पेरित 24 - माझीयहुदिल्किन पावललाइ दोस लाइलाइ 1 पाँच दिनपछि पर्धान पुजारि हननियान केइ यहुदि अगुवाल्काइ र तर्तुल्लस नाउँकर एउटो वकिललाइ लिके कइसरियानाइ आइले। होल्किन बडा-हाकिम हक्लनाइ पावलकर बिरुद्द उजुर गर्ला। 2 पावललाइ बडा-हाकिमकर अगाडि आन्लपछि तर्तुल्लसिन होक्र बिरुद्दनाइ इन्खा दोस लाइतिन बाज्ले, “माननिय फेलिक्स, तुइबान हाइनिन लामो समयसिन सुख-सान्ति पाइधर्लाछे, र हाम्रो देसकर भलाइकर लागि तुइनिन हकइ पर्नार सुधारकर काम गर्दिलाछस। 3 ह्य कुरो हाइ सदइ र सेब्बे ठउँनाइ सुइकार गर्छे र मनदेखि ने धन्नेबाद दिछे। 4 तर मुइ तोर धेरइ समय बइलिउ, हाम्रो बिन्ति छोटकरिनाइ बल्छु दया गरिके सुन्देउ। 5 हाइनिन ह्य मानुसलाइ जताततइ दुख दितिन हिन्नार, सन्सारभरिकराइ सेब्बाइ यहुदिल्को माजनाइ आन्दोलन गराइनार भेट्टाइले र नासरि समुहकर मुख्य अगुवा पुनि हो। 6 हेइनिन मन्दिर अपबित्र पारइ हेर्ल रइल, तर हाइनिन ह्यलाइ आठाइले। [हाइनिन ह्यलाइ हाम्रो बेबस्था अन्सार कारबाहि गर्नार बिचार गर्लाइ रइले। 7 तर सेनापति लुसियस आइके होलाइ जबरजस्ति हाइबान खोसिकइ लाकाल्ते, 8 र हाइलाइ तुइ हक्लनाइ उजुर गरइ बाजिके आग्या दिले।] अब तुइ आफिन ह्यलाइ छानबिन गर्लइ भने हाइनिन उजुर गर्ल सेब्बे कुरो हेइबान था पाइनार आछस।” 9 आने यहुदिल्किन पुनि ह्य कुरो सेब्बे ठिक हो बाजिके सहमति जनाइला। फेलिक्सकर अगाडि पावलकर बयान 10 बडा-हाकिमिन हातकर इसारान पावललाइ बाज्नार आग्या दिलपछि पावलिन बाज्ले, “तुइ धेरइ बर्ससिन यहुदिल्को न्यायधिस हक्ल कुरो मुइलाइ था आछ। होइहुदान तोर अगाडि आफ्ने बचाउकर लागि बयान देइ मुइलाइ खुसि लाग्लाछ। 11 मुइ यरुसलेमनाइ परमेसोरकर आराधना गरइ जाइल बार दिनभन्दा बढ्ता हक्ल बइने। ह्य कुरो तुइनिन सजिले पत्ता लाइ सक्छस। 12 हेल्किन मुइलाइ न ता कुनइ मान्छेल्कोसिन मन्दिरनाइ बहस गर्ल देख्ला, न ता सभाघरनाइ वा सहरनाइ मान्छेल्काइ उस्काइधर्ल भेट्टाइला, 13 न ता हेल्किन अखन मुइलाइ लाइधर्ल दोसकर पर्मान देइ सक्छत। 14 तर ह्य कुरो मुइ तोर अगाडि ने सुइकार गर्छु, जुन्टो मुक्ति पाइनार बाटलाइ हेल्किन झुटो बाज्छत, होइ अन्सार मोसान लेख्ल परमेसोरकर नियम र अगमबक्ताल्किन लेख्ल किताबकर सेब्बे कुरो बिस्वास गर्छु, अनि मुइ हाम्रो पुर्खाल्किन मान्तिन आइल परमेसोरकर आराधना गर्छु। 