१ थेसलोनिकि 5 - माझीपर्भुकर आगमनकर लागि तयार हको 1 दाजि-भाइ हो, ह्य कुरो कखन र कुन बेला हक्छि बाजिके तोराल्काइ लेखिधरइ बइपर। 2 किनारइभने तोराल्काइ मजसिन था रोइस्या, पर्भु आइनार दिन ता राति चोर आइल जिन्खाए आइनारआछि। 3 जब मान्छेलत “सान्ति र सुरछ्या आछ” बाजिधर्लाइ हक्छत, तब नानि पाइनारि बेटिलाइ बेथा लाग्ल जिन्खाए एक्कासि होलत उप्रान बिनास आइनारआछि, र होलत कुनइ तरिकान उम्कइ बइसकत। 4 तर दाजि-भाइ हो, तोरा आँधारिनाइ बइने, होइहुदान पर्भुकर आगमनकर दिन तोराल्को लागि चोर आइल जिन्खाए हक्नार बइने। 5 किनारइभने तोरा दिनकराइ र जोतिकराइ सन्तान हो। हाइ रातकराइ र आँधारिकराइ सन्तान बया। 6 होइहुदान हाइ आनेलत जिन्खाए निदाइ बइहक, तर जागे र होसियार हकिके बसइ पर्छइ। 7 किनारइभने सुत्नाराइ राति सुत्छत, र मद्य पिकइ मात्नाराइ पुनि राति ने मात्छत। 8 तर हाइ चाइ दिनकराइ सन्तान हक्ल हुदान होसियार हकइ पर्छइ। हाइनिन बिस्वास र मयालाइ सुरछ्या दिनार छाति पाता जिन्खाए लाउ र मुक्तिकर आसालाइ सुरछ्या दिनार टोपि जिन्खाए लाउ। 9 किनारइभने परमेसोरिन हाइ उप्रान आफ्ने रिस खन्याइलाइ छान्ल बया, तर हाम्रो पर्भु येसु खिरिस्ट मार्फत मुक्ति देइलाइ पइला ने छान्ल हो। 10 पर्भु हाम्रो लागि मर्ले, ताकि ह्व आइतिन हाइ मर्तिन पुनि बाच्तिन पुनि ह्वसिन जिउँते हकइ सकउ। 11 होइहुदान अखन तोराल्किन गर्ल जिन्खाए एउटोन अर्कोलाइ होउसला दिनार र बिस्वासनाइ बल्-ल्यो बानाइनार काम गरो। अन्तिम सिछ्या 12 दाजि-भाइ हो, हाइ तोराल्काइ बिन्ति गर्छे, तोराल्को माजनाइ मन लाइके पर्भुकर काम गर्नाराइ र सिछ्या दिनाराइ अगुवाल्काइ आदर गरो। 13 होल्किन गर्ल कामकर लागि होल्काइ मया गरिके धेरे आदर गरो, अनि आपसनाइ मिलिके बसो। 14 दाजि-भाइ हो, हाइ तोराल्काइ बिन्ति गर्छे, अल्छिकाइ चेतावनि दिखन, हरेस खाइनारकाइ होउसला दिखन र कमजोरिकाइ सायता गरो, अनि सेब्बाल्कोसिन सइकइ बसो। 15 तोरा कुन्नुल्किन खराबकर बदला खराब जुनगरो, तर एउटोन अर्कोलाइ र सेब्बाइ मान्छेल्काइ सदइ मजार गर्नार कोसिस गरो। 16 सदइ आनन्दित हको। 17 सदइ पार्थना गरिधरो। 18 सेब्बे परिस्थितिनाइ परमेसोरलाइ धन्नेबाद देओ, किनारइभने खिरिस्ट येसुनाइ तोराल्को लागि परमेसोरकर इछ्या हेइ हो। 19 पबित्र आत्मान गर्ल कामलाइ जुनरोको। 20 अगमबानिलाइ हेला जुनगरो। 21 सेब्बे कुरोकर मजसिन जाँच गरो र मजार कुरोनाइ लागिधरो। 22 सेब्बे थरिकर खराब कुरोबान बद्दुर बसो। 23 सान्ति दिनार परमेसोर आफिन पुरा रुपिन तोराल्काइ सुद्द बानाइदिक, अनि हाम्रो पर्भु येसु खिरिस्टकर आगमननाइ तोराल्को आत्मा, परान र सरिर निर्दोस हक्दिक। 24 तोराल्काइ बालाइनार परमेसोर बिस्वासयोग्य आछ, होइनिन ने तोराकाइ ह्य सेब्बे कुरो पुरा गर्दिनारआछ। 25 दाजि-भाइ हो, हाम्रो लागि पार्थना गरो। 26 सेब्बाइ दाजि-भाइकाइ चोखो मयान सेवाढोग गरो। 27 पर्भुनाइ मुइ तोराकाइ अनुरोध गर्छु, ह्य पत्र पढिके सेब्बाइ दाजि-भाइकाइ सुनाइदिखन। 28 हाम्रो पर्भु येसु खिरिस्टकर अनुगरह तोराल्कोसिन हक्दिक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.