२ थेसलोनिकि 2 - माझीपाप गर्नार मानुस 1 दाजि-भाइ हो, हाम्रो पर्भु येसु खिरिस्टकर आगमनकर बारेनाइ र हाइ होलाइ भेट्टाइ एकसाथ जम्मा हक्नार बारेनाइ हाइ तोराल्काइ बिन्ति गर्छे कि, 2 कुनइ अगमबानि वा बचन वा पत्रन पर्भुकर दिन आइसक्लाछि बाज्ले भने, ह्व हाइबान आइल हो बाजिके तोरा जुनआत्तिओ र जुनडाराओ। 3 तोराल्काइ कुन्नुल्किन पुनि कुनइ तरिकान जुनझुक्याइदिखन। किनारइभने परमेसोरकर बड्खो बिरोद नहकुन्जेलसम्म पाप गर्नार मानुस वा नास हकइ पर्नार मानुस देखा नपरुन्जेलसम्म ह्व दिन आइनार बइने। 4 होइनिन आफिलाइ उप्र बानाइके मान्छेल्किन परमेसोर बाजिके पुजा गर्ल सेब्बे थोककर बिरोद गर्नारआछ र आफिलाइ परमेसोर हो बाज्तिन परमेसोरकर मन्दिरनाइ बस्नारआछ। 5 केति तोराल्काइ याद बइन्या? मुइ तोराल्कोसिन हक्तिन ने ह्य सेब्बे कुरो बल्ल रइनाइ। 6 होक्र आफ्ने समय हक्लपछि ह्व देखा पर्नारआछ र होलाइ कुन्टो कुरोन रोकिधर्लाछि, ह्व ता तोराल्काइ था रोइस्या। 7 पाप गर्नार मानुसिन आफ्ने काम भित्र-भित्रे सुरु गरिसक्लाछ। तर होलाइ रोकिधर्नारिन नछाडुन्जेलसम्म होक्र काम देखिनार बइने। 8 ह्व पछि पाप गर्नार मानुस देखा पर्नारआछ। पर्भु येसुन होलाइ आफ्ने मुखकर सासिन नास गर्नारआछ, र होक्र आगमनकर उज्यालोन ह्व नस्ट हक्नारआछ। 9 ह्व पाप गर्नार मानुसिन सइतानकर सक्ति लिके आइनारआछ, अनि सेब्बे थरिकर झुटो सिछ्या र अचम्म-अचम्मकर काम गर्नारआछ। 10 होइनिन नास हक्नाराइ जत्ता सेब्बाल्काइ बइमजार कामिन छक्याइनार आछ, किनारइभने होल्किन मुक्ति दिनार सत्य कुरोलाइ मया गरइ इन्कार गर्ला। 11 होइहुदान होल्किन झुटो कुरोनाइ बिस्वास गर्दिखन बाजिके परमेसोरिन छलकर सक्ति पाठाइनारआछ। 12 ताकि सत्यनाइ बिस्वास बइगर्नाराइ, तर खराब कामनाइ आनन्द मानाइनाराइ सेब्बाइ दोसि ठहरिदिखन। बिस्वासनाइ इस्थिर हकइ 13 पर्भुन मया गर्लाइ दाजि-भाइ हो, तोराल्को लागि हाइनिन परमेसोरलाइ धन्नेबाद देइ ने पर्छइ, किनारइभने सुरुसिन ने पबित्र आत्माकर पबित्र बानाइनार कामबान र सत्यताकर बिस्वासबान बाचइलाइ परमेसोरिन तोराल्काइ छान्ल हो। 14 हेक्र लागि हाइनिन सुनाइल सुसमचारबान हाम्रो पर्भु येसु खिरिस्टकर महिमा पाइ परमेसोरिन तोराल्काइ बालाइले। 15 होइहुदान दाजि-भाइ हो, दरो हकिके बसो र हाइनिन बल्ल वा पत्रबान लेख्ल जे सिछ्या तोराल्किन पाइलाछो होइलाइ ने मजसिन पालन गरिधरो। 16 हाम्रो पर्भु येसु खिरिस्ट र परमेसोर ब्वान हाइलाइ मया गर्ले र होक्र अनुगरहबान अनन्तकर सान्तोना र असल आसा दिले। 17 परमेसोरिन तोराल्को हिर्दयलाइ सान्तोना दिके सेब्बे असल काम र बचननाइ तोराल्काइ इस्थिर गराइदिक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.