१ थेसलोनिकि 3 - माझी1 जब हाइ तोराल्कोबान छुट्टिकइ बसइ बइसक्ले, तब मुइ र सिलास चाइ एथेन्सनाइ बस्नार बिचार गर्ले। 2 र हाम्रो भाइ तिमोथिलाइ चाइ तोराल्काइ अर्ति-उपदेस देइ र बिस्वासनाइ बल्-ल्यो बानाइलाइ हाइनिन तोराल्कोनाइ पाठाइले। तिमोथि खिरिस्टकर सुसमचार सुनाइनार परमेसोरकर सेबक हो। 3 ह्य कस्टन गर्तिन तोराल्को बिस्वास ढलपल जुनहक्दिक। हेइकर लागि हाइलाइ छान्ल हो बाजिके तोराल्काइ था रोइस्या। 4 किनारइभने हाइनिन कस्ट भोगइपर्छइ बाजिके पइला ने तोराल्कोसिन हक्तिन हाइनिन तोराल्काइ बल्लाइ रइले। हाइनिन बल्ल जिन्खाए हकल्ते, ह्य ता तोराल्काइ था रोइस्या। 5 होइहुदान मुइनिन अजइ सइ नसकिकइ तोराल्को बिस्वास बुजइलाइ तिमोथिलाइ पाठाइनाइ। सइतानिन तोराल्काइ परिछ्यानाइ पारिके हाम्रो काम बेर्थे हक्नार हो कि बाजिके डारउनो लाग्ल रइल। 6 तर अखन तिमोथि तोराल्कोबान हाइ हक्लनाइ आइपुग्लाछ र तोराल्को बिस्वास र मयाकर असल खबर हाइलाइ सुनाइले। तोराल्किन हाइलाइ सम्जिकइ भेट्टाइनार एकदम इछ्या गर्ल जिन्खाए हाइनिन पुनि तोराल्काइ भेट्टाइनार इछ्या गर्लाछे। 7 होइहुदान दाजि-भाइ हो, तोराल्को बिस्वासकर खबर सुनिके दुख र निरासनाइ पुनि हाइनिन सान्तोना पाइलाछे। 8 किनारइभने तोरा पर्भुनाइ इस्थिर आछो बल्ल सुनिके हाइलाइ नयाँ जिबन पाइल जिन्खाए हक्लाछ। 9 तोराल्किन गर्तिन हाइ परमेसोरकर अगाडि आनन्द मानाइछे। हेक्र लागि हाइनिन परमेसोरलाइ जत्ता धन्नेबाद दितिन पुनि बइपुगि। 10 तोराल्काइ फेरि भेट्टाइके बिस्वासनाइ अजइ दरो बानाइ सकउ बाजिके हाइ रात-दिन जोसिलो हकिके पार्थना गरिधर्लाछे। 11 अब हाम्रो परमेसोर ब्वा र पर्भु येसुन ने तोरा हक्लनाइ आइकर लागि हाइलाइ बाट खोल्दिल हक्दिक। 12 हाइनिन तोराल्काइ मया गर्ल जिन्खाए पर्भुन पुनि तोराल्काइ आपसनाइ र सेब्बाइ मान्छेल्कोसिन मयानाइ पर्सस्त गरिके बाढाइदिक। 13 ता कि हाम्रो पर्भु येसु आफ्ने सेब्बाइ पबित्र जनकोसिन फेरि आइतिन होइनिन हाम्रो परमेसोर ब्वाकर अगाडि तोराल्को हिर्दय पबित्र र निर्दोस बानाइके इस्थिर गराइदिक। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.