Xota̱ Roma̱ 9 - Xo̱jo̱n eén Néná

Bi̱ tsꞌén íni̱jmì Pabloo̱ kjo̱a̱a̱ nga katjoꞌójin xota̱ Israee̱l

¹ Ja̱koxi̱ ni xi tꞌíxiánjnúꞌun nga ki̱a̱ majo̱ an Kristoo̱, ꞌbindisójín an, kó A̱si̱énni̱xtjii̱n Néná xí tsáyà nga ja̱koxi̱ ni xi tsꞌénkjó kjo̱a̱kjíntakónna.

² Ngo kjo̱a̱ndasen xi ꞌniú je tikónna, kó ngatsjéni̱xtjin tikónna ngo kjo̱a̱ndakjan ngi̱jii̱n ini̱ma̱na.

³ Tsi ka̱ma, ngaskande mejénna nga Néná ngatꞌíko̱joo̱ ka̱tso̱na tsi nga Kristoo̱ kjin kꞌuijñána, tsi ta̱ꞌa nga bo̱a̱ tsꞌén ka̱mana kosiko̱jo an ntsꞌié án kui xi xota̱ tji̱e̱na.

⁴ Kui xi xota̱ Israee̱l, kó Néná ndí tsi̱ꞌe̱ katsꞌén, kó akoó kjo̱a̱jee̱, kjiꞌanga katsjaá ni xi índa Néná ko̱jo xota̱ na̱xi̱ńdaá, nga katsjaá kjo̱a̱kitii̱, akoó kótsꞌèn sa̱ꞌíntsjaá Néná ko̱jo katsóyàtjoón ni xi tsja̱á.

⁵ Xota̱ Israee̱l kuí xí xota̱ tji̱e̱ xchaá xota̱ xi jaꞌájin Néná, kó ngi̱jii̱n kui xotaa̱ jatjo kui xi katsó Néná nga kjindibáni Kristoo̱ nga jín nga yojo ka̱ma xikoó ñá, kuí boá xi Néná xí botixómaá ngayeje ni xi tjiín. Ngatamachikonñé kui ta̱ kjiꞌání. Bo̱a̱ kjiꞌi.

⁶ Kó jmí tsi kjo̱a̱a̱ tsi jmí ni kamáchjíjínnii̱ eén Néná. Ngatꞌa̱ jmí tsi ngayeje xota̱ xi chji̱a̱ni xota̱ tji̱e̱e̱ Israee̱l xi ja̱koxi̱ nga xota̱ Israee̱l.

⁷ Ti̱nde jmí tsi kjo̱a̱a̱ nga xota̱ tji̱e̱e̱ Abraa̱n, nga ngayejee̱ nga ndií Abraa̱n, xikó katsó Néná: “Kuí Isaa̱ xi ja̱koxi̱ nga xota̱ tji̱e̱e̱ ka̱ma.”

⁸ Kó kui nii̱ xi tsó: Nga jmí tsi ngayeje xi xota̱ tji̱e̱e̱ Abraa̱n, xikoó ñá, xi ndií, ngindyi̱ko̱n Néná, nga ja̱koxi̱ kuí xí ka̱ma ndií Néná, kui xi sa̱ko̱ó ni xi katsóyàtjón Néná nga tsja̱á, kui xi xota̱ tji̱e̱e̱ Abraa̱n.

⁹ Ngatꞌa̱ eén kjo̱a̱a̱ ni xi katsóyàtjón Néná nga tsja̱á kuí bí xi̱ꞌbi̱: “Kuí ni̱xtjin xi̱ꞌbi̱ nga kji̱ndi̱bá an, kó na̱ Saraa̱ ngo ndí xíꞌín kꞌuieé.”

¹⁰ Kó jmí tsi ta̱kuítsí nii̱ xi ka̱ma, ko̱jo na̱ Rebekaa̱ kꞌuieé ndí ꞌni̱o̱, kui xi kamá chjo̱ón Isaa̱, kui xi xota̱ tji̱e̱ xchaá xota̱ Israee̱l.

