१ तिमोथि 3 - माझीमन्डलिकर बिसप 1 ह्य कुरो बिस्वासयोग्य आछि, “यदि कुनइ मानुसिन बिसपकर काम गरइ चाइछइ भने होइनिन मजारे इछ्या गर्ल हो।” 2 होइहुदान बिसप चाइ निर्दोस, एउटि मात्र बोहेक हक्ल, हरेक परिस्थितिनाइ आफिलाइ अधिन गरइसक्नार, सेब्बाल्कोसिन खुसि हकइसक्नार, सेब्बाल्किन आदर गर्ल, पाउनाल्काइ आदर गर्नार र परमेसोरकर बचन मजसिन सिकाइ सक्नार हकइपर्छइ। 3 मातिकइ बइहिन्नार र रिसुवा हकइ बइहक तर ह्व नम्र, झगडा बइगर्नार, पइसाकर लोब बइगर्नार, 4 आफ्ने घर मजसिन चालाइसक्नार र आफ्ने बेटाक-बेटेककाइ मजसिन तह लाइसक्नार हकइपर्छइ। 5 यदि कुनइ मानुसिन आफ्ने घर मजसिन चालाइ बइजान भने, होइनिन किनिखे परमेसोरकर मन्डलि हेरबिचार गरइ सक्छइ र? 6 बिसप भख्खर बिस्वास गर्ल नयाँ बिस्वासि हकइ बइहक। इन्खा हक्ले भने होइनिन घमन्ड गर्छइ र दियाबलसिन जिन्खाए दन्ड पाइनारआछ। 7 बिसप मन्डलि बाइरकराइ मान्छेल्को अगाडि पुनि असल मानुस हकइ पर्छइ, नत्र भने मान्छेल्किन होलाइ निन्दा गर्नारआछत र दियाबलसकर पासोनाइ पर्नारआछ। मन्डलिकर डिकन 8 उन्खाए ने डिकनलत पुनि सेब्बाल्किन आदर गर्नाराइ हकइपर्छइ, होलत दुइ जिब्रे, मातिकइ बइहिन्नार र पइसाकर लागि जे पुनि गरइ तयार हक्नार हकइबइहक। 9 होल्किन आफिन गर्ल साँचो बिस्वासलाइ आफ्ने सुद्द बिबेकिन जोगाइ धरइपर्छइ। 10 डिकन हकइ भन्दा पइला होल्को जाँच हक्दिक। यदि होल्कोनाइ कुनइ दोस बइभेट्टाइला भने मात्र होलत डिकन हकिके सेवा गर्दिखन। 11 इन्खाए ने होल्को बोहेकलत पुनि सेब्बाल्किन आदर गर्नाराइ र आनेल्को कुरो बइकाट्नाराइ हकइपर्छइ। अनि आफिन आफिलाइ अधिननाइ धर्नाराइ र सेब्बे कुरोनाइ बिस्वासयोग्य हकइपर्छइ। 12 डिकन एउटि मात्र बोहेक हक्ल र आफ्ने घर-परिवार र बेटाक-बेटेककाइ मजसिन हेरचाह गरइ सक्नार हकइपर्छइ। 13 किनारइभने डिकनकिन मजार काम गर्ला भने होल्किन मान पाइछत र होल्किन खिरिस्ट येसुलाइ गर्ल बिस्वास आनेल्काइ नडाराइकइ बलइ सक्छत। बिस्वासकर रहस्य 14 तुइ हक्लनाइ चाने आइनार आसा गर्लाछु, तर मुइ तुइलाइ ह्य लेख्तिन आछु। 15 केइ गरि मुइ ढिलो आइनाइ भने पुनि परमेसोरकर घरनाल्को चालचलन किन्खा हकइपर्नार हो, हेइ चिठ्ठिबान तुइनिन था पाइनारआछस। ह्व घरना जिउँते परमेसोरकर मन्डलि, सत्यकर खाबो र जग हो। 16 हाइलाइ था आछ, हाइनिन गर्ल बिस्वासकर रहस्य एकदम बड्खो आछि, ह्व मानुसकर सरिरनाइ देखा पर्ले, पबित्र आत्माबान धर्मि ठहरिले, अनि होलाइ स्वर्गदुतकिन देख्ला, जाति-जातिल्को माजनाइ पर्चारिले, सन्सारनाइ होलाइ बिस्वास गर्ला, सम्मानसाथ होलाइ स्वर्गनाइ लाकाल्ते। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.