१ तिमोथि 5 - माझीबिद्दुइको हेरचाह 1 बुर्राल्काइ डाउनो जुनगर, तर होलाइ आफ्ने ब्वालाइ जिन्खाए गरिके सम्जाउ। अनि स्याउनाल्काइ चाइ आफ्ने भाइलाइ जिन्खाए बेबहार गर। 2 उन्खाए ने बुर्रिल्काइ आफ्ने आमालाइ जिन्खाए र आफि भन्दा स्याउनिल्काइ चाइ सुद्द मनिन आफ्ने बइनिलाइ जिन्खाए बेबहार गर। 3 जुन बिद्दुइको कोइ पुनि बइनेत, होल्काइ हेरचाह गर। 4 तर जुन बिद्दुइको बेटाक-बेटेक वा नातेक-नात्नेकलत आछत भने, होल्किन ने पइला आफ्ने परिवारकर जिम्मा पुरा गरइ सिक्दिखन र आफ्ने आमेक-ब्वाक वा बाजेक-बुढेकिन लाइल गुन तिरइ सक्दिखन, किनारइभने परमेसोरिन इन्खाए गर्ल मन पराइछइ। 5 तर जुन बिद्दुइकर कोइ बइने र अस्करे आछि, होइनिन आफ्ने भरोसा परमेसोरनाइ ने धर्लि हक्छइ। अनि होइनिन रात-दिन परमेसोरलाइ आफ्ने बिन्ति चाढाइ धर्छइ। 6 तर होइनिन मोज-मस्तिनाइ आफ्ने जिबन बिताइलि भने, ह्व जिउँते हक्तिन ता पुनि मर्ले सरि हो। 7 होल्काइ निर्दोस हकिधरइकर लागि, ह्य सिछ्या दिखन। 8 यदि कुन्नुल्किन आफ्ने नातेदारकर र खास गरिके आफ्ने परिवारकर पालनपोसन बइगर भने ता होइनिन बिस्वास गरइ छाड्छइ, र बिस्वास बइगर्नाराइ भन्दा पुनि खराब हक्छइ। 9 जुन बिद्दुइनिन एउटो अडेसिन मात्र ब्याहा गर्छइ र साठ्ठि बर्स भन्दा बढ्ता उमेर हक्लाछि, होक्र नाउँ मात्र खातानाइ लेख। 10 अनि होइनिन मजार काम गर्लि, आफ्ने बेटाक-बेटेककाइ मजसिन हुर्काइलि, पाउनाल्काइ आफ्ने घरनाइ सेवा-सत्कार गर्लि, पर्भुकराइ जनको गोड धोइदिलि, दुखनाइ पर्लाल्काइ सयोग गर्लि र जुनसुके मजार कामनाइ ध्यान दिलि हकइ पर्छइ। 11 तर कम उमेरकराइ बिद्दुइको नाम चाइ खातानाइ जुनलेख। किनारइभने होलत ब्याहा गरइ चाइछत अनि खिरिस्टनाइ मन देइ छाड्छत। 12 इनिखे होल्किन खिरिस्ट सँगिन गर्ल पइलो पर्तिग्या बिर्साइल हुदान होलत दोसि ठहरिछत। 13 ह्य बाएक होलत घर-घरनाइ डुल्तिन हिन्नार बानि परिके अल्छि हक्छत, यत्ता मात्र बया कुरउटे, आनेल्को कामनाइ हात हाल्नार र बाजइ बइहक्नार कुरो पुनि बाज्तिन हिन्नार हक्छत। 14 होइहुदान कम उमेरकराइ बिद्दुइकिन फेरि ब्याहा गर्दिखन, बेटाक-बेटेक पाइदिखन, घरबार चालाइदिखन, र बिरोदिल्किन हाम्रो बद्नाम गर्नार मउका जुनपाइदिखन बाज्नार मुइ सल्ला दिछु। 15 किनारइभने कोइ-कोइ बिद्दुइलतचाइ पइला ने सइतानदिस जाइसक्लाछत। 16 यदि कुनइ बिस्वासि बेटिल्को आफन्तनाइ बिद्दुइलत आछत भने होल्किन बिद्दुइकाइ सयोग गर्दिखन। इन्खा गर्ला भने मन्डलिलाइ कुनइ भार पर्नार बइने, होइहुदान मन्डलिन कोइ बइहक्लाइ बिद्दुइकाइ सयोग गरइ सक्दिक। मन्डलिकर एल्डर 17 मन्डलिकर मजसिन रेखदेख गर्नाराइ एल्डरलत दोबर आदरकर योग्य हक्छत। खास गरिके जुनिन परमेसोरकर बचन सिकाइनार र पर्चार गर्नार काम गर्लाइ हक्छत। 18 किनारइभने पबित्र धर्मसास्तरनाइ लेख्लाछि, “दाइँ गर्नार बर्दइकर मुखनाइ मुखाउरो बइलाइदेइ” अनि “काम गर्नारकिन आफ्ने जेला पाइ ने पर्छइ।” 19 यदि कुन्नुल्किन एल्डरकर बिरुद्दनाइ केइ दोस लाइछइ भने, दुइ वा तिन्टाइ साछि नहकुन्जेलसम्म होल्किन लाइल दोस बइसुनइ। 20 पाप गरिधर्नारकाइ सेब्बाल्को अगाडि हाकारइ, इन्खा गर्लइ भने आनेलत पुनि पाप गरइ डाराइनार आछत। 21 परमेसोर, खिरिस्ट येसु र चुन्लाइ स्वर्गदुतको अगाडि मुइ तुइलाइ कडा आग्या दितिन ह्य बल्तिन आछु, कुनुल्काइ पछ्यपात नगरिकइ ह्य नियमलत तुइनिन पालन गर। 22 कुनु उप्रान हात धरिके मन्डलिकर अगुवा छान्नार कामनाइ हतार जुनगर। आनेल्को पापनाइ सहभागि जुनहक। आफ्ने जिबनलाइ सदइ पबित्र धर। 23 तोर पेटकर समस्यान गर्तिन घरि-घरि बिरामि हक्ल हुदान पानि मात्र बया तर अलि-अलि अङ्गुरकर मद्य पुनि खाइनार गर। 24 कोइ-कोइ मान्छेल्को पाप ता न्यायनाइ पुग्नार गरिके छर्लङ्ग देख्नार हक्छइ, तर कत्ताल्को पापचाइ पछि मात्र देखा पर्छइ। 25 उन्खाए ने मजार कामलत अगाडि ने छर्लङ्ग देख्छे र जुन्टो मजार काम बइदेखे, ह्व पुनि नुकिधरइ बइसकि। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.