२ थेसलोनिकि 1 - माझी1 थेसलोनिकेनाइ हक्ल मन्डलिलाइ, हाम्रो परमेसोर ब्वा र पर्भु येसु खिरिस्टकर मुइ पावल, सिलास र तिमोथिकर सेवाढोग। 2 परमेसोर ब्वा र पर्भु येसु खिरिस्टबान तोराल्काइ अनुगरह र सान्ति हक्दिक। धन्नेबाद र पार्थना 3 दाजि-भाइ हो, तोराल्को लागि हाइनिन परमेसोरलाइ सदइ धन्नेबाद देइपर्छइ, र ह्य ठिक पुनि हो, किनारइभने तोराल्को बिस्वास पर्सस्त बाढिधर्लाछि र तोरा सेब्बाल्को मया पुनि एक-आपसनाइ बाढिधर्लाछि। 4 होइहुदान तोराल्को सेब्बे सतावट र तोराल्किन सइधर्ल दुखनाइ तोराल्को इस्थिरता र बिस्वासकर बारेनाइ हाइ परमेसोरकर आने मन्डलिकर माजनाइ गर्बसाथ बाजइ सक्छे। 5 परमेसोरिन सेब्बाइ मान्छेल्को न्याय सइ तरिकान गर्छइ बाज्नार कुरोकर पर्मान हेइ हो, ता कि तोरा परमेसोरकर राज्यनाइ योग्य ठहरइ सको। हेक्र लागि तोराल्किन दुख भोगिधर्लाछो। 6 हाम्रो परमेसोर न्याय गर्नार परमेसोर हक्ल हुदान होइनिन तोराल्काइ दुख दिनारकाइ दुख दिनारआछ, 7 र तोरा दुख पाइलाल्काइ हाइसगिन छुट्कारा दिनारआछ, ह्य कुरो ह्व दिन हक्नारआछि, जब पर्भु येसु आफ्ने सक्तिसालि स्वर्गदुतकोसिन आगिकर ज्वालानाइ स्वर्गबान आइनारआछ। 8 होइनिन परमेसोरलाइ बइचिन्नारकाइ र हाम्रो पर्भु येसुकर सुसमचार बइमान्नारकाइ दन्ड दिनारआछ। 9 होलत पर्भुकर उपस्थितिबान र होक्र सक्तिकर महिमाबान बद्दुर हकिके अनन्त बिनासकर दन्ड पाइनारआछत। 10 ह्य कुरो पर्भु येसु आइनार दिननाइ हक्नारआछि। ह्व दिन पर्भु येसुन आफ्ने पबित्र जनकोबान महिमा पाइनारआछ र बिस्वास गर्नाराइ सेब्बाल्काइ छक्क पार्नारआछ, तोरा पुनि उछि हक्नारआछो, किनारइभने तोराल्किन हाइनिन पर्चार गर्ल सुसमचारनाइ बिस्वास गर्लो। 11 होइहुदान परमेसोरिन तोराल्काइ आफ्ने बोलावटकर योग्य बानाइदिक, र हरेक असल काम र बिस्वासबान गर्ल कामलाइ पुरा गरइलाइ सक्ति दिल हक्दिक बाजिके हाइ सदइ पार्थना गर्दिछे। 12 ताकि हाम्रो परमेसोर र पर्भु येसु खिरिस्टकर अनुगरह अन्सार तोराल्को जिबनबान पर्भु येसुर नाउँकर आदर हक्नारआछि, अनि ह्वबान तोराल्को पुनि आदर हक्नारआछि। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.