१ थेसलोनिकि 2 - माझीथेसलोनिकेनाइ पावलकर सेवा 1 दाजि-भाइ हो, तोराल्कोसिन हाम्रो भेटघाट उन्नि खेरो बइजाल्ते बाजिके तोराल्काइ था ने रोइस्या। 2 उछि आइ भन्दा अगाडि हाइनिन फिलिप्पिनाइ दुख भोग्ल र उछिराइ मान्छेल्किन हाइलाइ अपमान गर्ल कुरो तोराल्काइ था रोइस्या। तर हाइलाइ बिरोद गर्नाराइ धेराइ हक्तिन ता पुनि परमेसोरकर बारेनाइ तोराल्काइ सुसमचार सुनाइलाइ परमेसोरिन हाइलाइ आँट दिले। 3 किनारइभने हाम्रो अर्ति-उपदेस बेर्थेकर वा असुद्द मनबान आइल बया, न ता कुनइ छलकपटिन हक्ल हो। 4 तर जिनिखे परमेसोरिन हाइलाइ सुसमचार पर्चार गरइकर लागि योग्य देखिके जिम्मा दिले, उनिखे ने हाइ मान्छेल्काइ खुसि पारइकर लागि बया, तर हाम्रो हिर्दय जाँच्नार परमेसोरलाइ खुसि पारइकर लागि सुसमचार पर्चार गर्छे। 5 तोराल्काइ मजसिन था रोइस्या, हाइनिन तोराल्कोसिन कइले बाढाइ-चाढाइ बइगर्ले, र केइ पाइनार लोब पुनि बइगर्ले। ह्य कुरोकर साछि परमेसोर आछ। 6 खिरिस्टकर पेरित हक्ल हुदान हाइनिन तोरा उप्रान अधिकार चालाइ सक्नाले। ता पुनि हाइनिन मान्छेल्कोबान आदर बइहेर्ले, न ता तोराबान, न ता आने कोइबान। 7 तर हाइ ता आफ्ने नानिल्काइ स्याहार्नारि आमेक जिन्खाए नम्र हकिके तोराल्को माजनाइ सेवा गर्ले। 8 हाइलाइ तोराल्को धेरे मया हक्ल हुदान, परमेसोरकर सुसमचार मात्र बया, तर आफ्ने ज्यान पुनि तोराल्को लागि देइ तयार रइले, किनारइभने हाइनिन तोराल्काइ धेरे मया गर्लाइ रइले। 9 दाजि-भाइ हो, तोराल्किन हाइनिन गर्ल काम र दुखलत देख्लाछो। तोरा कुनुल्काइ भार जुन्पर्दिक बाजिके रात-दिन काम गरिके हाइनिन तोराल्काइ परमेसोरकर सुसमचार पर्चार गर्ले। 10 हाइ तोरा बिस्वास गर्नाल्कोसिन हक्तिन हाम्रो बेबहार पबित्र, धर्मि र निर्दोस रल्ति। ह्य कुरोकर साछि परमेसोर र तोरा आफि आछो। 11 किनारइभने तोराल्काइ मजसिन था रोइस्या, ब्वाकिन आफ्ने बेटाक-बेटेककाइ गर्ल बेबहार जिन्खाए हाइनिन तोरा सेब्बाल्काइ अर्ति-उपदेस दितिन साहस दिले। 12 ताकि तोराल्काइ आफ्ने राज्य र महिमानाइ बालाइनार परमेसोरकर अगाडि तोराल्को चालचलन योग्यकर हक्दिक। 13 हाइनिन तोराल्काइ परमेसोरकर बचन सुनाइतिन तोराल्किन ह्व बचननाइ मान्छेल्को बचन बया तर ह्व बास्तबनाइ परमेसोरकरे बचन हो बाजिके सुइकार गर्लो। ह्व बचनिन तोरा बिस्वासिल्को जिबननाइ काम गर्तिनआछि। होइहुदान हेक्र लागि हाइ परमेसोरलाइ सदइ धन्नेबाद दिछे। 14 किनारइभने दाजि-भाइ हो, तोरा खिरिस्ट येसुनाइ यहुदियानाइ हक्ल परमेसोरकर मन्डलिकर देखासिकि गर्नाराइ हक्लो, अनि यहुदियाकराइ मन्डलिकिन दुख भोग्ल जिन्खाए तोराल्किन पुनि आफ्ने जातिराइ मान्छेल्कोबान दुख भोग्लो। 15 होइ यहुदिल्किन पर्भु येसु र अगमबक्ताल्काइ मार्ला, र हाइलाइ पुनि सताइला। होल्किन परमेसोरलाइ मन बइपर्नार काम गर्ला र सेब्बाइ मान्छेल्को बिरोदि हक्ला। 16 होल्किन हाइलाइ आने जातिराइ मान्छेल्काइ मुक्तिकर कुरो सुनाइ बइदिला। इनिखे सदइ होल्किन आफ्ने पाप थप्तिन जाइला, तर पछि परमेसोरकर रिस होलत उप्रान पर्लाछि। थेसलोनिकिल्काइ भेट्टाइनार पावलकर इछ्या 17 दाजि-भाइ हो, हाइ तोराल्कोसिन सरिरनाइ केइ समयकर लागि छुटितिन पुनि मननाइ चाइ छुटिलाइ बइने। तोराल्काइ फेरि आम्ने-साम्ने भेट्टाइनार हाम्रो एकदम धेरे इछ्या आछ। 18 किनारइभने हाइ तोरा हक्लनाइ आइ हेर्लाइ रइले, मुइ पावल चाइ घरि-घरि आइनार कोसिस गर्नाइ, तर सइतानिन हाइलाइ रोक्ले। 19 जब हाम्रो पर्भु येसु आइछइ, तब ह्व बेला होक्र अगाडि हाम्रो आसा, आनन्द र घमन्डकर मुकुट तोरा ने बया र? 20 साँच्चि हाम्रो आनन्द र सम्मान तोरा ने हो। |
© 2024 (Active), Mother Tongue Translators Society and Wycliffe Bible Translators, Inc. All rights reserved.
Wycliffe Bible Translators, Inc.