२ तिमोथि 2 - माझीखिरिस्ट येसुकर असल सिपाइ 1 होइहुदान मोर प्यारो बेटाक तिमोथि, खिरिस्ट येसुनाइ हक्ल अनुगरहनाइ बलियो हक। 2 धेराइ मान्छेल्को साछिनाइ मुइबान तुइनिन जे कुरो सुन्लाछस, ह्व कुरो आनेल्काइ सिकाइ सक्नाराइ बिस्वासिलो मान्छेल्काइ जिम्मा दिखन। 3 खिरिस्ट येसुकर असल सिपाइ जिन्खाए हाइसिन दुख सइ तयार हक। 4 सेनाका भर्ति हक्ल सिपाइ कइले पुनि आने कामनाइ बइअल्ज, किनारइभने होक्र मननाइ आफिलाइ कामकर जिम्मा दिनार कप्तानलाइ खुसि पार्नार चाहना हक्छि। 5 खेलनाइ भाग लिनार खेलाडिन ह्व खेलकर नियम अन्सार बइखेल्ले भने होइनिन इनाम पाइ बइसक। 6 पसिना ब्वाइकइ काम गर्नार किसानिन ने फलकर पइलो भाग पाइपर्छि। 7 मुइनिन बल्ल कुरोनाइ बिचार गर, किनारइभने ह्य सेब्बे कुरो बुजइकर लागि पर्भुन ने तुइलाइ समजसक्ति दिनारआछ। 8 मर्लबान जिउँते हक्ल येसु खिरिस्टलाइ सम्जि, ह्व राजा दाउद बङ्सकर रइल। मुइनिन पर्चार गर्ल सुसमचार हेइ हो। 9 हेइ सुसमचार पर्चार गर्ल हुदान मुइ दुख भोगि धर्लाछु, र अपराधि जिन्खाए साङ्लान बाँदिलाछु। तर परमेसोरकर बचन ता साङ्लान बइबाँदि। 10 होइहुदान मुइ परमेसोरिन छान्लाइ मान्छेल्को लागि सेब्बे दुख सइछु। ताकि होल्किन पुनि खिरिस्ट येसुनाइ मुक्ति र अनन्त महिमा पाइ सक्दिखन। 11 ह्य कुरो सत्य हो, यदि हाइ खिरिस्ट सँगिन मर्लाछे भने, हाइ ह्वसिन ने जिउँते हक्नारआछे, 12 हाइनिन ह्वसिन दुख सइ सक्ले भने, हाइ ह्वसिन ने राज्य गर्नारआछे। हाइनिन होलाइ इन्कार गर्छे भने, होइनिन पुनि हाइलाइ इन्कार गर्नारआछ, 13 हाइ बिस्वासयोग्य बइहक्तिन पुनि, ह्व बिस्वासयोग्य हकिधर्छइ, किनारइभने होइनिन आफिलाइ इन्कार गरइ बइसक। परमेसोरकर असल सेबक 14 ह्य कुरो होल्काइ सम्जाइदिखन र सब्द-सब्दनाइ बाद-बिबाद बइगरइ बाजिके पर्भुकर अगाडि आराइ, ह्य कुरोन मजार बइगर। तर हेइनिन ता सुन्नाराइ मान्छेल्काइ पुनि बिगार्छइ। 15 नलाजाइकइ परमेसोरकर सत्य बचन अन्सार मजसिन काम गर्नार कामदार जिन्खाए आफिन आफिलाइ परमेसोरनाइ मनपर्दो बानाइकर लागि सक्लसम्म कोसिस गर। 16 परमेसोरलाइ आदर बइगर्नार बेर्थेकर कुरोलाइ त्याग, किनारइभने इन्खा कुरोन मान्छेल्काइ परमेसोरबान झन बद्दुर लाकाइछइ। 17 इन्खा सिछ्या कइले बिसेक बइहक्नार घाउ जिन्खाए फिजितिन जाइछि। हुमेनियस र फिलेतसकर सिछ्या पुनि उन्खाए हो। 18 होल्किन सत्य कुरोलाइ त्यागि सक्लाछत र पुनरुत्थान पइला ने हकिसक्लाछि बाजिके कत्ताल्को बिस्वास ने खलबलाइ दिल्याक। 19 तर परमेसोरिन धर्ल सत्यकर जग सदइ दरो हकिधर्छि। र होनाइ इन्खा छाप लाइलाछि, “पर्भुन आफ्ने मान्छेल्काइ चिन्छइ” अनि “पर्भुकर नाउँ लिनाराइ सेब्बाइ खराब कामबान बद्दुर बस्दिखन।” 20 एउटो बड्खो घरनाइ सुन र चाँदिर मात्र भाडा बइहकि, उछिका काठ र माटिकर भाडा पुनि हक्छि। ह्व भाडालत मद्दे कोइ आदरकर कामनाइ चालाइछत भने कोइचाइ अनादरकर कामनाइ चालाइछत। 21 यदि कुनइ मानुसिन खराब कामलाइ छाडिके ह्वबान बद्दुर बस्छइ भने ह्व आदरकर कामनाइ चालाइनार भाडा जिन्खाए हक्नारआछ। र घरकर मालिककर लागि चोखो, असल र मन पर्नार भाडा हक्नारआछ। 22 इन्खाए ने छोडारि हक्तिन आइनार बइमजार कुरोलाइ छाड, र सुद्द मनिन पर्भुकर नाउँ लिनारकोसिन धार्मिकता, बिस्वास, मया र सान्तिनाइ हिन। 23 तर तुइ मुर्ख र बिना कामकर बाद-बिबादबान बद्दुरे बस। तुइलाइ था रोइस्यास, इन्खा कुरोन झगडा मात्र हक्छि। 24 पर्भुकर सेबक झगडा गर्नार हकइ बइहक। तर सेब्बाल्कोसिन मिल्नार, मजसिन सिकाइ सक्नार, सेब्बे कुरो सइ सक्नार, 25 र आफ्ने बिरोदिकाइ नम्र हकिके सम्जाइ सक्नार हकइ पर्छइ। इन्खा गर्लइ भने परमेसोरिन होल्काइ आफ्ने पाप मानिलिनार र सत्यलाइ बुज्नार मन हाल्दिस्याक हुदो। 26 अनि होल्को होस आइल पछि दियाबलसकर बन्धनबान उम्किनार आछत। किनारइभने दियाबलसिन होल्काइ आफ्ने इछ्या पुरा गरइलाइ बन्धननाइ धर्लाछ। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.