२ थेसलोनिकि 3 - माझीपार्थनाकर लागि अनुरोध 1 अन्तिमनाइ दाजि-भाइ हो, हाम्रो लागि पार्थना गर्देउबे, ता कि पर्भुकर सुसमचार चारेपटि चाने फिजिदिक र तोराल्किन जिन्खाए सेब्बाल्किन आदर गर्दिखन। 2 अनि परमेसोरिन हाइलाइ खराब र दुस्ट मान्छेल्कोबान बाचाइल हक्दिक, किनारइभने सेब्बाइ मान्छेल्किन सुसमचारनाइ बिस्वास बइगरत। 3 तर पर्भु बिस्वासयोग्य आछ, होइनिन तोराल्काइ दरो बानाइनार आछ र दुस्टबान बाचाइनार आछ। 4 हाइनिन तोराल्काइ गर्ल आग्या अन्सार हिनिधर्लाछो र हिन्नारआछो बाजिके हाइ पर्भुनाइ भर पर्लाछे। 5 पर्भुन तोराल्को हिर्दयलाइ परमेसोरकर मया र खिरिस्टकर धइरेदिस डोराइदिक। अल्छिलाइ चेतावनि 6 दाजि-भाइ हो, हाम्रो पर्भु येसु खिरिस्टकर नाउँनाइ हाइ तोराल्काइ आग्या दिछे, कि हाइनिन दिल सिछ्यानाइ बइहिन्नाराइ र अल्छिल्कोबान बद्दुर बसो। 7 किनारइभने हाइनिन गर्ल जिन्खाए तोराल्किन पुनि गरइपर्छइ बाजिके तोराल्काइ था रोइस्या। हाइ तोराल्कोसिन बस्तिन कइले अल्छि हकिके बइबस्ले। 8 हाइनिन कुनुल्को केइ पुनि सिथ्याइनाइ बइखाइले। तोरा कुनुल्काइ भार जुनहक्दिक बाजिके हाइ रात-दिन खटिकइ काम गर्ले। 9 हाइलाइ तोराल्कोसिन सयोग माङ्नार अधिकार ता रल्ति, तर हाम्रो जिबन तोराल्को लागि एउटो नमुना बन्दिक बाजिके हाइनिन इन्खा गर्ले। 10 हाइ तोराल्कोसिन हक्तिन इन्खा आग्या दिलाइ रइले, “कुन्नुल्किन काम बइगरत भने होइनिन खाइनार कुरो पुनि जुनखाइदिक।” 11 किनारइभने तोरा मद्दे कत्ता अल्छि हकिके बसिधर्लाछो। अनि आफिचाइ केइ काम बइगरो तर आनेल्को कामनाइ हात हाल्छो बाजिके हाइनिन सुन्लाछे। 12 अब इन्खा मान्छेल्काइ हाइ पर्भु येसु खिरिस्टकर नाउँनाइ आग्या र अनुरोध गर्छे, कि होल्किन चुपचाप आफ्ने काम गर्दिखन र आफ्ने जिबिका आफि चालाइदिखन। 13 दाजि-भाइ हो, तोरा चाइ भलाइ गरइ कइले जुनथाको। 14 हाइनिन ह्य पत्रनाइ लेख्ल कुरो यदि कुन्नुल्किन पालन बइगरत भने, होलाइ चिनिधरो र ह्वसिन केइ सम्बन्ध जुनधरो। इन्खा गर्लो भने ह्व लाजनाइ पर्नारआछ। 15 तापुनि होलाइ सतुर जिन्खाए जुनसम्जो, तर आफ्ने भाइ जिन्खाए सम्जिकइ चेतावनि देओ। अन्तिम अभिबादन 16 अब सान्ति दिनार पर्भु आफिन हरेक तरिकान तोराल्काइ सदइ सान्ति दिल हक्दिक। अनि पर्भु सदइ तोराल्कोसिन हकिधर्दिक। 17 मुइ पावल आफ्ने हातिन ह्य अभिबादन लेख्तिनआछु। मुइनिन सेब्बे चिठ्ठि इत्तिके ने लेख्लाछु। मुइ इन्खाए लेख्छु। 18 हाम्रो पर्भु येसु खिरिस्टकर अनुगरह तोरा सेब्बाल्कोसिन हकिधर्दिक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.