Xota̱ Roma̱ 5 - Xo̱jo̱n eén Néná

Bi̱ tsꞌén íni̱jmì Pabloo̱ kjo̱a̱a̱ nga Néná tsjáná kjo̱a̱xió

¹ Ja̱ kuíni nga Néná katsꞌénjo̱ꞌoná xikoó xota̱ xi kixi̱, ndokꞌóchji̱nií nga sꞌijinná kuí, kó tjínná kjo̱a̱xió ngatꞌaa̱ Ndi̱a̱ná Jesukristoo̱.

² Ta̱ngatꞌanii̱ nga sꞌijinná Jesukristoo̱, kuíni nga ndyi̱bitjasꞌi̱e̱njin kuí kjo̱a̱nda xi̱ꞌbi̱, ꞌniú ku̱i̱ndyión kó tsja ngatamaná kjo̱a̱a̱ kjo̱a̱jee̱ Néná xi ndyi̱chiyáa̱ nga sa̱kóná.

³ Kó jmí tsi ta̱kuítsí nii̱ xi tsja máná, ti̱ tsjá máná kjo̱a̱a̱ kjo̱a̱ni̱ma̱ná, ngatꞌa̱ je ya nga kjo̱a̱ni̱ma̱a̱ bokoyáná nga kꞌuiéná kjo̱a̱chiyákjo̱a̱.

⁴ Kó kjo̱a̱chiyákjo̱a̱ná, kjo̱a̱chjatꞌayákón ka̱ma. Kó kjo̱a̱chitꞌayákónná, kjo̱a̱chiyá ka̱ma.

⁵ Kó kjo̱a̱chiyaá tsja̱ajínná kjo̱a̱soboá, ngatꞌa̱ kjo̱a̱tjoó Néná íjñá ngi̱jii̱n ini̱ma̱ná ta̱ngatꞌanii̱ kui A̱si̱énni̱xtjii̱n xi katsjáná ñá.

⁶ Kjiꞌanga ñá xí xota̱ jé kamájínná kaꞌnaxiéꞌá so̱bo̱a̱ yojoná, Kristoo̱ kꞌien ta̱ngatꞌanii̱ ñá, kuí má ni̱xtjin xi jaꞌájin Néná.

⁷ Ngatꞌa̱ achichí niꞌin kjiꞌi nga ngo xi ko̱yátjé ngo xota̱ xi kixi̱, ta̱nga a bena tsi ka̱ma, tsi ngo xi ko̱yátjé ngo xota̱ xi ꞌniú ndaxota̱.

⁸ Ta̱nga Néná akó kjo̱a̱a̱ nga tjoó ñá, ngatꞌa̱ ndatsi xota̱ jé ñá, Kristoo̱ kꞌientjéná.

⁹ Ja̱ kuíni nga ngotꞌe̱ ꞌne̱, Néná kꞌo̱xiéꞌáná, tsi̱ꞌe̱ nga sa̱kójínná kjo̱a̱xcha̱án, ngatꞌa̱ jè xota̱ kixi̱ katsꞌénná ta̱ngatꞌanii̱ nga kꞌien Kristoo̱.

¹⁰ Ngatꞌa̱ tsi kjiꞌanga kondraa̱ Néná kamá ñá, akjandajo̱ Néná ta̱ngatꞌaa̱ nga kꞌien ndií, kó kuíni nga, nga nda yaꞌaná Néná, kuí xí kꞌo̱xiéꞌáná ngotꞌe̱ ꞌne̱ nga tikón ndií.

¹¹ Kó jmí tsi ta̱kuítsí nii̱, ti̱ tsjá máná Néná ta̱ngatꞌanii̱ Ndi̱a̱ná Jesukristoo̱, kui xi ta̱ngatꞌanii̱ kui nga je akjandajo̱ Néná.

Bi̱ tsꞌén íni̱jmì Pabloo̱ kjo̱a̱a̱ Andaa̱n ko̱jo Kristoo̱

¹² Kó kuíni nga, xikoó nga jeé jeꞌe kui nga̱sondiee̱ kjo̱a̱a̱ ni xi katsꞌén Andaa̱n, kó nga jeé jeꞌejo̱ kjo̱a̱bo̱yaa̱, kuíni nga kjo̱a̱bo̱yaa̱ kasakoo̱ ngayeje xotaa̱, ngatꞌa̱ ngayejee̱ nga katsꞌénjé.