¹¹ Néná tsíchji̱a̱jo na̱ Rebekaa̱ kjiꞌanga nde kji̱e̱ tsenjín kui jákjíndií, kjiꞌanga nde kji̱e̱ jmí ni xi nda ko̱jo tsi ni xi ndajín xi je katsꞌén, ngatꞌa̱ Néná foaꞌájin xota̱ xi mejeén kui, jmí tsi kjo̱a̱a̱ ni nda xi tsꞌén.

¹² Kuíni nga bi̱ katsoó na̱ Rebekaa̱: “Ndí xi tjón stse̱én, kuí xí sa̱ꞌínseén ndí xi ma joó.”

¹³ Xikó má tsꞌén kjitꞌa xo̱jo̱n eén Néná nínga bi̱ tsoó: “Jako̱b katsꞌentjó an, ta̱nga Esauu̱ katsꞌenchꞌó an.”

¹⁴ Ja̱, kó mí ni xi ka̱ma kꞌuín kjo̱a̱a̱ kui nii̱. A nga Néná kixi̱jín. ¡Jmí ni̱xtjin!

¹⁵ Néná bi̱ katsoó Moisee̱: “Ni̱ma̱ ka̱mana xota̱ xi ni̱ma̱ ka̱mana, kó ni̱ma̱ skuiekon an xota̱ xi ni̱ma̱ skuiekon an.”

¹⁶ Ja̱ kuíni nga jmí tsi kjo̱a̱a̱ ni xi mejénná, ti̱nde jmí tsi kjo̱a̱a̱ ni xi nda ndyi̱niꞌán, tsi kui kjo̱a̱a̱ nga Néná nda sa̱ꞌínjo̱na, nda tsꞌénjo̱na kjo̱a̱a̱ nga ma ni̱ma̱a̱ ñá.

¹⁷ Ngatꞌa̱ bi̱ tsó kjo̱a̱a̱ nda̱ ree̱ nangi Ejipto̱ xo̱jo̱n eén Néná: “Re katsꞌeen tsi̱ꞌe̱ nga katsꞌenkjieén nga koko an ngaꞌniúna, ko̱jo nga kꞌuiyá jaꞌénna ngayeje tꞌanangii̱.”

¹⁸ Kó kuíni nga Néná ka̱mani̱ma̱a̱ xota̱ xi mejeén kui nga ka̱mani̱ma̱a̱, kó tajá sa̱ꞌín ini̱ma̱a̱ xi mejeén kui nga tajá sa̱ꞌín ini̱ma̱a̱.

¹⁹ Ta̱nga bi̱ se̱ní: “Mí ni xi sa̱ꞌínjénií Néná xotaa̱. ꞌYá xí ka̱maa̱ kondra̱ kꞌuijñánii̱ ni xi mejeén sa̱ꞌín.”

²⁰ ¡Ji nda̱! Nga fetꞌa, ꞌyání ji nga ji kon xi chji̱e̱ꞌèe̱ xki̱ Néná. A ka̱márií ti̱jì xi je kiniꞌándaa̱ nga bi̱ ka̱tso̱o̱ nda̱ xi katsꞌéndaa̱: “Ánní nga bo̱a̱ tsꞌén kiniꞌíndení”.

²¹ Kó nda̱ xi tsꞌénda ti̱ji̱í a jmíjínrií ngo ngaꞌniú nga kui xi ka̱tso̱ mí ni xi sa̱ꞌínda ndásee̱, kó ka̱ma bo̱a̱ ka̱tso̱ tsi ngo ti̱jì xi tsjá sa̱ꞌínda, axa̱ ngo ti̱jì xi ta̱xkiya.

²² Néná xí kamámejeén akó kjo̱a̱xcha̱án, kó tsi kamámejeén akó ngaꞌniuú nga katsꞌénchíkjo̱a̱a̱ kjo̱a̱a̱ xota̱ xi sa̱ko̱ó nga si̱ꞌanjeé ko̱jo si̱ꞌankjie.

²³ Bo̱a̱ tsꞌén Néná ko̱kó ngayeje kjo̱a̱cho̱o̱n kjo̱a̱jee̱ kjo̱a̱a̱ xota̱ xi ni̱ma̱ ka̱maa̱ xi ja̱bo̱a̱ je íjñanda tsi̱ꞌe̱ kjo̱a̱jee̱.

