१ तिमोथि 1 - माझी1-2 बिस्वासनाइ मोर साँचो बेटाक तिमोथि, हाइलाइ मुक्ति दिनार परमेसोर र हाइनिन आस गर्ल खिरिस्ट येसुकर आग्या अन्सार मुइ पेरित पावलकर सेवाढोग। परमेसोर ब्वा र खिरिस्ट येसु हाम्रो पर्भुबान तुइलाइ अनुगरह, दया र सान्ति हक्दिक। झुटो सिछ्याबान होसियार 3 मुइ माकेडोनिया जाइतिन तुइलाइ बिन्ति गर्ल जिन्खाए एफिससनाइ ने बस र गलत सिछ्या सिकाइनारकाइ कडा आग्या दिखन। 4 र होलत पइलाकराइ मान्छेल्किन बानाइल दन्त्य कथालत र कइले बइटुङ्गिनार बङ्सावलिलाइ छाड्दिखन, किनारइभने इन्खा कुरोन बाद-बिबाद मात्र हक्छइ र परमेसोरनाइ बिस्वासकर जिबन बिताइनारकाइ केइ सायता बइगर। 5 ह्य आग्याकर उदेस्यचाइ साँचो मया हो, ह्य मया सुद्द हिर्दय, असल बिबेक र साँचो बिस्वासबान आइछइ। 6 तर कत्ता मान्छेलत ह्य कुरोलाइ छाडिके बेर्थेकर कुरोनाइ अलमलि धर्लाछत। 7 होलत मोसान लेख्ल परमेसोरकर नियम सिकाइनार गुरु बनइ हेर्छत, तर आफिन पक्का गरिके सिकाइल कुरो आफि ने बइबुजत। 8 तर हाइलाइ था आछ, परमेसोरकर नियम ठिक तरिकान पालन गर्ले भने ह्य धेरे मजार कुरो हो। 9 हाइलाइ ह्य कुरो पुनि था आछ, परमेसोरकर नियम धर्मातिल्को लागि बया। ह्य ता नियम पालन बइगर्नाराइ र अट्टेरिल्को लागि, परमेसोरलाइ बइमान्नाराइ र पापिल्को लागि, आमेक-ब्वाकलाइ मार्नाराइ र ज्यानमाराल्को लागि, 10 बेभिचारिल्को लागि, समलिङ्गिल्को लागि, अपहरनकारिल्को लागि, झुटो बाज्नारको लागि, झुटो साछि दिनारको लागि र सइ सिछ्याकर बिरोद गरिके हिन्नारको लागि हो। 11 ह्य सिछ्या सेब्बे आसिस दिनार परमेसोरकर महिमित सुसमचार अन्सार आछि र ह्य सुसमचार पर्चार गर्नार जिम्मा मुइलाइ दिलाछ। दयाकर लागि परमेसोरलाइ धन्नेबाद 12 मुइलाइ सक्ति दिनार खिरिस्ट येसु हाम्रो पर्भुलाइ मुइ धन्नेबाद दिछिन, किनारइभने होइनिन मुइलाइ बिस्वासयोग्य ठानिकइ आफ्ने कामकर लागि छान्लाछ। 13 मुइनिन पइला होक्र निन्दा, खेदो र अपमान गर्नाइ। तर मुइनिन ह्य अन्जान र अबिस्वासनाइ गर्ल हुदान मुइलाइ दया गर्ले। 14 अनि मुइनिन पर्भुकर अनुगरह पर्सस्त पाइलाछु, र खिरिस्ट येसुनाइ हक्ल बिस्वास र मया मुइलाइ दिले। 15 खिरिस्ट येसु पापि मान्छेल्काइ बाचाइकर लागि ने ह्य सन्सारनाइ आइल हो, ह्य कुरो सेब्बाल्किन सुइकार गरइ पर्छइ। ह्व पापिलत मद्दे मुइचाइ मुख्य पापि हो। 16 होइहुदान मुइनिन दया पाइनाइ। पापिलत मद्दे सेब्बाइ भन्दा मुख्य हकिके पुनि मुइबान येसु खिरिस्टनिन आफ्ने धइरे देखाइलाछ, ता कि ह्व उप्रान बिस्वास गरिके अनन्त जिबन पाइनारको लागि मुइ एउटो उदारन बनइ सकु। 17 अब सदइ सासन गर्नार राजा, कइले बइमर्नार र देखइ बइसक्नार एक मात्र परमेसोरलाइ आदर र महिमा सदइभरि हकिधर्दिक। आमेन। 18 मोर बेटाक तिमोथि, मुइ तुइलाइ ह्य आग्या दिछु, कि तोर बारेनाइ पइला ने गर्ल अगमबानिबान साहस पाइके तुइनिन सुसमचारकर लागि असल लडाइ लड। 19 ह्व बेला आफ्ने बिस्वास र सुद्द बिबेकलाइ जोगाइ धर। कत्ताल्किन आफ्ने बिबेकिन बल्ल बइमान्तिन होल्को बिस्वास ने नाठ्लाछि। 20 हेलत मद्दे हुमेनियस र अलेक्जेन्डर हो। होल्किन परमेसोरकर निन्दा जुनगर्दिखन बाजिके मुइनिन होल्काइ सइतानलाइ जिम्मा लाइदिलाछु। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.