पेरित 13 - माझीबारनाबास र साउललाइ पाठाइलाइ 1 एन्टिओखिया सहरकर मन्डलिनाइ अगमबक्तालत र सिछ्या दिनाराइ मान्छेलत रइला। होलत बारनाबास, काले बाज्नार सिमियोन, कुरेनिकर लुकियस, राजा हेरोदसिन हुर्किल मनेन अनि साउल रइला। 2 होल्किन उपबास बसिके पार्थना र पर्भुलाइ आराधना गरिधर्ल बेलानाइ पबित्र आत्मान होल्काइ बल्-ल्याक, “बारनाबास र साउललाइ मुइनिन जुन्टो कामकर लागि बालाइलाछु होइ कामकर लागि अलग गरो।” 3 तब होल्किन उपबास बसिके र पार्थना गरिके ह्व दुइटाइ उप्रान आफ्ने हात धरिके होल्काइ पाठाइल्याक। पावल साइपरसनाइ 4 बारनाबास र साउललाइ पबित्र आत्मान पाठाइल्याक र होलत सिलुकियानाइ पुग्ला अनि उछ्यान जहाज चडिके साइपरस टापुनाइ जाइला। 5 ह्व टापुकर सलामिस सहरनाइ पुग्लपछि होलत यहुदिल्को सभाघरभित्र पसिके परमेसोरकर बचन पर्चार गर्ला। होल्काइ सघाइलाइ मर्कुस बाज्नार युहन्ना पुनि होल्कोसिन रइल। 6 होलत साइपरस टापुकर एक छेउबान अर्को छेउकर पाफोस सहरनाइ पुग्ला। उछिका होल्किन यहुदि झुटो अगमबक्ता बार-येसु बाज्नार जादुगरलाइ भेट्टाइला। 7 ह्व जादुगर साइपरस टापुकर सासक सर्गियस पउलुससिन बस्तेल। सर्गियस पउलुस बुद्दिजिबि मानुस रइल। होइनिन बारनाबास र साउललाइ बालाइके परमेसोरकर बचन सुन्नार इछ्या गर्ले। 8 तर एलुमास जादुगरिन (गिरिक भासानाइ एलुमासकर अर्थ जादुगर हो) सर्गियस पउलुसलाइ बिस्वासबान फर्काइकर लागि बारनाबास र साउललाइ बिरोद गर्ले। 9 तर साउल (जुन्लाइ पावल पुनि बाज्छत) पबित्र आत्मान भरिपुर्न हकिके एलुमासलाइ एकडिस लाइके हेर्तिन बाज्ले, 10 “तुइ दियाबलसकर बेटाक, सेब्बे धार्मिकताकर सतुर, फटा र दुस्ट कुरोन भरिल। केति तुइ पर्भुकर सोजो बाटलाइ बाङ्गाइ कइले बइछाडस? 11 अब हेर, पर्भुकर सजाय तुइउप्रान पर्लाछि। तुइ अब अन्धा हकिके केइ समयसम्म घामकर उज्यालो देख्नार बइने।” उत्तिने खेर होक्र आँखिनाइ काड्डो बादलठि लागल्ते र ह्व अन्धा हकिहाल्ले अनि कुन्नुल्किन हातनाइ आठाइके डोराइछत कि बाजिके हेथउने-होथउने साहारा हेरइ लाग्ले। 12 अनि ह्य देखिके सर्गियस पउलुसिन पर्भुनाइ बिस्वास गर्ले, किनारइभने पर्भुकर बारेनाइ सिछ्या सुनिके ह्व छक्क पर्ल रइल। पिसिदियाकर एन्टिओखियानाइ 13 पावल र होक्र साथेकलत पाफोसबान जहाज चडिके पामफिलिया छेत्रकर पर्गानाइ पुग्ला। मर्कुस बाज्नार युहन्नाचाइ होल्काइ छाडिके यरुसलेम फर्किले। 14 तर पावल र बारनाबास चाइ पर्गाबान पिसिदिया छेत्रकर एन्टिओखिया सहरनाइ जाइला र बिस्राम-दिननाइ होलत सभाघरभित्र जाइके बस्ला। 15 मोसान लेख्ल परमेसोरकर नियम र अगमबक्ताल्किन लेख्ल किताबबान पढ्लपछि सभाघरकराइ सासककिन पावल र बारनाबासलाइ बालाइके बल्-ल्याक, “ए भाइलत, तोराल्कोसिन मान्छेल्काइ साहस दिनार केइ बचन आछ भने बाजो।” 16 तब पावल ठडाइके हातिन इसारा गर्तिन बाजइ लाग्ले, “हे इज्राएलि दाजि-भाइ र परमेसोरकर डर मान्नाराइ हो, मुइनिन बाज्ल सुनो, 17 इज्राएलि जातिकर परमेसोरिन हाम्रो पुर्खाल्काइ छान्ल्याक र मिस्र देसनाइ बिदेसि हकिके बस्तिन होल्काइ बड्खो जाति बानाइल्याक। परमेसोरिन आफ्ने बड्खो सक्तिन होल्काइ मिस्र देसबान निकालिके आन्ल्याक। 