पेरित 28 - माझीपावल माल्टानाइ 1 हाइ सकुसल छेउ लाग्लपछि ह्व टापुकर नाउँ माल्टा रल्तिसइ बाजिके हाइनिन था पाइले। 2 उछिराइ मान्छेल्किन हाइलाइ धेरइ दया देखाइला। ह्व बेला पानि परिके जाडाइल हुदान होल्किन आगि जिगाइके हाइलाइ तापइ बालाइला। 3 पावलिन एक आँगालो झिक्राझिक्रि काठि बट्लिकइ आन्ले र आगिनाइ हाल्ले। आगिकर तातोन गर्तिन एउटो बिखालु सापा निस्किले, र होक्र हातनाइ ठुँगिकइ बटारिले। 4 उछिराइ मान्छेल्किन पावलकर हातनाइ सापा बटारिल देखिके आपसनाइ इन्खा बाजइ लाग्ला, “ह्य मानुस पक्कइ पुनि ज्यानमारा हकइपर्छइ। समुन्द्रबान ता बाचिकइ निस्किले तर दन्डबान उम्कइ बइसक्ले।” 5 तर पावलिन आफ्ने हात झटार्तिन सापा आगिनाइ पर्ले, र पावललाइ केइ पुनि हानि बइहकल्ते। 6 उछिराइ मान्छेल्किन “अब पावल सुन्निनारआछ, कि एक्कासि ढलिकइ मर्नारआछ” बाजिके होल्किन हेरिधर्लाइ रइला। तर धेरेबेर अस्याइतिन पुनि होलाइ केइ बइहक्ल देखिके होल्किन आफ्ने बिचार बद्लिकइ बाजइ लाग्ला, “ह्य ता देउता पो रइलसइ।” 7 ह्व टापुका पब्लियस नाउँ हक्ल मुखियाकर जग्गा-जमिन ह्व ठउँकर नजिके रल्ति। होइनिन हाइलाइ आफ्ने घरनाइ स्वागत गर्ले, र हाइ तिन दिनसम्म होक्र घरनाइ पाउना हकिके बस्ले। 8 ह्व बेला पब्लियसकर ब्वाक जोरो र रकतमासि परिके बिरामि हक्ल रइल। पावल पब्लियसकर ब्वाककर कोठानाइ जाइके होक्र लागि पार्थना गरिके आफ्ने हात ह्व उप्रान धर्ले र ह्व बिसेक हक्ले। 9 ह्य घटना था पाइके ह्व टापुकराइ आने बिरामिलत पुनि आइला र बिसेक हक्ला। 10 होल्किन धेरे तरिकान हाम्रो आदर गर्ला। जब हाइ जहाजनाइ चड्ले तब होल्किन हाइलाइ चाइनार जत्ता सामानलत जहाजनाइ हाल्दिला। रोमकर यात्रा 11 तिन महिनापछि हाइ अलेक्जेन्डिरियाकर जहाजनाइ चड्ले। ह्य जहाज हिउँदभरि हेइ टापुनाइ रल्ति। जहाजकर अगाडि ज्याउले देउताकर मुर्ति बानाइल रल्ति। 12 हाइ सुराकुसाइ बल्ल सहरनाइ पुग्ले र उछि तिन दिनसम्म बस्ले। 13 उछ्यान हिन्लपछि हाइ रेगियन बल्ल सहरनाइ आइपुग्ले। अर्को दिन दछिनबान बातास चलल्ते, र पर्सिपल्ट हाइ पटिओलि बल्ल सहरनाइ आइपुग्ले। 14 उछि हाइनिन केइ बिस्वासि दाजि-भाइकाइ भेट्टाइले। होल्किन हाइलाइ सात दिनसम्म बसइलाइ बिन्ति गर्ला। होल्कोसिन सात दिन बस्लपछि हाइ रोम सहरदिस जाइले। 15 रोमका हक्लाइ बिस्वासि दाजि-भाइकिन हाइ आइतिन आछे बल्ल कुरो सुनिके हाइलाइ भेट्टाइ अप्पियस बजार र तिन-पाटि बल्ल बजारसम्म आइलाइ रइला। हेल्काइ देखिके पावलिन साहस पाइले, र परमेसोरलाइ धन्नेबाद दिल्ते। पावल रोमनाइ 16 जब हाइ रोमनाइ आइपुग्ले, तब पावललाइ एउटो सिपाइकर रेखदेखनाइ आफि पइसा तिरिकइ एउटो घरनाइ बस्नार अनुमति मिलल्ते। 