15 हेलत जिन्खाए मुइ पुनि परमेसोरिन धर्मि र अधर्मि सेब्बाल्काइ मर्लबान जिउँते पार्छइ बाजिके आस गर्छु। 16 होइहुदान मानुस र परमेसोरकर अगाडि मुइ सदइ आफ्ने बिबेकलाइ सुद्द धर्नार कोसिस गर्छु। 17 “धेरइ बर्स पछि मुइ आफ्ने जातिल्काइ सयोग भेटि पुराइ र परमेसोरलाइ बलि चाराइ यरुसलेम आइल रइनाइ। 18 हेल्किन मुइलाइ मन्दिरनाइ भेट्टाइतिन सुद्द हक्नार बिधि मुइनिन पुरा गरिसक्ल रइनाइ। उछिका न ता कुनइ भिड रल्ति न ता कुनइ होहल्ला ने रल्ति। 19 तर उछिका एसिया छेत्रबान आइलाइ केइ यहुदिलत रइला। यदि मोर बिरुद्दनाइ होल्को केइ कुरो हक्लासिन होल्किन ने तुइ हक्लनाइ आइके उजुर गरइ पर्नार रल्ति। 20 कि त इछि हक्लाइ मान्छेल्किन मुइ यहुदिल्को महासभाकर अगाडि ठडाइतिन मोर केइ दोस भेट्टाइलाछत भने हेल्किन बाज्दिखन। 21 होल्किन एउटो कुरोनाइ मात्र दोस लाइ सक्छत, मुइनिन हेइ कुरो होल्को माजनाइ ठडाइके बड्खो सोरिन साराइकइ बाज्ल रइनाइ, ‘मर्लाइ मानुसलत फेरि जिउँते हक्छत बल्ल कुरोनाइ मुइनिन बिस्वास गर्ल हुदान इछि मोर मुद्दा चलिधर्लाछि।’” 22 फेलिक्सलाइ मुक्ति दिनार बाटकर बारेनाइ मजसिन था रल्ति। होइहुदान होइनिन “सेनापति लुसियस इछि आइलपछि मुइ तोराल्को मुद्दा फइसला गर्दिनारआछु।” बाजिके बयान रोक्ले। 23 अनि फेलिक्सिन एउटो कप्तानलाइ बालाइके आग्या दितिन बलल्ते, “पावललाइ मजसिन रेखदेख गरइ र अलि खुल्ला छाड्देइ, र पावललाइ आबस्यक पर्ल सर-सामान पुराइ आइनाराइ साथेकख्यानकाइ बइरोकइ।” फेलिक्स र दुर्सिल्लाकर अगाडि पावल 24 केइ दिनपछि फेलिक्स आफ्ने यहुदि बोहेक दुर्सिल्लालाइ लिके आइले। होइनिन पावललाइ बालाइके खिरिस्ट येसुलाइ बिस्वास गर्नार बारेनाइ पावलबान सुन्ले। 25 तर पावलिन परमेसोरकर धार्मिक आग्या मानिके काम गरइपर्छइ, आफ्ने मनलाइ बसनाइ धरइपर्छइ र परमेसोरिन न्याय गर्नार दिन आइतिन आछि बल्ल कुरो सुनिके फेलिक्सिन आत्तितिन बाज्ले, “अखनलाइ जा, मउका मिल्ल बेलानाइ तुइलाइ फेरि बालाइछु।” 26 फेलिक्सिन पावलबान कतइ घुस पाइछु कि बाजिके आस पुनि गर्ल रइल। होइहुदान होइनिन पावललाइ घरि-घरि बालाइके कुरो गर्नार गर्तेल। 27 तर दुइ बर्सपछि फेलिक्सकर ठउँनाइ पर्किअस फेस्तस आइले। फेलिक्सिन यहुदिल्काइ खुसि पारइकर लागि पावललाइ झ्यालखन्डनाइ ने धरिके जाइले। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.