18 केइ बइहक्नार उजाड ठउँनाइ हक्तिन लगभग चालिस बर्ससम्म परमेसोरिन होल्को हेरचाह गर्ले। 19 अनि परमेसोरिन कनान देसकराइ सात जातिल्काइ नास पारिके ह्व देस हाम्रो पुर्खाल्काइ दिल्याक। 20 ह्व बेलासम्म लगभग चार सय पचास बर्स बितिसक्ल रल्ति। “ह्व पछि परमेसोरिन होल्को माजनाइ न्याय गरइलाइ न्यायकर्तालत खटाइले। ह्व न्यायकर्ताल्किन एउटो पछि अर्को गर्तिन अगमबक्ता समुएलकर पालोसम्म काम गर्ला। 21 ह्व पछि होल्किन राजाकर माग गर्ला अनि परमेसोरिन होल्काइ बेन्यामिन कुलकर किसकर बेटाक साउललाइ राजा बानाल्ते। साउलिन चालिस बर्ससम्म राज्य गर्ले। 22 पछि परमेसोरिन साउललाइ हटाइकइ दाउदलाइ राजा बानाल्ते। दाउदकर बारेनाइ परमेसोरिन साछि दितिन बाज्लाछ, ‘मुइनिन यिसइकर बेटाक दाउदलाइ मोर हिर्दय अन्सारकर मानुस पाइनाइ, होइनिन मोर सेब्बे इछ्या पुरा गर्नारआछ।’ 23 आफिन गर्ल पर्तिग्या पुरा गरिके परमेसोरिन इज्राएलिल्को लागि दाउद राजाकर सन्तानबान ने एउटो मुक्तिदाता पाठाइले, ह्व ने येसु हो। 24 येसुन आफ्ने सेवा सुरु गरइ भन्दा अगि बप्तिस्मा दिनार युहन्नान आ-आफ्ने पाप मानिलिके छाडो र पानिकर बप्तिस्मा लेओ बाजिके इज्राएलकराइ सेब्बाइ मान्छेल्काइ पर्चार गर्ले। 25 युहन्नान आफ्ने सेवाकर काम सक्नार बेलानाइ बाज्ल रइल, ‘तोराल्किन मुइलाइ कुन हो बाज्छो, मुइ तोराल्किन अस्याइल मुक्ति दिनार बया। ह्व मुइ भन्दा पछि आइतिन आछ, मुइ होक्र जुत्ताकर तुना फुकाइनार लायककर पुनि बइने।’ 26 “ए दाजि-भाइलत, चाहे अब्राहामकराइ सन्तान हक्दिखन, चाहे परमेसोरकर डर मान्नाराइ आने जाति हक्दिखन, ह्य मुक्तिकर सन्देस परमेसोरिन हाम्रे लागि पाठाइदिल हो। 27 किनारइभने यरुसलेमनाइ बस्नाराइ मान्छेल्किन र होल्को सासककिन येसुलाइ बइचिन्ला, र हरेक बिस्राम-दिननाइ अगमबक्ताल्किन लेख्ल बचन पढ्तिन पुनि नबुजिकइ येसुलाइ मिर्त्युदन्ड दिके ह्व बचन पुरा गर्ला। 28 मिर्त्युदन्ड दिनार कुनइ दोस बइभेट्टाइतिन पुनि होल्किन येसुलाइ मारइनइ पर्छइ बाजिके पिलातसिन बिन्ति गर्ला। 29 इत्तिके येसुकर बारेनाइ धर्मसास्तरनाइ लेख्ल सेब्बे कुरो पुरा गर्ल पछि होल्किन येसुलाइ कुरुसबान झारिकइ चिहाननाइ धर्ला। 30 तर परमेसोरिन येसुलाइ मर्लबान जिउँते पारल्ते। 31 गालिल छेत्रबान यरुसलेमसम्म येसुसिन आइलाल्कोनाइ येसु धेरे दिनसम्म देखा परिधर्ले, र अखन होलत ने इज्राएलकराइ मान्छेल्को लागि साछि आछत। 32 अब हाइ तोराल्काइ हेइ सुसमचार सुनाइछे, परमेसोरिन हाम्रो पुर्खाल्कोसिन गर्ल पर्तिग्या 33 परमेसोरिन होल्के सन्तानको लागि पुरा गर्लाछ। येसुलाइ मर्लबान जिउँते पारिके परमेसोरिन ह्य पर्तिग्या हाम्रे लागि पुरा गर्ल हो। ह्य कुरो भजनसङ्ग्रहकर किताबनाइ पुनि लेख्लाछि, ‘तुइ मोर बेटाक हो, आज मुइनिन तुइलाइ जन्माइलाछु।’ 34 परमेसोरिन खिरिस्टलाइ फेरि कइले मरइ बइपर्नार गरिके जिउँते पार्ल बिसयनाइ चाइ इन्खा बाज्लाछ, ‘मुइनिन दाउदसिन पर्तिग्या गर्ल पबित्र र सदइ हकिधर्नार आसिस, मुइ तोराल्काइ दिनारआछु।’ 