Xota̱ Roma̱ 6 - Xo̱jo̱n eén Néná

Bi̱ tsꞌén íni̱jmì Pabloo̱ kjo̱a̱a̱ nga katsꞌénkꞌiénná jeé

¹ Kó ngotꞌe̱ ꞌne̱ mí ni xi kꞌuín. A ta̱kó si̱ꞌanjé ñá tsi̱ꞌe̱ nga tsie ngase kjo̱a̱nda sa̱kóná.

² ¡Jmí! Ngatꞌa̱ tsi je ikꞌíjñámasien jeé, kótsꞌèn nga ta̱kó ku̱i̱ndyión nga si̱ꞌanjé.

³ Axa̱ a yàjínjnú nga ngayeje ñá xi je kamángo Kristo̱ Kjisoo̱ nga kastindá, nga xikónií tsi nijan akayajo̱ kuí.

⁴ Ngatꞌa̱ jè xikoó tsi akjanijínná ko̱jo Kristoo̱ nga akatíndáná, tsi̱ꞌe̱ nga xikótsꞌèn Kristoo̱ jaꞌáꞌyaá ngi̱jii̱n xota̱ xi jesoón ta̱ngatꞌanii̱ nga Na̱ꞌmii̱ akó kjo̱a̱jee̱, ti̱ bo̱a̱ ti̱ tsꞌén ñá ngo kjo̱a̱mindyion tja̱tsi̱e̱ ngatꞌiéná.

⁵ Ngatꞌa̱ tsi je kamángojo̱ Kristoo̱ kjo̱a̱a̱ nga kꞌien, ja̱ ti̱ bo̱a̱ ti̱ tsꞌén nijan ka̱majo̱ nga kjo̱a̱ꞌáꞌyaá kui.

⁶ Ja̱ jè ya ñá nga kjo̱a̱mindyion xi kisꞌiená ngasꞌe̱ jè nijan kꞌienjo̱ Kristoo̱ ki̱a̱ tꞌa kroo̱. Tsi̱ꞌe̱ nga yojo jeé si̱ꞌankjie. Kuíni nga ngiti̱ kuijín jeé xi ko̱tíxománá.

⁷ Ngatꞌa̱ xota̱ xi je ꞌmee̱, jè íjñandé jeé.

⁸ Ta̱nga tsi nijan akayajo̱ Kristoo̱, ti̱ sꞌijinná nga bo̱a̱ tsꞌén nijan ku̱i̱ndyionjo̱ kuí.

⁹ Jè ya nga Kristoo̱ jaꞌáꞌyaá, kó jmíni̱xtjin ko̱yà nginí, ngatꞌa̱ kjo̱a̱bo̱yaa̱ jè ngiti̱ kuijín xi ko̱tíxomaa̱ kui.

¹⁰ Ngatꞌa̱ nga kꞌien Kristoo̱, ta̱ ngo tsí ndi̱yà kꞌien nga jaꞌáxiín ngaꞌniú xí tjiín jeé, kó ngotꞌe̱ ꞌne̱ nga tikón, tjiín ngo kjo̱a̱mindyion xikótsꞌèn mejeén Néná.

¹¹ Ti̱ bo̱a̱ ti̱ tsꞌén jún ti̱ꞌankjójnú nga je akayajo̱jnú jeé, kó ti̱ndyiónjnú xikótsꞌèn mejeén Néná nga ku̱i̱ndyionjnú ngatꞌaa̱ Kristoo̱, kui xi Ndi̱a̱ná.

¹² Ja̱ kuíni nga ngata̱ boeꞌéndièjínjnú nga jeé ko̱tíxomaa̱ yojojnú xi ꞌmee̱, ti̱nde ngata̱ niꞌánsénjínjnúu̱ ni xi ndajín xi mejeén sa̱ꞌín yojojnú.

¹³ Ti̱nde ngata̱ jeéjín boeꞌéjnúu̱ yojojnú nga ni xi ndajín sa̱ꞌínjnú, ta̱sá Néná te̱ꞌéjnúu̱ yojojnú nga xikoó tsi je jaꞌáꞌyájnú ngi̱jii̱n xota̱ xi je jesoón, kó takójnú yojojnú xikoó ngo ni xi niꞌánkjieén ni xi kixi̱i̱.

