पेरित 18 - माझीपावल कोरिन्थनाइ 1 ह्व पछि पावल एथेन्सबान बिदा हकिके कोरिन्थनाइ जाइले। 2 उछिका पावलिन अकिलास नाउँ गर्ल एउटो यहुदिलाइ भेट्टाइले। ह्व पोन्टसकर रइल र आफ्ने बोहेक पिरिस्किलासिन भखरे इटालिया देसबान आइल रइल, किनारइभने रोमि सम्राट कलउडियसिन सेब्बाइ यहुदिल्काइ रोमबान निस्कि जाइनार आग्या दिल रइल। पावल होल्काइ भेट्टाइ जाइले, 3 र ह्व होल्कोसिन बसिके काम गर्ले, किनारइभने पावलकर पुनि होल्को जिन्खाए पाल बानाइनार काम रल्ति। 4 पावल हरेक बिस्राम-दिननाइ यहुदिल्को सभाघरनाइ जाइके यहुदि र गिरिककोसिन बाद-बिबाद गर्तेल र होल्काइ बुजाइनार कोसिस गर्तेल। 5 सिलास र तिमोथि माकेडोनियाबान आइपुग्लपछि पावल बचन पर्चार गर्नार कामनाइ मात्र बेस्त हक्ले, र यहुदिल्काइ येसु ने खिरिस्ट हो बाजिके साछि दिल्याक। 6 तर होल्किन पावलकर बिरोद गरिके अपमान गर्ला। पावलिन होल्काइ चेतावनि देइलाइ आफ्ने लुगाकर धुलो टकटकाइतिन बल्-ल्याक, “तोरा नास हक्तिन पुनि आफ्ने दोसकर कारनिन नास हक्छो, मुइलाइ दोस लाग्नार बइने। अबसिन मुइ आने जातिल्कोनाइ पर्चार गरइ जाइनार आछु।” 7 तब पावल यहुदिल्को सभाघरबान निस्किके परमेसोरकर आराधना गर्नार तितस युस्तस नाउँ गर्ल मानुसकर घरनाइ जाइले। होक्र घर सभाघर छेउनाइ रल्ति। 8 सभाघरकर सासक किरिस्पस र होक्र सेब्बाइ परिवारकिन पर्भुनाइ बिस्वास गर्ला, र कोरिन्थकराइ आने धेराइ मान्छेल्किन पुनि पावलकर पर्चार सुनिके बिस्वास गर्ला र बप्तिस्मा लिला। 9 एक रात दर्सननाइ पर्भुन पावललाइ बलल्ते, “जुनडाराउ, तर सुसमचार पर्चार गर्तिन जा र चुप लागिकइ जुनबस। 10 मुइ तुइसिन आछु र कुन्नुल्किन तुइलाइ आक्रमन गरिके हानि गरइ बइसकत, किनारइभने ह्य सहरनाइ मोर मान्छेलत धेराइ आछत।” 11 होइहुदान पावलिन एक बर्स छ महिनासम्म कोरिन्थनाइ बसिके होल्काइ परमेसोरकर बचन सिकाइल्याक। 12 जब गलियोन अखइया छेत्रकर सासक हक्ले, तब यहुदिलत एकजुट हकिके पावललाइ पक्रिला, र अदालतनाइ लाकाइके बाज्ला, 13 “ह्य मानुसिन हाम्रो नियमकर बिरुद्द परमेसोरकर आराधना गरइ मान्छेल्काइ सिकाइ धर्लाछ।” 14 जब पावल बाजइ आँट्ल रइल, तब गलियोनिन होल्काइ बल्-ल्याक, “ए यहुदिलत, यदि ह्य बइमजार काम अथवा बड्खो अपराधकर कुरो हक्ल हक्लान मुइनिन तोराल्को कुरो सुनिके न्याय गरइ ठिक हक्नाल्ति। 15 तर ह्य कुरो ता तोराल्के धर्मसास्तरकर नाउँलत, सब्दलत र नियमकर बारेनाइ मात्र हक्ल हुदान तोरा आफिन ने हेक्र न्याय गरो। मुइ ह्य कुरोकर चाइ न्याय बइगरु।” 