¹³ Ngatꞌa̱ ngindiee̱ nga Néná katsꞌénkꞌasꞌiee̱n kjo̱a̱kitii̱ Moisee̱, kisꞌie jé kuí nga̱sondiee̱, ta̱nga nínga jmí kjo̱a̱kitijín, chꞌiáxki̱jín jeé.

¹⁴ Ta̱nga ndeskande nga kisꞌijña Andaa̱n, kó ngaskande ni̱xtjii̱n Moisee̱ nga ngayeje xotaa̱ jesón, ndatsi jmí tsi bo̱a̱ tsꞌén katsꞌénjé xikoó Andaa̱n. Kó Andaa̱n kui xi xikónii̱ ngo nda̱ xi jaskan kjo̱e̱ꞌe.

¹⁵ Ta̱nga jeé Andaa̱n bo̱a̱jín ti̱ kjiꞌini xikoó kjo̱a̱ndaa̱ Néná. Ngatꞌa̱ tsi ta̱ngatꞌanii̱ jeé ngo nda̱ nga kjín xota̱ xi kꞌien, ta̱nga ta̱ngatꞌaa̱ kjo̱a̱ndaa̱ ngo nda̱, kui xi Jesukristoo̱, nga kjín xota̱ kasakoo̱ kjo̱a̱ndaa̱ Néná xi ta̱ katsjárií.

¹⁶ Kó kui kjo̱a̱ndaa̱ jmí tsi xikoó jeé kui nda̱ xi ngo xi katsꞌénjeé, ngatꞌa̱ kjénní nga kjo̱a̱botíjeé kjindibá ta̱ngatꞌanii̱ ngo jé, ta̱nga kjo̱a̱ndaa̱ kjindibáni ngije achichí jé kiniꞌán, tsi̱ꞌe̱ nga kixi̱ ku̱i̱ndyión ngindyi̱ko̱n Néná.

¹⁷ Ngatꞌa̱ tsi ta̱ ngo tsí xi katsꞌénjé, kó kuíni nga kjo̱a̱bo̱yaa̱ atíxoma, kjín ngase xota̱ xi kꞌuieé kjo̱a̱mindyion ta̱ngatꞌanii̱ ta̱ ngo tsí nda̱, kui xi Jesukristoo̱. Kuí xotaa̱ xi sa̱ko̱ó ꞌniú tsie kjo̱a̱nda, ko̱jo nga kixi̱ kꞌuíndo ngindyi̱ko̱n Néná.

¹⁸ Xikó tsꞌén, nga ta̱ngatꞌanii̱ nga ngo xi katsꞌénjé nga kisꞌiee̱ kjo̱a̱botíjé ngayeje xotaa̱, ti̱ bo̱a̱ ti̱ tsꞌén kjo̱a̱kixi̱i̱ ta̱ ngo tsí xi kjindibánii̱, tsi̱ꞌe̱ nga kixi̱ kꞌuíndo ngayeje xotaa̱ ngindyi̱ko̱n Néná.

¹⁹ Ngatꞌa̱ xikótsꞌèn nga ta̱ngatꞌanii̱ nga ngo nda̱ xi tsintꞌiéꞌénjiín Néná nga achichí xota̱ xi katsꞌénjé, ti̱ bo̱a̱ ti̱ tsꞌén ta̱ ngo tsí nda̱ xi tsintꞌiéꞌeén Néná, kó ta̱ngatꞌanii̱ kui nga achichí xota̱ xi kixi̱ ka̱ma ngindyi̱ko̱n Néná.

²⁰ Ta̱nga kjo̱a̱kitii̱ jeꞌe tsi̱ꞌe̱ nga jeé ka̱makjín ngase, ta̱nga ngije kamákjín jeé, ti̱ kamátsié ngase kjo̱a̱ndaa̱ Néná.

²¹ Ngatꞌa̱ xikótsꞌèn ta̱ngatꞌanii̱ jeé nga atíxoma kjo̱a̱bo̱yaa̱ kó katsꞌénkꞌién xotaa̱, ti̱ bo̱a̱ ti̱ tsꞌén ngatatixómá kjo̱a̱ndaa̱ Néná, tsi̱ꞌe̱ nga kixi̱ ka̱ma xotaa̱ ngi̱yaa̱ kjo̱a̱mindyion ngatsjéni̱xtjii̱n ngatꞌaa̱ Ndi̱a̱ná Jesukristoo̱.