१ तिमोथि 4 - माझीझुटो सिछ्या सिकाइनारको बारेनाइ 1 पबित्र आत्मान परस्ट इत्तिके बाज्लाछ, पछि आइनार समयनाइ कत्ता मान्छेलत साँचो बिस्वास छाडिके छलि आत्मा र भुत आत्माकर सिछ्यानाइ लाग्नारआछत। 2 इन्खा सिछ्या झुटो बाज्नाराइ मान्छेल्कोबान आइछइ, हेल्को बिबेक तातो फालामिन डाम्ल जिन्खाए केइ था बइपाइनार हक्स्याक। 3 इन्खा मान्छेल्किन ब्याहा गरइ बइहक र कत्ता कुरो चाइ खाइ बइहक बाजिके सिकाइछत। तर बिस्वास गर्नारकिन र सत्यलाइ चिन्नारकिन धन्नेबाद दिके परमेसोरिन सिस्टि गर्ल थोक खाइ सक्छत। 4 परमेसोरिन सिस्टि गर्ल सेब्बे थोक माहाल आछि। परमेसोरलाइ धन्नेबाद दिके खाइतिन कुनइ पुनि थोक इन्कार गरइ बइपर। 5 किनारइभने ह्व परमेसोरकर बचन र पार्थनान चोखो बानाइछइ। 6 यदि तुइनिन बिस्वासि दाजि-भाइकाइ ह्य सिछ्या सिकाइलइ भने तुइ हुर्किल असल सिछ्या र बिस्वासकर बचन पालन गर्तिन आइल खिरिस्ट येसुकर असल सेबक हक्नारआछस। 7 परमेसोरकर अपमान गर्नार र अर्थ बइहक्ल कथाबान बद्दुर बस, बुरु परमेसोरकर बचन अन्सार हिन्नार कोसिस गर। 8 किनारइभने सरिरकर लागि गर्ल तालिमिन केइ दिन मात्र फाइदा हक्छइ, तर परमेसोरकर बचन अन्सार हिन्ले भने धेरे कुरोकर फाइदा हक्छइ। ह्य अखन र पछिकर जिबनकर लागि गर्ल पर्तिग्या हो। 9 ह्य कुरो साँच्चि हो र सेब्बाल्किन सुइकार गरइपर्छइ। 10 होइहुदान हाइ दिलोज्यानिन काम र कोसिस गर्छे, किनारइभने हाइनिन जिउँते परमेसोरनाइ आसा धर्लाछे। ह्व सेब्बाइ मान्छेल्को, खास गरिके परमेसोरनाइ बिस्वास गर्नाल्को मुक्तिदाता हो। 11 तुइनिन हेइ कुरो बिस्वासिल्काइ आग्या दिखन र सिकाखन। 12 छोडारि हक्तिन तापुनि कुन्नुल्किन तुइलाइ हेला जुनगर्दिखन, तर बिस्वासिल्को अगि बोलिबचन, बानिबेहोरा, मया, बिस्वास र सुद्दतानाइ तुइ एक नमुना बन। 13 मुइ नआउन्जेलसम्म मान्छेल्काइ धर्मसास्तर पढिके सुनाइनार, उत्साह दिनार र सिकाइनार कामनाइ लागिधर। 14 तुइसिन हक्ल बरदानलाइ हेला जुनगर, ह्व बरदान एल्डरकिन आफ्ने हात तुइ उप्रान धर्तिन अगमबानिबान तुइनिन पाइल रइलइ। 15 तुइलाइ दिल ह्य जिम्मा मजसिन गर र हेइनाइ ने लागिधर, ताकि तोर उन्नति सेब्बाल्किन देख्दिखन। 16 आफ्ने बारेनाइ र आफिन दिल सिछ्याकर बारेनाइ होसियार हकइ। ह्य कामनाइ लागिधर्लइ भने तुइनिन आफिलाइ र तोर कुरो सुन्नारकाइ समेत बाचाइनारआछस। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.