Xota̱ Roma̱ 3 - Xo̱jo̱n eén Néná

¹ Mí ni xi tjín ngasee̱ xota̱ jundíoo̱ tsobo̱a̱. Axa̱ mí chjí ngasenii̱ kjo̱a̱a̱ sirkunsisioo̱n.

² Achichí tsie ngase chjínií, ta̱jñàní nga stsitsíjìi̱n. Tjón mára xiyàjnúꞌun nga ja̱koxi̱ boá nga Néná kamáꞌniátakón xota̱ jundíoo̱ nga kui katsꞌénkꞌasꞌiee̱n eén.

³ Kó tsi tjín xota̱ jundío̱ xi sꞌijinjiín Néná, ta̱nga, kó a kuíni nga ngiti̱ ka̱maꞌniátakónjín ñá Néná.

⁴ ¡Jmí!, Néná ngatsjéni̱xtjin nga ja̱koxi̱ boá ni xi tsó, kó ngayeje xotaa̱ nga ndiso, xikótsꞌèn kjitꞌa xo̱jo̱n eén Néná: Kixi̱ ka̱ma ji kjo̱a̱a̱ ni xi sé jí, kó ji si̱ꞌin ji, kjiꞌanga xchítꞌaa̱ tsi nda ko̱jo tsi ndajín ni xi kiniꞌín ji.

⁵ Kó tsi kjiꞌanga niꞌán ni xi kixi̱jín, kjiꞌa bokó nga ta̱nisién kixi̱ Néná. Mí xí kꞌuín. A kixi̱jín Néná nga botíjéná. (Tsꞌénchji̱a̱ an xikótsꞌèn tsꞌénkjó ngo xota̱.)

⁶ ¡Jmí! Tsi kixi̱jín Néná, kótsꞌèn ka̱maa̱ Néná nga ko̱tíjeé xotaa̱.

⁷ Ta̱nga tsi ta̱ngatꞌanii̱ kjo̱a̱ndisona nga Néná tsie ngase ja̱koxi̱ akó kjo̱a̱jee̱ kui, míkjo̱a̱a̱ nga ko̱tíjéna xikoó ngo xota̱ jé.

⁸ Ánní nga ka̱májín bi̱ kꞌuin: Si̱ꞌán ni xi ndajiín, tsi̱ꞌe̱ nga kji̱ndi̱bá ni xi ndaa̱. Kuí má ni xi̱ꞌbi̱ xi tsó chiboa xotaa̱, ja̱koxi̱ xò nga kuí xò nii̱ xi bokoyá ji̱n. Xi bo̱a̱ tsoó, ndakjíꞌí nga kasatíjeé.

Bi̱ tsꞌén íni̱jmì Pabloo̱ kjo̱a̱a̱ nga jmíjín xota̱ xi kixi̱

⁹ Kó mí ni xi mejeén tsó ngayeje kui nii̱. A ꞌniú nda ngase ji̱n ta̱bo̱a̱jiín kui jaá. Jmí, ngatꞌa̱ je akakojne̱ nga xota̱ xi jundío̱ ko̱jo xota̱ xi jundío̱jiín ngayejee̱ nga ndyi̱tsꞌèn jé.

¹⁰ Xikó tsꞌén kjitꞌa xo̱jo̱n eén Néná: Nde ngojín xota̱ xi kixi̱ ngindyi̱ko̱n Néná.

¹¹ Nde jmíjín xi kamákjiín, Nde jmíjín xi mongase Néná.

¹² Ngayeje xotaa̱ nga xín ndi̱yà kijí, kó jmí ni chjíjiín ni xi katsꞌén. Nde jmíjín xi ni xi nda tsꞌén, nde ngojín.

¹³ Ta̱ soboá ni xi ndajín xí chji̱a̱, tsꞌoa xikó maá ngo nga̱tsjo̱ó xí tji̱e̱nti̱xa̱. Na̱je̱n xí ndyi̱tsꞌènkjién nga ndyi̱ꞌbindísó. Xikónií tsi xaán ye̱ tjiín ngindie tji̱xintsꞌoá.

¹⁴ Kó tsꞌoa tjikítsie maá én chꞌo tsó ko̱jo kjo̱a̱xtinda.

¹⁵ Achichí tsá má nga tsꞌenkꞌién ini̱ma̱.

¹⁶ Ni xi je kiniꞌánkjié, ko̱jo kjo̱a̱ni̱ma̱ índo xikótsꞌèn kisꞌińdo.

¹⁷ Kó nde kamábejín kjo̱a̱xioó.

¹⁸ Nde tsꞌénkjójín nga Néná xí chjiéngá sku̱i̱e̱ndikón.

¹⁹ Ta̱nga jè ya ñá ngayeje ni xi tsó kjo̱a̱kitii̱, nga tsi̱ꞌe̱ xota̱ xi Néná katsjaá kui kjo̱a̱kitii̱ boá, tsi̱ꞌe̱ nga ngayeje tsꞌoa xotaa̱ si̱chjá, kó ngayeje xotaa̱ kui nga̱sondiee̱ sa̱ꞌínkie yojoo̱ nga katsꞌénjé, kó kꞌuíndo ngi̱yaa̱ kjo̱a̱botíjeé Néná.

