२ तिमोथि 3 - माझीअन्त्यकर समय 1 अन्त्यकर दिननाइ दुखकर समय आइनारआछि बाजिके जानिधर। 2 किनारइभने ह्व बेला मान्छेलत आफिलाइ मात्र मया गर्नाराइ, पइसाकर लोब गर्नाराइ, घमन्डि, हठि, आनेल्को बदनाम गर्नाराइ, आमेक-ब्वाकिन बल्ल बइमान्नाराइ, बइगुनि, अपबित्र, 3 कुनुल्काइ मया बइगर्नाराइ, खुसि पारइ बइसक्नार, आनेल्को कुरो काट्नाराइ, छाडा, डरलाग्दाइ, असल कुरो मन बइपराइनाराइ, 4 बिस्वासघाति, उत्ताउलाइ, मुइ जिन्खाए कोइ बइनेत बाज्तिन हिन्नाराइ, परमेसोरलाइ भन्दा मोज-मस्तिलाइ मन पराइनाराइ, 5 र धर्मि हो बाजिके टोपल्नाराइ, तर परमेसोरकर सक्तिन गर्ल कामलाइ चाइ इन्कार गर्नाराइ हक्छत। इन्खा मान्छेल्कोसिन बद्दुर बस। 6 किनारइभने होलत मद्दे कत्ता चाइ घर-घरनाइ जाइके पापिन भरिलाइ र धेरे थरिकर खराब इछ्यान भरिलाइ कमजोर बेटिकाइ आफ्ने अधिननाइ पार्छत। 7 ह्य बेटिलत सिकइ ता सदइ सिक्छत, तर सत्य कुरो चाइ कइले बइजानत। 8 यान्नेस र याम्ब्रेसिन मोसाकर बिरोद गर्ल जिन्खाए ह्य मान्छेल्किन पुनि सत्य कुरोकर बिरोद गर्छत। इन्खा मान्छेल्को दिमाख भरस्ट र बिस्वास पुनि नक्कलि हक्स्याक। 9 तर हेलत धेरे टिकइ बइसकत, किनारइभने यान्नेस र याम्ब्रेसकर जिन्खाए हेल्किन गर्ल खराब काम सेब्बाल्किन देख्नारआछत। तिमोथिलाइ पावलकर आदेस 10 तर तुइनिन मोर सिछ्या, चालचलन, जिबनकर लछ्य, बिस्वास, धइरे, मया र इस्थिरता देख्लाछस। 11 एन्टिओखिया, आइकोनियन र लुस्त्रानाइ मुइनिन भोग्ल सतावट तुइलाइ मजसिन था रोइस्यास। तर पुनि पर्भुन मुइलाइ ह्व सेब्बे सतावटबान बाचाइले। 12 खिरिस्ट येसुनाइ धर्मि जिबन बिताइनार इछ्या गर्नाराइ सेब्बाइ सतावटनाइ पर्नाराइ ने आछत। 13 तर दुस्ट र ठगलत चाइ आनेल्काइ ठग्तिन र आफि पुनि ठगिकइ झन-झन दुस्ट हक्तिन जाइनारआछत। 14 तर तुइ चाइ आफिन सिक्ल र पक्का बिस्वास गर्ल कुरोनाइ लागिधर। ह्य कुरो तुइनिन कुनबान सिक्लाछस ह्व तुइलाइ था रोइस्यास। 15 तुइनिन स्यान्खोसिन ने पबित्र धर्मसास्तरकर बचन जान्लाछस। हेइ बचनिन खिरिस्ट येसुनाइ गर्ल बिस्वासबान मुक्ति पाइकर लागि तुइलाइ बुद्दि दिस्यास। 16 पबित्र धर्मसास्तरनाइ लेख्ल सेब्बे बचन परमेसोरकर अगुवाइनाइ लेखिल हो। ह्य सिकाइलाइ, अर्ति देइलाइ, सच्याइलाइ र धार्मिक जिबन बिताइकर लागि तालिम देइलाइ उपयोगि हक्छइ। 17 ताकि परमेसोरकर जन सेब्बे असल काम गरइ सक्नार हक्दिक बाजिके ने धर्मसास्तर दिल हो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.