउटो येसुकर चेला रइल। होलाइ पर्भुन दर्सननाइ बलल्ते, “ए हननिया।” हननियान बाज्ले, “केति।” 11 पर्भुन बलल्ते, “उठिके सिदा नाउँकर गल्लिनाइ जा र उछिका यहुदाकर घरनाइ टार्ससबान आइल साउललाइ हेरि, होइनिन पार्थना गरिधर्लाछ। 12 होइनिन दर्सननाइ आँखि देखइ सक्दिक बाजिके हननिया नाउँकर मानुसिन आफि उप्रान हात धर्ल देख्लाछ।” 13 तर हननियान बाज्ले, “हे पर्भु, ह्व मानुसिन यरुसलेमनाइ हक्लाइ तोर जनकाइ एकदम सताइल कुरो मुइनिन धेराल्कोबान सुन्लाछु। 14 इछि पुनि तोर नाउँ लिनाराइ सेब्बाल्काइ पक्रिनार अधिकार मुख्य पुजारिल्कोबान पाइके आइलाछ।” 15 तर पर्भुन हननियालाइ बलल्ते, “तुइ जा, किनारइभने होलाइ मोर सेवा गरइलाइ छान्लाछु, र होइनिन आने जातिल्काइ, राजाल्काइ र इज्राएलिल्काइ मोर नाउँ पर्चार गर्नारआछ। 16 र होइनिन मोर लागि कत्ता दुख भोगइपर्छि, ह्व मुइ होलाइ देखाइनारआछु।” 17 अनि हननिया जाइके यहुदाकर घरभित्र पस्ले र साउल उप्रान आफ्ने हात धर्तिन बाज्ले, “मोर भाइ साउल, तुइ इछि आइतिन बाटनाइ देख्ल पर्भु येसुन ने तुइनिन फेरि देखइ सक र पबित्र आत्मान भरिपुर्न हक बाजिके मुइलाइ पाठाइल हो।” 18 हननियान ह्य कुरो बाज्लेसात साउलकर आँखिबान माछकर कत्लाठि खसल्ते। र ह्व फेरि देख्नार हक्ले, अनि ह्व उठिके बप्तिस्मा लिले, 19 र केइ खाइनार कुरो खाइल पछि होक्र तागत आल्ते। साउल केइ दिनसम्म दमस्कसनाइ पर्भुकराइ चेलाल्कोसिन बस्ले। साउलिन दमस्कसनाइ पर्चार गर्ल 20 अनि साउल तुरुन्तइ सभाघरनाइ पसिके “पर्भु येसु ने परमेसोरकर बेटाक हो” बाजिके पर्चार गरइ लाग्ले। 21 होक्र कुरो सुन्नाराइ सेब्बाइ छक्क पर्तिन बाज्ला, “यरुसलेमनाइ येसुकर नाउँ लिनाराइ जति सेब्बाल्काइ सिद्याइ हेर्नार मानुस हेइ बया र? इछि पुनि येसुराइ चेलाल्काइ आठाइके मुख्य पुजारिल्को उछि लाकाइ बाजिके आइल बया र?” 22 तर साउल झन सक्तिसालि हक्तिन पर्चार गरइ लाग्ले, र येसु ने खिरिस्ट हो बाजिके इन्खा पक्का पर्मान दिल्याक कि दमस्कसनाइ हक्लाइ यहुदिल्किन केइ पुनि जबाफ देइ बइसक्ला। 23 धेरइ समय बित्ल पछि यहुदिलत जम्मा हक्ला र साउललाइ मार्नार सडेन्तर गर्ला। 24 तर आफिलाइ मारइ हेर्ल कुरो साउलिन था पाइले। होल्किन साउललाइ मारइलाइ रात-दिन दमस्कस सहरकर ढोका-ढोकानाइ ढुकिकइ बस्तेला। 25 तर होक्र चेलाल्किन राति साउललाइ डालोनाइ हालिके सहरकर पर्खालबान झारिकइ भागाइ दिल्याक। साउल यरुसलेम सहरनाइ 26 साउल यरुसलेम फर्किलपछि चेलाल्कोसिन मिलइ हेर्ले। तर होल्किन साउल पर्भुकर साँचो चेला हो बाजिके बइपत्याइल हुदान होलत साउलसिन डाराइला। 