35 भजनसङ्ग्रहकर अर्को ठउँनाइ होइनिन इन्खा बाज्लाछ, ‘तुइनिन आफ्ने पबित्र जनकर जिउँ सेराइ दिनार बइने।’ 36 ह्य कुरो दाउदिन आफ्ने बारेनाइ बाज्ल बया, किनारइभने होइनिन परमेसोरकर इछ्यानाइ काम गरिके मर्लपछि पुर्खाल्कोसिन गड्काइला, र होक्र जिउँ सेराइकइ जाल्ते। 37 तर परमेसोरिन जुन्लाइ मर्लबान जिउँते पारल्ते होक्र जिउचाइ बइसेराल्ते। 38 होइहुदान दाजि-भाइ हो, होइ येसुबान ने पापकर छेमा हक्छि बाजिके मुइ तोराल्काइ बल्छु। 39 मोसान लेख्ल परमेसोरकर नियमिन सेब्बाल्किन पापबान छुट्कारा पाइके परमेसोरकर नजरनाइ ठिक ठहरइ बइसकत, तर येसुनाइ बिस्वास गर्नाराइ सेब्बाल्किन पापबान छुट्कारा पाइके परमेसोरकर नजरनाइ ठिक ठहरिछत। 40 होइहुदान होसियार हको, नत्र ता अगमबक्ताल्किन बाज्ल ह्य कुरोलत तोरा उप्रान आइपर्नार आछि, 41 ‘हे गिल्ला गर्नाराइ हो, अचम्म मानो र नस्ट हकिजाओ, किनारइभने तोराल्को समयनाइ मुइ एउटो इन्खा काम गर्नारआछु। ह्व कामकर बारेनाइ कुन्नुल्किन तोराल्काइ बल्तिन पुनि तोराल्किन कइले बिस्वास गर्नाराइ बइने।’” 42 पावल र बारनाबास सभाघरबान निस्कइ आँट्तिन मान्छेल्किन “अर्को बिस्राम-दिननाइ आइके ह्य कुरोकर बारेनाइ हाइलाइ फेरि सुनाओ” बाजिके बिन्ति गर्ला। 43 सभा सक्किलपछि यहुदिलत र यहुदि धर्म मान्नाराइ आने जातिकराइ धेराइ मान्छेलत पावल र बारनाबासकर पछि लाग्ला। पावल र बारनाबासिन होल्कोसिन कुरो गर्तिन होल्काइ सदइ परमेसोरकर अनुगरहनाइ बसिधरइ बाजिके धेरे अनुरोध गर्ला। 44 अर्को बिस्राम-दिननाइ परमेसोरकर बचन सुनइकर लागि सहरकराइ लगभग सेब्बाइ मान्छेलत आइला। 45 मान्छेल्को बड्खो भिड देखिके यहुदिलत डाहन भरिके पावलिन बाज्ल कुरोकर बिरोद गर्तिन डाउनो गर्ला। 46 तर पावल र बारनाबासिन अजइ आँट गरिके बाज्ला, “परमेसोरकर बचन सबभन्दा पइला तोराल्काइ ने सुनाइ आबस्यक रल्ति, तर तोराल्किन इन्कार गर्लो र आफिलाइ अजम्बरि जिबन पाइबान अयोग्य बानाइलो। होइहुदान अब हाइ आने जातिल्कोनाइ जाइछे। 47 किनारइभने पर्भुन हाइलाइ इन्खा आग्या दिलाछ, ‘धर्तिकराइ सेब्बाइ मान्छेल्किन मुक्ति पाइदिखन बाजिके, मुइनिन तुइलाइ आने जातिल्को माजनाइ उज्यालो छरइलाइ छानिकइ पाठाइलाछु।’” 48 ह्य कुरो सुनिके आने जातिलत रामाइतिन परमेसोरकर बचनकर पर्सन्सा गरइ लाग्ला। अजम्बरि जिबनकर लागि छानिलाइ जत्ताल्किन येसुनाइ बिस्वास गर्ला। 49 परमेसोरकर बचन ह्व छेत्रकर सेब्बे पटि फइलिल्ते। 50 तर यहुदिल्किन परमेसोरकर डर मान्नाराइ मुख्य पद पाइलाइ बेटिल्काइ, र सहरकराइ मुख्य-मुख्य मान्छेल्काइ पावल र बारनाबासकर बिरोद गरइलाइ उस्काइल्याक र ह्व छेत्रबान बाइर फुकाल्दिल्याक। 51 तब पावल र बारनाबासिन ह्व मान्छेल्काइ परमेसोरिन ने न्याय गर्नारआछ बाजिके चेतावनि दितिन पइतलाकर धुलो टकटकाइला र आइकोनियन सहरनाइ जाइला। 52 तर एन्टिओखियानाइ हक्लाइ चेलालत चाइ आनन्द र पबित्र आत्मान भरिपुर्न हक्ला। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.