Xota̱ Roma̱ 4 - Xo̱jo̱n eén Néná

Bi̱ tsꞌén íni̱jmì Pabloo̱ kjo̱a̱a̱ chi̱bo̱a̱ xi íjñá Abraa̱n

¹ Mí xí ka̱ma kꞌuín nga kasakoo̱ nda̱ xi tji̱e̱ xcháná xí kiꞌmí Abraa̱n.

² Ngatꞌa̱ tsi Abraa̱n kamákixi̱ ngindyi̱ko̱n Néná ta̱ngatꞌanii̱ ni xi katsꞌén, tjínrií míkjo̱a̱a̱ nga kꞌuieé kjo̱a̱je, ta̱nga jmí tsi ngindyi̱ko̱n Néná.

³ Ngatꞌa̱ mí ni xi tsó xo̱jo̱n eén Néná kjo̱a̱a̱ Abraa̱n. “Abraa̱n kisꞌijii̱n Néná, kó Néná kamábe kjo̱a̱sꞌijii̱n Abraa̱n, kó katsꞌénjo̱ꞌo xikoó ngo xota̱ xi kixi̱.”

⁴ Xikoó kjiꞌanga ngo xi tsꞌénxá, to̱n xi machjií jmí tsi ta̱ boeꞌérií, kuí boá ngo to̱n xi boeꞌeé kjo̱a̱a̱ xá xi je katsꞌén.

⁵ Ta̱nga xota̱ xi ma ꞌniákónjín ni nda xi katsꞌén, kó nga ta̱sá sꞌijii̱n kui Néná xi tsꞌénkixi̱ xota̱ xi ndajiín, kuí kjo̱a̱sꞌijii̱n xi boaꞌaxki̱ Néná nga tsꞌénjóꞌo xikoó ngo xota̱ xi kixi̱.

⁶ Ndabii̱ katsó nga achichíra̱tsjaa̱ ngo xota̱ xi Néná sa̱ꞌínkixi̱, ta̱nga jmí tsi kjo̱a̱a̱ ni xi katsꞌén.

⁷ Kó bi̱ katsó: Achichíra̱tsjaa̱ ngayeje xota̱ xi Néná sa̱ꞌínjetakoón ni xi ndajínkjiꞌi xi katsꞌén, kui xi ki̱a̱jín si̱ꞌaa̱n xki̱ jeé.

⁸ Achichíra̱tsjaa̱ xota̱ xi Ndi̱a̱ná ko̱a̱ꞌa̱xki̱jín jeé.

⁹ Kó kui kjo̱a̱tsjaa̱, ata̱ kuí tsí tsi̱ꞌe̱ xota̱ xi tjiín sirkunsisioo̱n, axa̱ ko̱jo tsi̱ꞌe̱ xota̱ xi jmíjiín sirkunsisioo̱n boá nga. Ngatꞌa̱ bi̱ ꞌmí: Néná tsaꞌa xki̱ kjo̱a̱sꞌijii̱n Abraa̱n xikoó ngo xota̱ xi kixi̱.

¹⁰ Kótsꞌèn nga Néná tsaꞌa xki̱. A nga kiniꞌaán sirkunsisioo̱n axa̱ nga kiniꞌánjiín. Jmí tsi nga kiniꞌaán, ta̱sá nga kji̱e̱ niꞌánjiín sirkunsisioo̱n.

¹¹ Kó Abraa̱n kiniꞌaán sirkunsisioo̱n xikoó ngo chi̱bo̱a̱ nga je kiniꞌánkixi̱, kó kui nii̱ xi katseꞌeé ngindiee̱ nga si̱ꞌaa̱n sirkunsisioo̱n. Bo̱a̱ tsꞌén nga Abraa̱n xi kamá na̱ꞌmii̱ ngayeje xota̱ xi sꞌijii̱n Néná, ndatsi jmíjiín sirkunsisioo̱n, tsi̱ꞌe̱ nga kui xotaa̱ xꞌi̱a̱xki̱ kjo̱a̱sꞌijii̱n nga ka̱ma kixi̱.

¹² Kó Abraa̱n kuí xí na̱ꞌmii̱ xota̱ xi kiniꞌaán sirkunsisioo̱n, ko̱jo xi ndyi̱fítji̱ngi kjo̱a̱sꞌijin xi akó nda̱ xi tji̱e̱ xcháná Abraa̱n ngindiee̱ nga kiniꞌaán sirkunsisioo̱n.

Bi̱ tsꞌén íni̱jmì Pabloo̱ kjo̱a̱a̱ nga ni xi katsó Néná kjo̱tjosón ta̱ngatꞌanii̱ kjo̱a̱sꞌijinná

¹³ Ngatꞌa̱ jmí tsi kjo̱a̱a̱ kjo̱a̱kitii̱ nga Abraa̱n, ko̱jo xota̱ tji̱e̱e̱ katseꞌeé ni xi katsó Néná nga kui nga̱sondiee̱ tsi̱ꞌe̱ ka̱ma, ta̱ngatꞌanií kjo̱a̱kixi̱i̱ kjo̱a̱sꞌijii̱n.

