१ थेसलोनिकि 4 - माझीपरमेसोरलाइ मन पर्नार जिबन 1 अन्त्यनाइ दाजि-भाइ हो, पर्भु येसुनाइ हाइ तोराल्काइ बिन्ति गर्छे र अर्ति दिछे, कि तोराल्किन किनिखे जिबन बिताइनार र परमेसोरलाइ किनिखे खुसि बानाइनार बाजिके तोराल्किन हाइबान सिक्लो, र उन्खाए गर्तिन पुनि आछो होइनाइ तोरा अजइ बाढ्तिन जाओ। 2 किनारइभने हाइनिन तोराल्काइ पर्भु येसुबान पाइल कुन्टो-कुन्टो आग्यालत दिलाइ रइले, ह्व तोराल्काइ था रोइस्या। 3 तोरा पबित्र हक्ल परमेसोरिन चाइछइ। होइहुदान बेभिचारबान बद्दुर बसो। 4 पबित्र र आदरसाथ आफ्ने सरिरलाइ अधिननाइ धरइपर्छइ, ह्व तोरा सेब्बाल्किन जानइपर्छइ। 5 तर परमेसोरलाइ बइचिन्नाराइ आने मान्छेलत जिन्खाए बेभिचार गर्नार खराब बिचार जुनगरो। 6 हेक्र बारेनाइ कुन्नुल्किन पुनि अपराध गरिके आफ्ने भाएकलाइ खराब जुन्गर्दिक, इन्खा काम गर्नारलाइ परमेसोरिन दन्ड दिनारआछ। हेक्र बारेनाइ हाइनिन तोराल्काइ पइला ने चेतावनि दिलाछे। 7 किनारइभने परमेसोरिन हाइलाइ असुद्द हकइ बया, तर पबित्र जिबन बिताइलाइ बालाइल हो। 8 होइहुदान जुनिन ह्य कुरोलाइ इन्कार गर्छइ होइनिन मानुसलाइ बया, तर परमेसोरलाइ इन्कार गर्छइ, जुनिन तोराल्काइ आफ्ने पबित्र आत्मा दिछइ। 9 अब एउटोन अर्कोलाइ गर्नार मयाकर बारेनाइ तोराल्काइ कुनइ कुरो लेखइ बइपर, किनारइभने परमेसोर आफिन ने तोराल्काइ मया गरइ सिकाइ सक्लाछ। 10 माकेडोनियाकराइ सेब्बाइ दाजि-भाइकाइ तोराल्किन साँच्चि ने मया गर्छो। दाजि-भाइ हो, अजइ धेरे मया गर्तिन जाओ बाजिके हाइ तोराल्काइ बिन्ति गर्छे। 11 हाइनिन तोराल्काइ आग्या दिल जिन्खाए, तोराल्किन सान्त जिबन बिताओ, आफ्ने कामनाइ ध्यान देओ र आफ्ने हातिन काम गरो। 12 इन्खा गर्लो भने तोराल्काइ मान्छेल्किन आदर गर्नारआछत, र कुनु उप्रान भर परइ बइपर। पर्भुकर आगमन 13 दाजि-भाइ हो, मरिसक्लाइ बिस्वासिल्को केति हक्छइ बाजिके तोराल्काइ था हक्ल हाइ चाइछे, र तोराल्किन आस ने बइहक्लाल्किन गर्ल जिन्खाए सोक जुनगरो। 14 येसु मर्लबान जिउँते हक्ल हाइ बिस्वास गर्छे, उनिखे ने बिस्वास गरिके मर्लाल्काइ परमेसोरिन येसु मार्फत फेरि जिउँते पारिके आन्नारआछ। 15 पर्भुकर बचन मार्फत हाइ तोराल्काइ बल्छे, पर्भुकर आगमनसम्म हाइ बाच्लाल्किन ह्व मर्लाल्काइ केइ गरिके पुनि उछनइ बइसके। 16 किनारइभने पर्भु आफि हुकुमकर बड्खो सोर, मुख्य स्वर्गदुतकर सोर र परमेसोरकर तुरहिकर आवाजसिन स्वर्गबान आइनारआछ, अनि खिरिस्टनाइ बिस्वास गरिके मर्लाइ चाइ पइला जिउँते हकिके उठ्नारआछत। 17 तब हाइ जिउँते र बाकि हक्लाइ पर्भुलाइ आकासनाइ भेट्टाइ होल्कोसिन बादलनाइ उठाइ लाकाइनारआछ। इनिखे हाइ सदइ पर्भुसिन हक्नारआछे। 18 होइहुदान हेइ बचन मार्फत एउटोन अर्कोलाइ सान्तोना दिनार गरो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.