²⁰ Ngatꞌa̱ jmí tsi kjo̱a̱a̱ ngo ni xi katsꞌén ngi̱yaa̱ kjo̱a̱kitii̱ nga ngo xota̱ xi kixi̱ ka̱ma ngindyi̱ko̱n Néná, ngatꞌa̱ kjo̱a̱kitii̱ ta̱kuítsí xi bokó nga xota̱ boá jé ñá.

Bi̱ tsꞌén íni̱jmì Pabloo̱ kjo̱a̱a̱ nga kjo̱a̱kixi̱i̱ ngi̱yaa̱ kjo̱a̱sꞌijii̱n chji̱a̱ni

²¹ Ta̱nga ngotꞌe̱ ꞌne̱, jè akó Néná xikótsꞌèn kixi̱ xotaa̱ ngindyi̱ko̱n kui, kó jmí tsi kjo̱a̱kitii̱ xi maa̱ bo̱a̱ tsꞌén. Kó ngaskande xo̱jo̱n kjo̱a̱kitii̱, ko̱jo ni xi ítꞌa já chji̱ni̱e̱ꞌe̱én Néná tsáyà kui nii̱.

²² Néná xota̱ kixi̱ tsꞌén ngayeje xota̱ xi sꞌijii̱n Jesukristoo̱, ngatꞌa̱ Néná skjánjín tsꞌénjo̱ xotaa̱.

²³ Ngayeje xotaa̱ nga katsꞌénjé kuíni nga ngiti̱ tsoboájiín nga sa̱ko̱ó kjo̱a̱jee̱ Néná.

²⁴ Ta̱nga Néná ta̱ngatꞌanii̱ nga achichí tjoó ñá, kuíni nga ta̱ katsjáná nga kixi̱ tindyión ngindyi̱ko̱n kui, ngatꞌaa̱ nga kꞌien Kristo̱ Kjisoo̱ jè tsꞌaxiéꞌáná.

²⁵ Néná xí bo̱a̱ tsꞌén íjñá xikoó ngo chji̱e̱ nga kꞌien Jesukristoo̱, tsi̱ꞌe̱ nga ta̱ngatꞌanii̱ kui jín xí iskjitjón nga kꞌien nga si̱ꞌanjetakónnii̱ xota̱ xi sꞌijii̱n, kó bo̱a̱ tsꞌén Néná akó kjo̱a̱kixi̱i̱, ta̱ngatꞌanii̱ nga tsiekon kamá nga katsꞌénjín xki̱ jé xi kisꞌie ngasꞌe̱,

²⁶ tsi̱ꞌe̱ nga Néná akó kjo̱a̱kixi̱i̱ ni̱xtjin xi̱ꞌbi̱, kó kixi̱ ka̱ma kui, kó bo̱a̱ tsꞌén kixi̱ sa̱ꞌín xi sꞌijii̱n Kjisoo̱.

²⁷ Kósꞌe̱ kó kamaá kui kjo̱a̱nkꞌatakón xi tsꞌénkjién xotaa̱. Je kiniꞌánkjié. Míkjo̱a̱a̱. Ngatꞌa̱ nga niꞌánkjatjosón kjo̱a̱kitii̱ tsjandiè nga niꞌánkjién kjo̱a̱nkꞌatakoón, ta̱nga kjo̱a̱sꞌijii̱n tsjandièjín.

²⁸ Kuíni nga makjínná, nga Néná tsꞌénkixi̱ná ta̱nga ta̱ngatꞌanií nga sꞌijinná Kristoo̱, jmí tsi kjo̱a̱a̱ nga si̱ꞌankjatjosón ni xi tjítꞌa kjo̱a̱kitii̱.

²⁹ Kó Néná ata̱ Nee̱ xota̱ jundío̱ tsí. A mí tsí ko̱jo Nee̱ xota̱ na̱xi̱ńdá xí ngasee̱ boá nga. Bo̱a̱ kjíꞌí, ko̱jo Ne tsi̱ꞌe̱ xota̱ na̱xi̱ńdá xí ngasee̱ boá nga.

³⁰ Ngatꞌa̱ ta̱ ngo tsí má Néná, kó kuí xí sa̱ꞌínkixi̱ xota̱ jundío̱ xi kiniꞌaán sirkunsisioo̱n ngatꞌa̱ sꞌijii̱n, kó ti̱ sa̱ꞌínkixi̱ xota̱ xi ngasee̱ xi jmíjiín sirkunsisioo̱n ngatꞌa̱ ti̱ sꞌijii̱n nga.

³¹ Kósꞌe̱, a ta̱ngatꞌanií kjo̱a̱sꞌijii̱n nga si̱ꞌanchjíjáa̱n kjo̱a̱kitii̱. ¡Jmí! Ta̱sá ndyi̱niꞌánchjí ngasée̱ kjo̱a̱kitii̱.