²⁴ Kui xota̱ xi ti̱ je tsíchji̱a̱a̱, kó ñá boá, jmí tsi ta̱kuítsí xota̱ xi jundíoo̱, ko̱jo kuí xota̱ xi jundío̱jiín nga.

²⁵ Xikó tsó xo̱jo̱n eén Néná xi katsꞌénda nda̱ chji̱ni̱e̱ꞌe̱én xi ꞌmí Oseaa̱: Xota̱ xi na̱xi̱ńdánajín chji̱a̱ni, xota̱ na̱xi̱ńdána xiáa̱n. Kó xi katsꞌentjójín an, xi tjóna xiáa̱n.

²⁶ Jè ngiti̱ bi̱jín kꞌuínjnú: Júnjín xi xota̱ na̱xi̱ńdána, ta̱sá bi̱ kꞌuínjnú: “Jún xí ndií Néná xi tikoón.”

²⁷ Ta̱nga bi̱ katsó nda̱ chji̱ni̱e̱ꞌe̱én Néná xi ꞌmí Isayaa̱ kjo̱a̱a̱ xota̱ Israee̱l: “Ndatsi xota̱ Israee̱l bo̱a̱ kjiꞌi ma xikoó tsomí xí tjín nga̱nde ndáchíkoón, ta̱ chiboa tsí má xi kjo̱tjoꞌaa̱,

²⁸ ngatꞌa̱ Ndi̱a̱ná jè tsá kixi̱ tsꞌén sa̱ꞌínjeé xotaa̱ kui tꞌanangii̱.”

²⁹ Kó xikó katsó nda̱ chji̱ni̱e̱ꞌe̱én Néná xi ꞌmí Isayaa̱: Tsi kui Ndi̱a̱ná xí tjiín ngaꞌniuú xi katsjájínná xota̱ xi tji̱e̱ná, jera̱ bo̱a̱ kiniꞌán xikoó xota̱ na̱xi̱ńdáꞌniú Sondoma̱ ko̱jo na̱xi̱ńdáꞌniú Ngomorra̱.

Bi̱ tsꞌén íni̱jmì Pabloo̱ kjo̱a̱a̱ nga ni xi kixi̱i̱ kjo̱a̱a̱ kjo̱a̱sꞌijin boá

³⁰ Ja̱ kó mí ni xi kꞌuín. A nga kui xi xota̱ xi jundío̱jín xi kijítji̱ngijín kjo̱a̱kixi̱i̱, kasakoo̱ kjo̱a̱kixi̱i̱, kui kjo̱a̱kixi̱ xi sa̱kó ta̱ngatꞌanii̱ kjo̱a̱niꞌánsꞌijii̱n.

³¹ Ta̱nga kui xota̱ na̱xi̱ńdá xí chji̱a̱ni Israee̱l katsꞌén ngo kjo̱a̱ꞌniú nga katsꞌénkjatjosón kjo̱a̱kitii̱ tsi̱ꞌe̱ nga kixi̱ kꞌuíndo, ta̱nga kamájiín kixi̱ kisꞌińdo.

³² Míkjo̱a̱a̱. Ngatꞌa̱ kijítji̱ngi kjo̱a̱kixi̱i̱, ta̱nga jmí tsi kjo̱a̱a̱ nga sꞌijii̱n, ta̱sá kjo̱a̱a̱ ni xi niꞌaán kjo̱a̱kitii̱, kuíni nga kastingíni kui ndi̱jo̱ xi stingí xi chji̱a̱ xo̱jo̱o̱n.

³³ Xikó tsꞌén kjitꞌa xo̱jo̱n eén Néná nínga bi̱ tsoó: Jéꞌe̱n kꞌi̱e̱ kꞌuijñá an na̱xi̱ńdáꞌniú Jerusale̱n ngo ndi̱jo̱ xi stingí ko̱jo ngo ndi̱jo̱ xi sa̱ꞌínkꞌáka. Kó xi sa̱ꞌínsꞌijin kui xi ndibaá, jmí kjo̱a̱soboá ko̱e̱ꞌéjiín.