17 तिन दिनपछि पावलिन उछिराइ यहुदिल्को अगुवाल्काइ बालाइल्याक। होलत जम्मा हक्लपछि पावलिन बल्-ल्याक, “दाजि-भाइ हो, मुइनिन ता हाम्रो जाति र हाम्रो पुर्खादेखि चल्तिन आइल रितिथितिकर बिरुद्दनाइ केइ काम बइगर्तिन पुनि यहुदि दाजि-भाइकिन मुइलाइ यरुसलेमनाइ आठाइके रोमिल्को जिम्मानाइ सुम्पिदिला। 18 होल्किन छानबिन गर्लपछि मुइलाइ मिर्त्यु दन्ड दिनार केइ दोस बइभेट्टाइतिन छाड्दिनार मन गर्लाइ रइला। 19 तर यहुदि अगुवाल्किन मोर बिरोद गरिके छाडइ बइदिल हुदान कइसर हक्लनाइ बिन्ति गरइ मुइलाइ करे लाग्ले। मोर आफ्ने यहुदि दाजि-भाइको बिरुद्दनाइ दोस लाइपर्नार कुनइ कुरो बइरल्ति। 20 होइहुदान तोराल्काइ भेट्टाइके ह्य कुरो गरइकर लागि मुइनिन बालाइल हो। किनारइभने हाइ इज्राएलिल्किन आसा धर्ल मुक्ति दिनार राजाकर लागि मुइ ह्य साङ्लान बाधिलाछु।” 21 होल्किन पावललाइ बल्ला, “हाइनिन तोर बारेनाइ यहुदियाबान कुनइ पत्र पाइलाइ बइने। अनि कुनइ दाजि-भाइकिन आइके तोर बिरुद्दनाइ केइ बइमजार कुरो बाज्लाइ वा सुनाइलाइ पुनि बइने। 22 तर तोर बिचार केति हो, ह्व हाइ तुइबान सुनइ चाइछे। किनारइभने तोर समुहकर बारेनाइ जताततइ मान्छेल्किन बिरोद गर्ल मात्र हाइलाइ था आछ।” 23 ह्व पछि होल्किन पावलकर कुरो सुनइलाइ एक दिन तोक्ला, अनि ह्व दिननाइ धेराइ मान्छेलत पावल बस्ल घरनाइ आइला। पावलिन ब्यानसिन बेल्कासम्म परमेसोरकर राज्यकर बारेनाइ सिछ्या दिल्याक। होइनिन मोसान लेख्ल परमेसोरकर नियम र अगमबक्ताल्किन लेख्ल किताबबान लिके येसुकर बारेनाइ बुजाइतिन होल्काइ बिस्वासनाइ आन्नार कोसिस गर्ले। 24 होइनिन बाज्ल कुरोनाइ कत्ताल्किन बुजिकइ बिस्वास गर्ला, तर कत्ताल्किन चाइ बइगर्ला। 25 होलत आफि-आफिनाइ असहमत हक्ला, र बिदा हकिके जाइलाग्तिन पावलिन होल्काइ इनिखे बल्-ल्याक, “तोराल्को पुर्खाल्काइ यसइया अगमबक्ता मार्फत पबित्र आत्मान बल्ल बचन ठिके रल्ति, 26 ‘ह्य मान्छेल्कोनाइ जाइके बल्खन, “तोरा सुनइ ता सुन्छो, तर कइले बइबुजो, हेरइ ता हेर्छो, तर कइले बइदेखो। 27 किनारइभने ह्य मान्छेल्को हिर्दय कठोर हक्लइस्याक, र हेल्को कान बइरा हक्लइस्याक, अनि हेल्किन आफ्ने आँखि बन्द गर्लाछत, नत्र ता हेल्किन आँखिन देख्नाला, कानिन सुन्नाला, हिर्दयन बुज्नाला, र मुइदिस फर्किनाला, अनि मुइ हेल्काइ बिसेक पार्नानाइ।”’ 28 “होइहुदान तोराल्काइ था हक्दिक कि परमेसोरिन ह्य मुक्ति आने जातिल्कोनाइ पाठाइलाछ, र होल्किन ह्य सुन्नारआछत।” 29 [पावलिन ह्य कुरो बाजिसक्ल पछि यहुदिलत आफि-आफिनाइ बाद-बिबाद गर्तिन बिदा हक्ला] 30 पावल पुरा दुइ बर्ससम्म आफ्ने खर्चन रोमनाइ बस्ले, र आफिलाइ भेट्टाइ आइनाराइ सेब्बाल्काइ होइनिन स्वागत गर्तेल। 31 होइनिन नडाराइकइ खुल्लमखुल्ला परमेसोरकर राज्यकर पर्चार गर्तिन पर्भु येसु खिरिस्टकर बारेनाइ सिकाइतेल, र कुन्नुल्किन पुनि होलाइ बइरोक्तेला। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.