¹⁴ Ngatꞌa̱ jeé jè ngiti̱ kuijín xi botixómájnú, ngatꞌa̱ jmí tsi ngi̱yaa̱ kjo̱a̱kitii̱ tindyiónjnú, ta̱sá ngi̱yaa̱ kjo̱a̱ndaa̱ Néná tindyiónjnú.

Bi̱ tsꞌén íni̱jmì Pabloo̱ kjo̱a̱a̱ mosoo̱ ni xi kixi̱i̱

¹⁵ Ja̱ kósꞌe̱, nga je ngiti̱ ngi̱yaa̱ kjo̱a̱kitii̱jín tindyión, nga ta̱sá ngi̱yaa̱ kjo̱a̱ndaa̱ Néná tindyión, a si̱ꞌanjé ñá. ¡Jmí, nga bo̱a̱jín ka̱ma!

¹⁶ A yàjínjnú nga tsi ngo nda̱ si̱ꞌankꞌasꞌienjnúu̱ yojojnú tsi̱ꞌe̱ nga ko̱nda̱ꞌyáꞌénjnúu̱, moso̱ xi kastiñaá kui nda̱ xi ndyi̱niꞌánkjatjosónjnúu̱ májnú. Kó tsi moso̱ xi kastiñaá jeé kjimajnú, ko̱yàjnú, ko̱jo tsi tsi̱ꞌe̱ nga ko̱nda̱ꞌyáꞌénjnú, kixi̱ ka̱majnú ngindyi̱ko̱n Néná.

¹⁷ Ta̱nga ndokꞌóchji̱raá Néná, ndatsi moso̱ xi kastiñaá jeé kamájnú ngasꞌe̱, ta̱nga ngotꞌe̱ ꞌne̱ jè kandaꞌyáꞌénjnú ngayeje ini̱ma̱jnú kui kjo̱a̱bokoyá xi kiniꞌánkꞌasꞌienjnú.

¹⁸ Kó ngotꞌe̱ ꞌne̱ jè xota̱ ndeé jeé jún, kó jè mosoo̱ ni xi kixi̱i̱ kamájnú.

¹⁹ Chjiájojnúꞌun xikoó xota̱ ta̱ chiboa, ngatꞌa̱ indajnú kó sꞌe̱ tsí kjimakjínjnú kui nii̱. Ngatꞌa̱ xikótsꞌèn ngasꞌe̱ kiniꞌánkꞌasꞌienjnúu̱ yojojnú ni xi ndándií ko̱jo ni xi ndajiín, tsi̱ꞌe̱ nga kiniꞌánjnú ni xi ndajínkjiꞌi, ngotꞌe̱ ꞌne̱ ti̱ꞌankꞌasꞌiénjnúu̱ yojojnú xaá ni xi kixi̱i̱, tsi̱ꞌe̱ nga tsjietsꞌén ku̱i̱ndyionjnú.

²⁰ Ngatꞌa̱ kjiꞌanga moso̱ xi kastiñaá jeé kamájnú, kjin kixindyionjnúu̱ ni xi kixi̱i̱ Néná.

²¹ Kó mí ni xi kasakojnú ngasꞌe̱. Ngotꞌe̱ ꞌne̱ kjo̱a̱soboá tsja̱ajnú kui nii̱, ngatꞌa̱ nga fetꞌaa̱ kui nii̱ kjo̱a̱bo̱ya boá.

²² Ta̱nga ngotꞌe̱ ꞌne̱ ngije xín kiniꞌánkjaꞌajnúu̱ yojojnú jeé, kó ngije mosoo̱ Néná jè kamájnú, tikónjnú ngo ni xi tsi̱ꞌe̱ kjo̱a̱tsjiee̱, kó nga kju̱i̱e̱tꞌa sa̱kójnú kjo̱a̱mindyion ngatsjéni̱xtjii̱n.

²³ Ngatꞌa̱ chjií jeé kjo̱a̱bo̱yaa̱ boá, ta̱nga kjo̱a̱ndaa̱ Néná kjo̱a̱mindyion ngatsjéni̱xtjii̱n boá ngatꞌaa̱ Kristo̱ Kjisoo̱, kui xi Ndi̱a̱ná.