१ तिमोथि 2 - माझीसेब्बाल्को लागि पार्थना 1 मुइ अनुरोध गर्छु, सबभन्दा पइला तोराल्किन सेब्बाइ मान्छेल्को लागि नम्र बिन्ति, पार्थना, अन्तर बिन्ति र धन्नेबाद चाराओ। 2 अनि राजालत र उच्च पदनाइ हक्लाइ हाकिमको लागि पुनि पार्थना गरो, ता कि हाइ सुख-सान्ति र आनन्दसाथ सदइ पबित्र र आदरकर जिबन बिताइ सकु। 3 ह्य हाम्रो मुक्तिदाता परमेसोरकर हेराइनाइ मजार र सुइकार योग्य हक्छि। 4 अनि सेब्बाइ मान्छेल्किन मुक्ति पाइल र सत्य कुरो था पाइल परमेसोरिन चाइछइ। 5 परमेसोर एउटे आछ, अनि परमेसोर र मान्छेल्को माजनाइ मिलाप गराइनार पुनि एउटे आछ। ह्व मानुसचाइ खिरिस्ट येसु हो। 6 सेब्बाइ मान्छेल्को लागि पापकर मोल तिरिकइ छुट्कारा देइकर लागि येसु आफि बलि हक्ले। ह्य कुरोकर पर्मान परमेसोरिन ठिक समयनाइ दिलाछ। 7 हेक्र लागि परमेसोरिन मुइलाइ आने जातिकराइ मान्छेल्काइ बिस्वास र सत्यकर बारेनाइ सिकाइनार पर्चारक र पेरित बानाइलाछ। मुइनिन साँच्चि बाज्ल हो, झुक्काइल बया। 8 होइहुदान सेब्बे ठउँकराइ अडे मान्छेल्किन नरिसाइके र बाजाबाज नगरिकइ आफ्ने पबित्र हात उचाल्तिन पार्थना गर्दिखन बाज्नार मोर इछ्या आछ। 9 इन्खाए ने बेटिल्किन पुनि नकल-झकल नपारिकइ आफिलाइ स्वाइनार लुगा लाइदिखन र आफ्ने बारलाइ धेरे जुनसिङ्गार्दिखन। अनि मङ्गो लुगा, सुन र मोतिन सिङ्गारिकइ बया, 10 तर आफिन असल काम गरिके देखाइदिखन। इन्खा गर्ल परमेसोरकर सेवा गर्नाराइ बेटिल्काइ स्वाइछइ। 11 बेटिल्किन अधिननाइ बसिके सान्तसिन सिक्दिखन। 12 तर बेटिल्किन अडेल्काइ सिकाइनार र होलत उप्रान अधिकार जमाइनार कामनाइ मुइ सहमति बइदिउ, बेटिलत चुपचाप बस्दिखन। 13 किनारइभने पइला आदमलाइ ने सिस्टि गर्ल हो, अनि हब्बालाइ। 14 आदम छलनाइ पर्ल बया, तर हब्बा छलनाइ परिके पापनाइ फस्लि हो। 15 ता पुनि बेटिलत नम्र हकिके बिस्वास, मया र पबित्र हकिके जिबन बिताइला भने नानि जन्मितिन होलत बाचाइनाराइ आछत। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.