१ तिमोथि 6 - माझी1 जत्ता कमरालत मालिककर अधिननाइ आछत, होल्किन आफ्ने मालिकलाइ मान गर्दिखन, ताकि परमेसोरकर नाउँ र हाइनिन दिल सिछ्याकर बदनाम जुनहक्दिक। 2 जुन कमराल्को मालिक बिस्वासि आछ, होल्किन आफ्ने मालिकलाइ बिस्वासनाइ दाजि-भाइ हो बाजिके अपमान जुनगर्दिखन। बुरु होल्किन मालिकको बढ्ता सेवा गर्दिखन, किनारइभने होल्को सेवाबान फाइदा पाइनाराइ आफ्ने मया गर्लाइ बिस्वासि दाजि-भाइ हो। ह्य कुरो बिस्वासिल्काइ सिकाउ र पालन गरइकर लागि उत्साह दिनार गर। झुटो सिछ्या र साँचो धन 3 यदि कुन्नुल्किन झुटो सिछ्या सिकाइछइ र हाम्रो पर्भु येसु खिरिस्टकर सत्य बचन र धार्मिक सिछ्यानाइ सहमत बइहक भने, 4 ह्व मानुस घमन्डि र केइ जान्ल बइहक। होइनिन बिना कामनाइ बाद-बिबाद गर्छइ र एउटो-एउटो सब्दलाइ लिके झगडा गर्छइ। इन्खा कुरोन डार, फुट, बदनाम र बइमजार सङ्का उत्पन्न गराइछइ। 5 इन्खा मान्छेलत ता एकोरो कच-कच गरिधर्छत, होल्को बुद्दि बिग्रिल हक्स्याक, होल्किन सत्य गुमाइ सक्लाइ हक्छत, होल्किन धार्मिक सिछ्या पालन गरइचाइ धन कामाइनार उपाय हो बाजिके सम्जिछत। 6 आफिसिन जे आछ होइनाइ सन्तुस्ट हकिके धार्मिक सिछ्या पालन गर्छे भने होइ ने सेब्बे भन्दा बड्खो धन हो। 7 किनारइभने हाइनिन जन्मितिन न ता ह्य सन्सारनाइ केइ आन्ले, न ता मर्तिन इछ्यान केइ लाकाइछे। 8 होइहुदान हाइलाइ खाइ र लाइलाइ पुग्छइ भने ओत्तेनाइ सन्तुस्ट हकइ पर्छइ। 9 तर धनि हकइ चाइनाराइचाइ परिछ्यानाइ र पासोनाइ पर्छत। अनि धेरे मुर्ख र हानिकारक इछ्यानाइ डुब्छत, इन्खाए इछ्यान मान्छेल्काइ बर्बाद र सर्बनासनाइ पुराइछइ। 10 किनारइभने पइसालाइ मया गरइ ने सेब्बे थरिकर खराब कुरोकर जरा हो। पइसाकर लोबिन गर्तिन कत्ता बिस्वासिलत ता बिस्वास छाडिके बइमजार काम गरइ लाग्लाछत र धेरे पिडान गर्तिन होल्को हिर्दय छिया-छिया हक्लइस्याक। तिमोथिलाइ पावलकर सिछ्या 11 तर तुइ परमेसोरकर जन हक्ल हुदान ह्य कुरोबान बद्दुर बस, धार्मिकतानाइ, परमेसोरकर डरनाइ, बिस्वासनाइ, मयानाइ, इस्थिरतानाइ र नम्र हक्नार कुरोनाइ आफ्ने मन लाउ। 12 बिस्वासकर लडाइ मजसिन लड। अजम्बरि जिबन आठाइ धर। हेक्र लागि परमेसोरिन तुइलाइ बालाइल हो। अनि तुइनिन धेराइ मान्छेल्को अगाडि बिस्वासकर मजार साछि दिलाछस। 13 सेब्बे थोकलाइ जिबन दिनार परमेसोर र पन्तियस पिलातसकर अगाडि सत्य साछि दिनार खिरिस्ट येसुकर अगाडि, 14 मुइ तुइलाइ ह्य आग्या दिछु, हाम्रो पर्भु येसु खिरिस्ट नआउन्जेल ह्य आग्यालाइ मजसिन पालन गर, ताकि कुन्नुल्किन दोस लाइ जुनसक्दिखन। 15 परमेसोरिन खिरिस्टलाइ ठिक समयनाइ फेरि पाठाइनार आछ। सेब्बे आसिसकर परमेसोर ने सेब्बे थोककर मालिक, राजाल्को पुनि राजा, र पर्भुल्को पुनि पर्भु हो। 16 ह्व कइले बइमर र इन्खा उज्यालोनाइ बस्छइ कि होक्र नजिक कोइ जाइ बइसकत। होलाइ कुन्नुल्किन पुनि अखनसम्म देख्लाइ बइनेत, न ता देखइ सक्छत। सेब्बे आदर र सक्ति सदइभरि होक्रे हो। आमेन। 17 अखन ह्य सन्सारनाइ धनि हक्नाल्काइ घमन्ड जुनगरो बाजिके आग्या दिखन, र नस्ट हकिके जाइनार धननाइ बया तर हाइलाइ सेब्बे थोक पर्सस्त परयोग गरइ दिनार परमेसोरनाइ होल्किन आसा धर्दिखन। 18 भलाइकर काम गरइ, मजार कामनाइ धनि हकइ, खाँचोनाइ पर्लाल्काइ खुल्ला मनिन र आफिसिन हक्ल कुरो आनेल्काइ देइ बाजिके होल्काइ बलइ। 19 इत्तिके होल्किन पछिकर साँचो जिबनकर लागि काम लाग्नार धन जम्मा गर्दिखन, ताकि होल्किन साँचो जिबनलाइ आठाइ धर्दिखन। 20 तिमोथि, परमेसोरिन तुइलाइ जिम्मा दिल कुरोलाइ मजसिन हेरचाह गर। अनि तुइ परमेसोरलाइ निन्दा गर्नार मुर्ख कुरोबान र नचाइदो फटा कुरो, जुन्टोचाइ बिना कामकर ग्यान हो, ह्य कुरोबान बद्दुर बस। 21 किनारइभने कत्ता मान्छेलत ह्य कुरोकर पछि लागिके बिस्वासबान पछि हट्लाछत। तोरा सेब्बाल्कोसिन परमेसोरकर अनुगरह हक्दिक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.