२ तिमोथि 4 - माझी1 मर्लाइ र जिउँताइ सेब्बाल्को न्याय गरइ आइनार खिरिस्ट येसु र परमेसोरकर अगाडि, अनि होक्र आगमन र राज्यलाइ ध्याननाइ धरिके मुइ तुइलाइ ह्य आग्या दिछु, 2 बचन पर्चार गर, हर समयनाइ बचन सुनाइ तयार हक, अर्ति दिखन, हप्काखन, उत्साह दिखन र धइरेसाथ सिछ्या सिकाखन। 3 किनारइभने इन्खा समय आइतिन आछि, मान्छेल्किन ठिक सिछ्या सुनइ छाड्नारआछत तर आफिलाइ मन पर्ल सिछ्या मात्र सुनइ चाइनारआछत र आफिलाइ मन पर्ल सिछ्यकलत थुपार्नारआछत। 4 अनि होल्किन सत्य कुरो सुनइ इन्कार गर्नारआछत र दन्त्य कथादिस मन लाइनारआछत। 5 तर तुइ चाइ सेब्बे कुरोनाइ होसियार हक। दुख भोग्नार गर, पर्चार गर्नार कामनाइ लागिधर र आफ्ने सेवाकर काम पुरा गर। 6 किनारइभने मुइनिन मोर जिबन बलिकर रुपनाइ दिसक्लाछु र मोर बिदा हक्नार बेला आइसक्लाछि। 7 मुइनिन असल लडाइ लड्लाछु। मुइनिन कुद्नार काम सिद्याइलाछु र बिस्वासलाइ जोगाइ धर्लाछु। 8 अब परमेसोरिन मोर लागि धार्मिकताकर मुकुट धर्दिलाछ, जुन ठिकसिन न्याय गर्नार पर्भुन ह्व दिन मुइलाइ दिनारआछ। मुइलाइ मात्र बया, तर ह्व आइछइ बाजिके अस्याइ धर्नाराइ सेब्बाल्काइ दिनारआछ। ब्यक्तिगत कुरो 9 सक्लसम्म मुइ हक्लनाइ चाने आइनार कोसिस गर। 10 किनारइभने डेमासिन सन्सारनाइ हक्ल थोकलाइ मया गरिके मुइलाइ छाडिके थेसलोनिकेनाइ जाइलाछ। केरेसेन्स गलातियानाइ र तितसचाइ दलमातियानाइ जाइलाछ। 11 लुका मात्र मुइसिन आछ। मर्कुसलाइ हेरिकइ आफिसगिन लिके आबे, किनारइभने होइनिन मोर सेवाकाइनाइ धेरे सायता गर्नारआछ। 12 तुखिकसलाइ चाइ मुइनिन एफिससनाइ पाठाइलाछु। 13 तुइ आइतिन तोर्आस सहरनाइ हक्ल कार्पसकर घरनाइ छाड्ल मोर लुगा, किताबलत र बिसेस गरि चर्मपत्रलत नबिर्सि लिके आबे। 14 तामाकर काम गर्नार अलेक्जेन्डरिन मुइलाइ धेरे खराबि गर्ले। पर्भुन होलाइ होक्र काम अन्सारकर बदला लिनारआछ। 15 तुइ पुनि ह्वसिन होसियार हकिके बस। किनारइभने होइनिन हाम्रो पर्चारकर एकदम बिरोद गर्छइ। 16 मोर पइलो मुद्दा चल्तिन कुन्नुल्किन मोर पछ्यनाइ बइबाज्ला, तर सेब्बाल्किन मुइलाइ छाड्ला। ह्य कुरोकर दोस होल्काइ जुनलाग्दिक। 17 तर पर्भु मोर साथनाइ हकिके आने जातिल्किन सुसमचार सुनइ सक्दिखन बाजिके पर्चार गरइकर लागि सक्ति दिले। अनि पर्भुन मुइलाइ सिहकर मुखबान बाचाइले। 18 पर्भुन मुइलाइ सेब्बे खराबिबान जोगाइनारआछ, र होक्र स्वर्गिय राज्यकर लागि मुइलाइ उद्दार गर्नारआछ। होक्र महिमा सदइभरि हकिधर्दिक। आमेन। अन्तिम सेवाढोग 19 पिरिस्किला र अकिलास अनि ओनेसिफरसकर परिवारलाइ मोर सेवाढोग बल्देइ। 20 इरास्तस कोरिन्थनाइ बस्लाछ, र तोरोफिमस बिरामि हक्ल हुदान मुइनिन होलाइ मिलेटसनाइ ने छाड्लाछिन। 21 सकभर जाडो आइ भन्दा अगाडि ने आइनार कोसिस गर। युबुलस, पुडेस, लिनस, कलउडिया र इछि हक्लाइ सेब्बाइ दाजि-भाइकिन पुनि तुइलाइ सेवाढोग पाठाइलाछत। 22 पर्भु तोर आत्मासिन हक्दिक। अनि होक्र अनुगरह तुइसिन हकिधर्दिक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.