२ तिमोथि 1 - माझी1-2 मोर प्यारो बेटाक जिन्खाए तिमोथिलाइ मुइ पावलकर तर्फबान सेवाढोग। परमेसोरकर इछ्यान खिरिस्ट येसुनाइ हक्ल जिबनकर पर्तिग्या सुनाइलाइ मुइ पावल खिरिस्ट येसुकर पेरित हक्ल हो। परमेसोर ब्वा र खिरिस्ट येसु हाम्रो पर्भुबान तुइलाइ अनुगरह, किर्पा र सान्ति हक्दिक। बिस्वासयोग्य हकिधरइलाइ होउसला 3 मुइ सदइ पार्थना गर्तिन तुइलाइ सम्जिकइ परमेसोरलाइ धन्नेबाद दिछिन, र मोर पुर्खाल्किन परमेसोरकर सेवा गर्लठि सुद्द बिबेकिन मुइ होक्र सेवा गर्छु। 4 तोर आँसु सम्जितिन तुइलाइ भेट्टाइनार मोर धेरे इछ्या आछ। तुइलाइ भेट्टाइ पाइनाइ भने मुइ धेरे खुसि हक्नानाइ। 5 मुइ तोर साँचो बिस्वासलाइ सम्जिछु। ह्व बिस्वास पइला तोरि बुडेर लोइस र आमेर युनिसनाइ रल्ति। मुइ ढुक्क आछु, ह्व बिस्वास तुइनाइ पुनि आछि। 6 होइहुदान मुइ तुइलाइ याद गराइछु, मुइनिन तुइउप्रान हात धर्तिन तुइनिन पाइल परमेसोरकर बरदानलाइ चालाइ धर। 7 किनारइभने परमेसोरिन हाइलाइ डरकर आत्मा बया, तर सक्ति, मया र आफिन आफिलाइ अधिननाइ धर्नार आत्मा दिलाछ। 8 होइहुदान हाम्रो पर्भुकर साछि देइलाइ र मुइ कइदि हक्लनाइ लाजउनो जुनमान, बुरु परमेसोरकर सक्तिनाइ सुसमचारकर लागि दुख भोगइलाइ तुइ पुनि तयार हक। 9 परमेसोरिन हाइलाइ उद्दार गरिके आफ्ने पबित्र जन हकइलाइ बालाइले। ह्य हाइनिन गर्ल कामिन बया, तर होक्र आफ्ने उदेस्य र अनुगरहन हो, परमेसोरिन ह्य अनुगरह सिस्टि हकइ भन्दा अगाडि ने खिरिस्ट येसुबान हाइलाइ दिल रइल। 10 ह्य अनुगरह अखन हाम्रो मुक्तिदाता खिरिस्ट येसु आइलपछि देखाइलाछ। होइनिन ने मिर्त्युकर सक्तिलाइ नास गर्ले र सुसमचारबान अजम्बरि जिबन देखाइले। 11 हेइ सुसमचार सुनाइकर लागि परमेसोरिन मुइलाइ पर्चारक, पेरित र सिछ्यक हकइलाइ छान्ले। 12 होइहुदान मुइ ह्य कुरोनाइ दुख भोग्लाछु। तर मुइ बइलाजाउ, किनारइभने मुइनिन कुनलाइ बिस्वास गर्लाछु, ह्व मुइलाइ था आछ। मुइनिन परमेसोरलाइ जुन्टो कुरोकर जिम्मा लाइलाछु, ह्व आफ्ने आइनार दिनसम्म सुरछित धर्नारआछ बाजिके मुइ ढुक्क आछु। 13 खिरिस्ट येसुनाइ हक्ल बिस्वास र मयानाइ तुइनिन मुइबान सिक्ल सत्य बचन अन्सार हिनिके उदारन बन। 14 तुइलाइ जिम्मा लाइल सत्य बचनलाइ हाइनाइ बस्नार पबित्र आत्माकर सक्तिन सुरछित धर। 15 तुइलाइ था रोइस्यास, कि एसियानाइ हक्नाराइ सेब्बाइ मुइबान छुट्टिकइ जाइला, होलत मद्दे फुगेलस र हर्मोगेनस हो। 16 पर्भुन ओनेसिफरसकर परिवारलाइ किर्पा गर्दिक, किनारइभने होइनिन मुइलाइ धेरे फेरा भेट्टाइके होउसला दिले, र मुइ झ्यालखन्डनाइ हक्तिन पुनि ह्व बइलाजाइले। 17 बुरु ह्व रोमनाइ आइलेसात धुइधुइति हेरिकइ मुइलाइ भेट्टाइले। 18 पर्भुकर आगमननाइ पर्भुन होलाइ अनुगरह गर्दिक। एफिससनाइ हक्तिन होइनिन मुइलाइ धेरे कुरोनाइ सायता गर्ल तुइलाइ मजसिन था रोइस्यास। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.