¹⁴ Ngatꞌa̱ tsi kui xi ndyi̱tsꞌènkjátjosón kjo̱a̱kitii̱ xi sa̱ko̱ó ni xi katsóyàtjón Néná nga tsja̱á, tsi bo̱a̱ kjiꞌi, ja̱ jmí ni chjíjínraa̱ kjo̱a̱sꞌijii̱n, ko̱jo jmí ni chjíjínraa̱ ni xi katsó Néná nga tsja̱á tsobo̱a̱.

¹⁵ Néná ko̱tíjeé xota̱ xi ndyi̱tsꞌènkjátjosónjín kjo̱a̱kitii̱. Ta̱nga nínga jmí kjo̱a̱kitijín, ja̱ ti̱nde jmíjín xi ko̱tíjeé kjo̱a̱a̱ nga ndyi̱tsꞌènkjátjosónjín kjo̱a̱kitii̱.

¹⁶ Kó kuíni nga, ni xi katsóyàtjón Néná nga tsja̱á, ta̱ngatꞌanií kjo̱a̱sꞌijii̱n nga ta̱ sakóná. Kó ta̱ngatꞌanii̱ kui nii̱ nga ya nga sa̱ko̱ó ngayeje xi xota̱ tji̱e̱e̱ nda̱ xi ꞌmí Abraa̱n, jmí tsi ta̱kuítsí xota̱ xi ngi̱yaa̱ kjo̱a̱kitii̱ síndo, ko̱jo kuí tsi̱ꞌe̱ xota̱ xi sꞌijii̱n xikoó Abraa̱n, kui xi na̱ꞌminá ngayeje ñá,

¹⁷ ngindyi̱ko̱n Néná, xikótsꞌèn kjitꞌa xo̱jo̱n eén, nínga Néná bi̱ katsoó Abraa̱n: “Jí xí katsꞌeen na̱ꞌmii̱ kjín xota̱ na̱xi̱ńdá.” Abraa̱n kisꞌijii̱n Néná, kui Néná xi tsꞌénkjaꞌáꞌyaá xota̱ xi je jesoón, ko̱jo nga kui xi ka̱maa̱ sa̱ꞌínda ni xi kji̱e̱ jmíjín.

¹⁸ Abraa̱n ngije ngiti̱ jmíjiín kjo̱a̱chiyá, kisꞌijii̱n, kó askoyákjo̱a̱ ni xi kiꞌmií, kó kamá na̱ꞌmii̱ kjín xota̱ na̱xi̱ńdá, xikó katsoó Néná nga “kjín ka̱ma xota̱ tji̱e̱e̱.”

¹⁹ Kó ta̱kó kisꞌijii̱n Abraa̱n, ndatsi kamákjiín nga je mején ma kꞌien, ngatꞌa̱ Abraa̱n je mején úchán nó tjiín, kó ngiti̱ chi̱bo̱a̱jiín nga kꞌuié ngasee̱ ndí, kó chjo̱ón kui xi kiꞌmí na̱ Saraa̱ ndi̱ kamá.

²⁰ Nde jó nde jánjín íjñaá ini̱ma̱a̱, ngatꞌa̱ je be nga Néná sa̱ꞌínkjatjosón ni xi katsóyàtjoón. Ta̱sá kasakongaꞌniuú kjo̱a̱sꞌijii̱n nga katsjaá kjo̱a̱je Néná.

²¹ Abraa̱n be cha̱n cha̱n nga Néná tjiín ngaꞌniú kó nga ka̱maa̱ sa̱ꞌínkjatjosón ni xi katsóyàtjoón.

²² Kó kuíni nga Néná tsaꞌaxki̱ kjo̱a̱sꞌijii̱n Abraa̱n xikoó ngo xota̱ xi kixi̱.

²³ Kó nínga tsó xo̱jo̱n eén Néná nga kichꞌiáxki̱jín, jmí tsi ta̱ kjo̱a̱a̱ kuí tsí Abraa̱n nga bo̱a̱ tsó.

²⁴ Kui nii̱ kiniꞌánꞌindó kjo̱a̱a̱ ñá nga, ngatꞌa̱ xꞌi̱a̱xki̱ná ñá, kjo̱a̱a̱ nga sꞌijinná Néná, kui Néná xi katsꞌénkjaꞌáꞌyaá Kjisoo̱ ngi̱jii̱n xota̱ xi je jesoón.

²⁵ Kui xi kiniꞌánkꞌasꞌien tsi̱ꞌe̱ nga si̱ꞌankꞌien, ta̱ngatꞌanii̱ jéná, kó jaꞌáꞌyaá tsi̱ꞌe̱ nga sa̱ꞌínkixi̱ná ngindyi̱ko̱n Néná.