27 तर बारनाबासिन साउललाइ आफिसगिन पेरितकोनाइ लाकाल्ते। किनिखे साउलिन बाटनाइ पर्भुलाइ देखल्ते र पर्भु होइसिन कुरो गर्ले अनि किनिखे होइनिन दमस्कसनाइ येसुकर नाउँनाइ नडाराइकइ पर्चार गर्ले, ह्य सेब्बे कुरो बारनाबासिन होल्काइ सुनाइदिल्याक। 28 होइहुदान साउल होल्कोसिन बस्ले, र यरुसलेमभरि नडाराइकइ पर्भुकर बारेनाइ पर्चार गर्ले। 29 साउल गिरिक भासा बाज्नाराइ यहुदिल्कोसिन पुनि बाद-बिबाद गर्तेल। तर होल्किन साउललाइ मारइ हेर्तेला। 30 ह्य कुरो था पाइके चेलाल्किन साउललाइ कइसरिया सहरनाइ लाकाइला र उछ्यान टार्ससनाइ पाठाइला। 31 इनिखे सारा यहुदियानाइ, गालिलनाइ र सामरियानाइ हक्ल सेब्बे मन्डलिनाइ सान्ति हकल्ते। पर्भुकराइ चेलालत पबित्र आत्माबान साहस पाइके मन्डलि बाढ्तिन जाल्ते। चेलालत परमेसोरकर डर मान्तेला र मान्छेल्को सङ्ख्या थपितिन जाल्ते। पत्रुस लुड्डा र योप्पानाइ 32 पत्रुस हेथउने-होथउने सेब्बेदिस यात्रा गर्तिन लुड्डानाइ हक्लाइ पर्भुकराइ जनलत हक्लनाइ पुनि पुग्ले। 33 उछिका पत्रुसिन एनियास नाउँ गर्ल मानुसलाइ भेट्टाल्ते। ह्व पछ्यघात रोगिन गर्तिन आठ बर्सदेखि ओछ्यानबान उठइ सक्ल बइरइल। 34 पत्रुसिन होलाइ बलल्ते, “ए एनियास, येसु खिरिस्टिन तुइलाइ बिसेक पार्स्यास। उठिके आफ्ने ओछ्यान मिलाउ।” एनियास तुरुन्तइ उठिहाल्ले। 35 होलाइ बिसेक हक्ल देखिके लुड्डा र सारोननाइ बस्लाइ सेब्बाइ मान्छेल्किन पर्भुलाइ बिस्वास गर्ला। 36 योप्पा सहरनाइ तबिता नाउँ हक्लि पर्भुलाइ बिस्वास गर्नारि बेटि रइलि। गिरिक भासानाइ होलाइ डोरकास बल्तेला। हेइनिन जइले पुनि आनेल्काइ भलाइ गर्तेलि र गरिबकाइ सायता गर्तेलि। 37 पत्रुस लुड्डानाइ हक्तिन ह्व बिरामि हकिके मर्लि र मान्छेल्किन होक्र लासलाइ न्वाइदिकइ घरकर उपल्चो तालाकर एउटो कोठानाइ धर्ला। 38 लुड्डा योप्पा नजिके रल्ति। चेलाल्किन पत्रुस उछि आछ बाजिके था पाइला र दुइटाल्काइ पत्रुस हक्लनाइ इन्खा बलिके पाठाइल्याक, “दया गरिके हाइ हक्लनाइ चाने आबे।” 39 ह्य सुन्लपछि पत्रुस उठिके होल्कोसिन जाइले। उछि पुग्लपछि होल्किन पत्रुसलाइ उपल्चो तालाकर कोठानाइ लाकाइला। बिद्दुइलत चाइ पत्रुसकर वरिपोरि ठडाइके कान्तिन तबितान बानाइदिल लुगालत देखाइला। 40 पत्रुसिन होल्काइ कोठाबान बाइर पाठाइल्याक र घोडा टेकिके पार्थना गर्ले। अनि पत्रुसिन लासदिस फर्किके बाज्ले, “ए तबिता, उठ!” होइनिन आँखि खोल्तिन पत्रुसलाइ देख्लि र उठिके बस्लि। 41 पत्रुसिन होक्र हात आठाइके उठाल्ते अनि पर्भुकराइ जनकाइ र बिद्दुइकाइ बालाइके तबिता मर्लबान जिउँते हक्लि हो बाजिके देखाइदिल्याक। 42 ह्य कुरो योप्पा सहरभोरि फइलिल्ते र धेराल्किन पर्भुनाइ बिस्वास गर्ला। 43 अनि पत्रुस धेरइ दिन छालाकर काम गर्नार सिमोनसिन योप्पानाइ बस्ले। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.