16 अनि गलियोनिन होल्काइ अदालतबान निस्काइदिल्याक। 17 अनि होलत सेब्बाल्किन सभाघरकर सासक सोस्थेनेसलाइ आठाइके अदालतकर अगाडि ठाटाइला। तर गलियोनिन ह्य कुरोकर केइ वास्तइ बइगर्ले। पावल एन्टिओखिया सहरनाइ फर्किल 18 पावल धेरइ दिनसम्म बिस्वासि दाजि-भाइकोसिन कोरिन्थनाइ बस्ले। ह्व पछि बिदा हकिके किङ्किरियानाइ आइपुग्ले। होइसिन पिरिस्किला र अकिलास पुनि रइला। आफिन गर्ल भाकल पुरा गरइकर लागि किङ्किरियानाइ आफ्ने कापाल खउरिले र जहाजनाइ चडिके सिरिया जाइला। 19 होलत एफिसस सहरनाइ आइपुग्ला, अनि पावलिन पिरिस्किला र अकिलासलाइ उछिनइ छाड्ल्याक र आफिचाइ सभाघरनाइ पसिके यहुदिल्कोसिन बाद-बिबाद गरइ लाग्ले। 20 यहुदिल्किन पावललाइ अजइ केइ दिनसम्म बस्नार बिन्ति गर्तिन पुनि होइनिन बइमान्ले। 21 होल्कोसिन बिदा हक्तिन पावलिन बाज्ले, “यदि परमेसोरकर इछ्या हकल्ते भने मुइ फेरि तोराल्कोनाइ फर्किके आइनार आछु।” तब ह्व जहाज चडिके एफिससबान हिन्ले। 22 पावल कइसरियानाइ जहाजबान झर्ले र उछ्यान यरुसलेम जाइले। अनि उछिकर मन्डलिकराइ मान्छेल्कोसिन भेटघाट गर्लपछि एन्टिओखिया जाइले। 23 पावलिन एन्टिओखियानाइ केइ समय बिताइलपछि गलातिया र फिर्गियाकर इलाका हक्तिन ठउँ-ठउँनाइ जाइके सेब्बाइ पर्भुकर चेलाल्काइ बिस्वासनाइ बल्-ल्यो बानाइल्याक। अपोल्लोस एफिससनाइ 24 ह्व समयनाइ अपोल्लोस नाउँ गर्ल एउटो यहुदि एफिससनाइ आइले। ह्व अलेक्जेन्डिरिया सहरकर रइल। ह्व मजसिन बाजइ सक्नार र धर्मसास्तरकर बारेनाइ धेरइ ग्यान रल्ति। 25 होइनिन पर्भुकर बाटकर सिछ्या पाइल रइल, र आत्मानाइ जोसिलो हकिके येसुकर बारेनाइ सत्य कुरो सिकाइतेल। तर होलाइ युहन्नान दिल बप्तिस्मा मात्र था रल्ति। 26 होइनिन सभाघरनाइ जाइके ढुक्कसिन सिछ्या देइ लाग्ले। होक्र सिछ्या सुन्लपछि पिरिस्किला र अकिलासिन होलाइ आफ्ने घरनाइ लाकाइला र होल्किन अपोल्लोसलाइ परमेसोरकर बाटकर बारेनाइ अजइ मजसिन बुझाइदिल्याक। 27 ह्व पछि अपोल्लोस अखइया छेत्रनाइ जाइनार मन गर्ले, एफिससनाइ हक्लाइ पर्भुकराइ चेलाल्किन होलाइ उछि जाइकर लागि होउसला दिला। अनि उछिराइ बिस्वासिल्काइ अपोल्लोसलाइ स्वागत गरइ बाजिके एउटो पत्र पाठाइला। उछि पुग्ल पछि अपोल्लोसिन पर्भुकर अनुगरहन गर्तिन बिस्वासिल्काइ धेरइ सायता गर्ले। 28 किनारइभने होइनिन मान्छेल्को अगाडि यहुदिल्कोसिन बाद-बिबाद गर्तिन धर्मसास्तरबान येसु ने खिरिस्ट हो बलिके होल्काइ केइ जबाफ देइ बइसक्नार बानाइल्याक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.